3
Dïrbä didi gomon gidi gwodaning
1 Nggwunana ndi ang diwayini ndi ari giyomon yidi gwodaning, gaji ga ji gojema gwulleny.
2 Ngwüjï ngwa gwurla ndi ämnï yigoꞌro yegen, ngwämnï ngwüꞌrïnyä, ngwa piyi yigoꞌro yegen, ngwa ïrïngïnï, ngwa ari ngwulem, ngwa nyortaci mbumbung janu, ngwa nyïꞌrïnï ndi gwäꞌräcï ngwüjü aar je ci yäy ꞌtu, ngwa rngï.
3 Ngwa erne ämnïng, ngwaꞌti ngwa düdänïjï ngwüjänü, ngwa änïjï ngwüjü nono, ngwa ꞌti ngwa määtä lingina, ngwa ꞌre ngwäy, ngwa je yiꞌral ke ngwäy yanni yijaw.
4 Ngwa gwurlanu ngwüjï ngwe, ngwa büdäcï yiꞌral ngwäy, ngwa ꞌtüyï ngwuꞌra ngwegen, ngwa ꞌti ngwa ämnï Ngwaalinga ngwa je ngwong ngwudi dïdlä amiꞌranu.
5 Ngwa ru ngwumurꞌtuny gïdrü didi Ngwaalu aar be ꞌrïꞌrïnyïnï yiima yüngün yanni yapu yiiru. ꞌTüdänü ngwüjï ngwanni ngwuru gu no.
6 Ndi ari ngwo ngwoko ngwati ändädä ngwüjü ngwuꞌdunanu aar ꞌduꞌdi ngwayu ngwanni ngwamiꞌratu ngwüpïnä gwanni gwuki a je amiꞌra ꞌdar gwanni gwuki mananu.
7 Ngwati aar je enggaci giyomonalu ꞌdar a je ꞌti be yiꞌral ändï giyiꞌranu aꞌtur ndi ari aar bebere ngwujaꞌri ngwanni ngwuru ꞌdidanu.
8 Ngwuru nono Yennejinga Yamburuj gwe lanni lübïnä Müjängälü. No yiru gu ꞌto ngwüjï ngwee ngwübïnä ngwujaꞌralu ngwanni ngwuru ꞌdidanu. Aar ru ngwüjï ngwuki yaꞌranya ngwaꞌti ädï ndi ämnï Ngwaalu.
9 A be ngwaꞌti ngwa ji ndi ꞌdongga gweere ndi ari yeꞌrr yegen ꞌdar ya ꞌtänälü gilingenalu ya je ngwüjï engga, anaku ꞌtädäär gwälü yidi Yennejinga Yamburuj gwe.
Bulij gwülädï Timijawujing
10 A be nga gwülïngïdï enggacing gwüny ꞌdar, nga lenge elelleng na buping gwüny, nga lenge ämnïng Ngwaalu na määtäng gwudi ligor lüny, nga lenge ämnïng na orꞌtemajing gwüny.
11 Nga lenge übïnïngälü gwanni gwübïnäär nyi gwe ngwüjälü, na yiꞌrendenya yüny ꞌdar yanni yimbujiny Andakiya, Ayikuniya na Lijitra. Ngwüjï ngwübïnïnyälü übïnïngälü gwuru yedeny. Aar nyi gu be Deleny gätäjä giyiꞌralanu giyee ꞌdar.
12 Yiru gu ꞌdidanu ndi ari gwere gwanni gwaru gwadi elelle drü de ndi Yicu Kirictu ngwuru dïkïrïjïn, gwa aar übïnälü.
13 A be ngwüjï ngwanni ngwuki na ngwanni ngwati ïdänänü ngwube kani giyiꞌral yegen yanni yiki. Lati dudiyi ngwüjï ngwuꞌter la dudiyi yigoꞌro yegen.
14 A be nga, mätïnälü ndi enggaci gwanni gwuma ang enggaci nga gwe ïcïnänü. Nunnu nga gwülïngïdï ndi ari yärü gwuru gwenggacanga.
15 Ndi ari ꞌtuꞌtu yogo ye nga gwülïngïdï gitab gidi Ngwaalu ganni gati ang bebereye nga ji nga mbuji gilanging ämnï gwe gwunga ndi Yicu Kirictu.
16 Gitab ku gïndï Ngwaalu gijaw ngwaalu ngwudi enggaci gwanni gwuru ꞌdidanu, ndi girinya, ndi jaꞌrima na ndi reraji gwani dünälü.
17 Nunnu a dïjï didi Ngwaalu mbuti ngwujaꞌrimani ndi ꞌdïꞌrï yiiru ye ꞌdar yanni yijaw.