Bụ́kụ̃ Ézĩrã drị̂
Ị́jọ́ icélé bụ́kụ̃ Ézĩrã drị̂ drị̃ gá rĩ
Bụ́kụ̃ Ézĩrã drị̂ kí Nẽhẽmíyã drị̂ be jọ kí ị́jọ́ ị́jọ́ ꞌbání drị̃lẹ́ mgbọ fẽjó ꞌbá Ịsịrayị́lị̃ drị̂ ꞌbaní sĩ ãgõjó ãngũ Ịsịrayị́lị̃ drị̂ gá ándrá kí ꞌdụjó ãtíꞌbó ru ãngũ Pásĩyã drị̂ kí agá Bãbụ̃lọ́nị̃ drị̂ be rĩ sĩ. Bụ́kụ̃ Ézĩrã drị̂ jọ ị́jọ́ ambamba la ị́jọ́ ꞌbá Ịsịrayị́lị̃ drị̂ ꞌbaní jó sĩ Ãdróŋá ị̃nzị̃jó rĩ sịjó Yẹ̃rụ́sãlẹ́mụ̃ gá rĩ drị̃ gá. ꞌBá ũꞌbí ụ̃nị̃táŋá Bĩbĩlíyã drị̂ trũ ụrụgá rĩ ãꞌị̃ kí rá Ézĩrã sĩ ãzíla icí bụ́kụ̃ 1 Ị́jọ́ Sụ́rụ́ drị́ kí 2 Ị́jọ́ Sụ́rụ́ drị́ be nĩ, sĩ vâ ãzíla icí vâ bụ́kụ̃ Ézĩrã drị̂ kí Nẽhẽmíyã drị̂ be nĩ. ꞌBá bụ́kụ̃ ꞌdi kí sĩlépi ãzíla icílépi rĩ drĩ adru Ézĩrã ꞌi ku, ꞌbá ãzí ãlu la icó bụ́kụ̃ ꞌdi kí sĩlé nĩ. Ícó bụ́kụ̃ Ézĩrã drị́ ꞌdĩ icílé ũgũgõ ílí 440 BC sĩ, wó wókõ la ãzí ri kí ícó kí sĩlé sáwã ãzí ndú la gá.
Bụ́kụ̃ Ézĩrã drị̂ iꞌda ị́jọ́ Ãdróŋá fẽ úpí Kụ́rọ̃ Pásĩyã drị̂ ní ꞌbá Ịsịrayị́lị̃ drị̂ kí fẽjó mụjó jó Ãdróŋá ị̃nzị̃jó rĩ sịjó úꞌdí ru íngoní yã rĩ drị̃ gá. ꞌDĩ vâ ị́jọ́ Yẽrẽmíyã ꞌbã ụndrị́lé rĩ ní ru ngajó rĩ ꞌi. (Yẽrẽmíyã 29:10-14) Mẹ́rọ́ꞌbá ãzí kí andrá cí ri kí ãꞌdị́ ꞌdịlé ãzị́ sĩ jó Ãdróŋá ị̃nzị̃jó rĩ sịjó úꞌdí ru rĩ sĩ, ãzị̂ tu ándrá dó sĩ pa sáwã were sĩ cí. Wó ꞌbá Ịsịrayị́lị̃ drị̂ de kí ãzị́ sĩ jó Ãdróŋá ị̃nzị̃jó rĩ sịjó úꞌdí ru rĩ drị̂ sáwã were vúlégá rá ãzãkoma Ãdróŋá ꞌbã fẽlé ĩꞌbaní rĩ sĩ. Ézĩrã ꞌbã ꞌbá Ịsịrayị́lị̃ drị́ ꞌdi kí drị̃ ce agá ꞌdĩ gá ꞌdâ, ꞌbá uja kí vâ ásị́ ị́jọ́ ũnzí ĩꞌbadrị̂ kí sĩ rá. ꞌDĩ ị́jọ́ ꞌbá Ịsịrayị́lị̃ drị̂ ꞌbaní ásị́ ujajó úꞌdí ru ũyõ ándrá ĩꞌbaní nalé sĩ ãzị́táŋá Ãdróŋá drị̂ kí tãmbajó rĩ sĩ rĩ ꞌi.
1
Kụ́rọ̃ ꞌbã ꞌbá Ịsịrayị́lị̃ drị̂ kí tị pẽjó rĩ
1 Ílí drị̃drị̃ úpí Pásĩyã drị́ Kụ́rọ̃ ꞌbã ũpĩ najó rĩ sĩ, ị́jọ́ ándrá Úpí ꞌbã jọlé nábị̃ Yẽrẽmíyã tị gâsĩ rĩ ní ru idéjó ĩꞌdi ꞌbã kẹ̃jị́ gá, Úpí inga úpí Kụ́rọ̃ ꞌbã ásị́ sĩ ị́jọ́ sĩlé ꞌdĩ jọjó ãzíla awajó la ãngũ Pásĩyã drị̂ agâsĩ pírí wárãgã sĩ.
2 ꞌDĩ ị́jọ́ Kụ́rọ̃ úpí Pásĩyã drị̂ ꞌbã jọlé rĩ ꞌi:
“Úpí, Ãdróŋá ꞌbụ̃ gá rĩ fẽ sụ́rụ́ ụ̃nọ́kụ́ gá ꞌdâ rĩ kí pírí mádrị́ ꞌbo ãzíla pẽ ma Jó Ãdróŋá ị̃nzị̃jó rĩ sịlé ĩꞌdiní Yẹ̃rụ́sãlẹ́mụ̃ gá Yụ́dã gá.
3 ꞌBá Ãdróŋá ãni ĩmi agá ꞌdâ cí rĩ, lẽ ꞌbã nga, ꞌbã mụ Yẹ̃rụ́sãlẹ́mụ̃ gá Yụ́dã gâlé sĩ Jó Úpí ị̃nzị̃jó rĩ sịjó Ãdróŋá Ịsịrayị́lị̃ drị́ uꞌálépi Yẹ̃rụ́sãlẹ́mụ̃ gá rĩ ní. Ãdróŋá ĩmidrị̂ ꞌba adru ĩmi abe.
4 Ãngũ cí ꞌbá Ịsịrayị́lị̃ rú ị́mbị́ acelépi rĩ ꞌbã kí adrujó rĩ gá, lẽ jĩránĩ ĩꞌbadrị̂ ꞌbã fẽ kí ĩꞌbaní sílĩvã kí gólũdĩ be ãzíla ãkónã nalé gẹ̃rị̃ gâsĩ rĩ kî trũ, ãnãkpá ãzíla ídétáŋá fẽtáŋá cénĩ rĩ drị̂ kí abe Jó Ãdróŋá ị̃nzị̃jó Yẹ̃rụ́sãlẹ́mụ̃ gá rĩ nî.”
5 ꞌDã ꞌbã ũngúkú gá, lị́cọ́ ꞌbã drị̃lẹ́ka Yụ́dã drị̂ kí, Bénzãmĩnĩ drị̂ kí, ãtalo ꞌbadrị̂ kí Lẹ́vị̃ drị̂ kí abe ãzíla ꞌbá pírí Ãdróŋá ꞌbã adrujó ásị́ la gá cí rĩ kí abe itú kí dó ru sĩ mụjó Jó Úpí drị́ Yẹ̃rụ́sãlẹ́mụ̃ gá rĩ sịlé.
6 Ĩꞌbã jĩránĩ pírí ko kí dó sĩ kí ãzã sílĩvã sĩ, gólũdĩ sĩ, ãnãkpá kí sĩ, ãkónã nalé gẹ̃rị̃ gâsĩ rĩ kí sĩ ãzíla ãko pírí fẽlé fẽtáŋá cénĩ rĩ rú rĩ kí abe.
7 Úpí Kụ́rọ̃ ají dó ãkójó Jó Úpí ị̃nzị̃jó rĩ agá ándrá Nẹ̃bụ̃kãdị̃nẹ́zã ꞌbã ꞌdụlé Yẹ̃rụ́sãlẹ́mụ̃ gá rá ãzíla ĩꞌdi ꞌbã ꞌbãlé ãdroŋa ĩnzõ rú rĩ ꞌbadrị́ jó gá rĩ kî.
8 Úpí Kụ́rọ̃ Pásĩyã drị̂ fẽ dó ãzị́táŋá Mĩtĩrẽdátĩ séndẽ tãmbalépi rĩ drị́, lã dó sĩ ãkójó ꞌdã kí ꞌbã kãlãfe ãzíla fẽ dó kí úpí Yụ́dã drị̂ ꞌbã ngọ́pị Sẹ̃sị̃bãzárị̃ drị́.
9 ꞌDĩ kí kãlãfe ãkójó ĩꞌdi ꞌbã ãfẽlé rĩ drị̂ kî. Ãkójó gólũdĩ rú rĩ kí kãlị́na, ãkójó sílĩvã rú rĩ kí 1,000, sũfũríyã sílĩvã rú rĩ kí kãlị́ ị̃rị̃,
10 bãkụ́lẹ̃ gólũdĩ rú rĩ kí kãlị́ na, bãkụ́lẹ̃ sílĩvã rú rĩ kí 410 ãzíla ãko ãzí rĩ kí ꞌbã kãlãfe 1,000.
11 Ãkójó gólũdĩ rú ãzíla sílĩvã rú rĩ kí ꞌbã kãlãfe pírí rĩ gá 5,400. Sẹ̃sị̃bãzárị̃ ají dó ãkójó ꞌdĩ kí pírí ĩꞌdi be Yẹ̃rụ́sãlẹ́mụ̃ gá ĩndĩ sáwã ꞌbá ꞌbã kí ãgõjó Bãbụ̃lọ́nị̃ gâlé rĩ sĩ.