Bụ́kụ̃ Yónã drị̂
Bụ́kụ̃ Yónã drị̂ nze ãmaní ị́jọ́ ị́jọ́ sĩ nábị̃ Yónã tị pẽjó Táwụ̃nị̃ ãmbógó Nị̃nẹ́vẹ̃ drị̂ gá rĩ drị̃ gá. Bụ́kụ̃ ꞌdĩ adru bụ́kụ̃ nãbịya ãzí rĩ ꞌbadrị̂ áni ku. Bụ́kụ̃ ꞌdĩ jọ ị́jọ́ ambamba la nábị̃ Yónã ꞌbã drị̃ gá ị́jọ́ ĩꞌdiní ngalé rĩ kí abe adru ị́jọ́ Ãdróŋá drị̂ drị̃ gá ku. Yónã nga ãzị́ ãni rú sáwã 2 Yẽrõbũwámũ rĩ ꞌbã adrujó úpí Ịsịrayị́lị̃ drị̂ rú rĩ sĩ, ꞌdĩ drĩdríŋĩ ílí 800-750 rĩ gá. ꞌBá ũꞌbí ụ̃nị̃táŋá Bĩbĩlíyã drị̂ trũ ụrụgá rĩ nị̃ kí úsĩ bụ́kụ̃ ꞌdĩ ílí íngõ sĩ yã ri ku.
Ãdróŋá pẽ Yónã tị sĩ mụjó ị́jọ́ ũlũjó ꞌbá Nị̃nẹ́vẹ̃ gá rĩ ꞌbaní ị́jọ́ ũnzí ĩꞌbã kí ngalé rĩ kí sĩ. Wó Yónã are Ãdróŋâ tị ku ãzíla fẽ drị̃ mụjó gẹ̃rị̃ ĩꞌdi ãni ndú la gá mụjó Nị̃nẹ́vẹ̃ gá rĩ kẹ̃jị́ gá. (Yónã 1:1-3) Mụ filé mẹ́lị̃ mụlépi Táwụ̃nị̃ ãmbógó Tãrĩsísĩ gá rĩ gá. Mẹ́lị̃ ꞌbã dị agá sĩ mụjó Tãrĩsísĩ gá ꞌdĩ gá ꞌdâ, Ãdróŋá pẽ dó ãlụ́kụ́kụ̃ ãmbógó la tị, ꞌbá mẹ́lị̃ agá ꞌdãá rĩ acá kí dó ụ̃rị̃ sĩ, ꞌbe kí dó Yónã ꞌi ị̃yị́ agá sĩ Ãdróŋá ꞌbã ũmbã ịgbẹjó. ꞌDã ꞌbã ũngúkú gá, Ãdróŋá ãpẽ dó ị̃ꞌbị ãzí ãmbógó la tị sĩ Yónã tijó. Yónã uja dó ásị́ rá ãzíla Ãdróŋá aꞌbe dó ĩꞌdi ídri rú. Ãsị̃jó Yónã mụ dó táwụ̃nị̃ ãmbógó Nị̃nẹ́vẹ̃ drị̂ gá sĩ ị́jọ́ ũlũjó ꞌbá Nị̃nẹ́vẹ̃ gá rĩ ꞌbaní ị́jọ́ ũnzí ĩꞌbadrị̂ kí drị̃ gá rá. ꞌBá Táwụ̃nị̃ Nị̃nẹ́vẹ̃ drị̂ agá rĩ uja kí dó sĩ ásị́ rá. Bụ́kụ̃ Yónã drị̂ amvi trẹ̃yị́ la ị́jọ́ ásị́ ị̃gbẹ̃ Ãdróŋá drị̂ íngõ pí yã rĩ drị̃ gá Yónã drĩ táni lẽ Ãdróŋá ꞌbã adru ásị́ ị̃gbẹ̃ kóru rá tí. (Yónã 4:2)
1
Yónã ꞌbã apájó Úpî sĩ rĩ
1 Ụ́ꞌdụ́ ãlu Úpí jọ ị́jọ́ Yónã Ãmĩtáyĩ ngọ́pị be, jọ ĩꞌdiní,
2 “Ímụ táwụ̃nị̃ ãmbógó Nị̃nẹ́vẹ̃ drị́ ꞌdã gâlé gbõrú ãzíla ílũ ꞌbá ala gá ꞌdã ꞌbaní ị́jọ́ mání mụlé lịlẹ́ kí drị̃ gá rĩ ꞌi, ãꞌdusĩku ándre ị́jọ́ ũnzí ĩꞌbã kí ngalé rĩ rá.”
3 Wó Yónã mvu dó apálé Úpî sĩ rá ãzíla fẽ dó drị̃ mụlé Tãrãsị́sị̃ gâlé ru. Mụ dó ándrá Yópã gá ị̃yị́ tị gâlé ãzíla ịsụ́ dó mẹ́lị̃ mụlépi Tãrãsị́sị̃ gá la. Ũfẽ dó ãjẹ̃ ãcị̃ drị̂ ãzíla fi dó mẹ́lị̃ agá sĩ mụjó ꞌbá ala gá rĩ kí abe Tãrãsị́sị̃ gá sĩ apájó Úpî sĩ.
4 Wó Úpí ãpẽ dó ãlụ́kụ́kụ̃ ãmbógó ũkpó la tị mĩrĩ drị̃ gá, ãlụ́kụ́kụ̃ ũkpó lilépi ꞌdã sĩ mĩrĩ umvú dó tũlá-tũlá lẽ dó sĩ mẹ́lị̃ andilé rá.
5 ꞌBá mẹ́lị̃ agá rĩ acá kí dó ụ̃rị̃ ãmbógó la sĩ ãzíla ꞌbá ãlu ãlu awá dó sĩ ãdróŋá ĩꞌdidrị̂ rụ́. Uꞌbé kí dó tẹ́rị́ mẹ́lị̃ agá rĩ kí mĩrĩ agá sĩ fẽjó la mẹ́lị̃ ꞌba acá dó sĩ ĩpé ru. Wó íni ꞌdĩ Yónã fi dó ꞌbãngá mẹ́lị̃ ꞌa gá vụ̃rụ́lé ãzíla la dó ru ụ́ꞌdụ́ kolé, ụ́ꞌdụ́ ꞌbe dó ĩꞌdi káyĩ rá.
6 Ị́jọ́ ꞌdĩ sĩ mẹ́lị̃ ꞌdị́pị amụ́ dó ãzíla jọ dó ĩꞌdiní, “Mí icó ụ́ꞌdụ́ kolé íngoní ru? Mí angá ụrụgá, mí umve ãdróŋá mídrị̂ ꞌi! Icó nõ vâ sĩ ãma ízákĩzã ndrelé sĩ ãma pajó rá yã áni.”
7 ꞌDã ꞌbã ũngúkú gá, ꞌbá mẹ́lị̃ agá rĩ jọ kí dó ị́jọ́ kí drĩdríŋĩ gá, “Ĩmi amụ́, ãma amụ́ kí jẽgê ꞌbelé, ãma dó sĩ nị̃la ꞌbá drị̃lẹ́ ũnzĩ ꞌdĩ ajílépi ãmaní rĩ ãꞌdi ꞌi yã rĩ.” Ị́jọ́ ꞌdĩ sĩ, ꞌbe kí dó jẽgê ãzíla jẽgê ꞌde dó Yónã drị̃ gá.
8 Ị́jọ́ ꞌdĩ sĩ zị kí dó Yónã ꞌi, “Ílũ ãmaní ãꞌdi fẽ drị̃lẹ́ ũnzĩ ꞌdĩ ní aꞌdé jó ãma drị̃ gá ri nĩ? Mi ãꞌdu ãzị́ nga? Mí ãfũ íngõlé? Sụ́rụ́ mídrị̂ ãꞌdu ãzíla mi ãꞌdu ꞌbá?”
9 Yónã umvi ĩꞌbaní, “Ma ꞌbá Ĩbũrãníyã rú la, ma Úpí ị̃nzị̃, ꞌdĩ Ãdróŋá ꞌbụ̃ gá mĩrĩ kí ꞌbãlépi vũ be rĩ ꞌi.”
10 ꞌDã ꞌbã ũngúkú gá, ꞌbá mẹ́lị̃ agá rĩ acá kí dó ụ̃rị̃ ãmbógó la sĩ ãzíla jọ kí dó sĩ Yónã ní, “Mgbã rĩ gá ị́jọ́ míní idélé íni ꞌdĩ ãꞌdu,” ãꞌdusĩku nị̃ kí rá Yónã la apá agá Úpí sĩ, ãꞌdusĩku lũ ĩꞌbaní rá.
11 Jọ kí dó Yónã ní, “Ãma dó ími idé ãꞌdurú mĩrĩ umvúlépi tũlá-tũlá ị̃dị́-ị̃dị́ ꞌdĩ ꞌbã sĩ icójó pâ tujó ãmaní rá?”
12 Yónã jọ dó ĩꞌbaní, “Ĩꞌdụ ma ꞌbelé mĩrĩ agâlé; mĩrĩ umvúlépi ꞌdĩ la dó sĩ pá tu ĩminí rá, ãꞌdusĩku ánị̃ rá mĩrĩ ꞌdi la ꞌbãngá lú umvú tũlá-tũlá íni la ị́jọ́ mání izalé rĩ sĩ.”
13 Kẹ̃jị́ la gá ꞌbá ꞌdĩ ụ̃ꞌbị̃ kí tí mẹ́lị̃ pẽlé ũkpó sĩ sĩ cajó gọ́rọ̃tị́yọ̃ gâlé, wó icó kí ku ãꞌdusĩku mĩrĩ ꞌbã umvúŋá tũlá-tũlá rĩ ndẽ dó tá drị̃ drị̃ rĩ rá.
14 Ị́jọ́ ꞌdĩ sĩ awá kí dó Úpî drị̃lẹ́ gá ãzíla jọ kí, “Úpí, ífẽ ãma ị̃lị̃kị̃ jõ ãmaní ágọ́bị́ ꞌdĩ ꞌdịjó rĩ sĩ ku. Ílị jõ ị́jọ́ ãma drị̃ gá ãmaní ágọ́bị́ ị́jọ́ kó ru ꞌdĩ ꞌdịjó rĩ sĩ ku fô! Úpí míní rĩ gá mí idé ị́jọ́ kí míní lẽlé rĩ áni.”
15 ꞌDã ꞌbã ũngúkú gá, ꞌdụ kí dó Yónã ꞌbelé mĩrĩ agá ãzíla mĩrĩ tá umvúlépi tũlá-tũlá rĩ tu dó sĩ pá cí.
16 Ị́jọ́ ꞌdĩ sĩ ꞌbá tá mẹ́lị̃ agá ꞌdĩ idé kí dó Úpí ꞌbã ị́jọ́ sĩ ụ̃rị̃ ãmbógó la sĩ, idé kí dó ĩꞌdiní ídétáŋá, na kí dó ũyõ ãzíla ị̃nzị̃ kí dó ĩꞌdi rá.
17 Wó Úpí itú ị̃ꞌbị ãzí ãmbógó la sĩ Yónã tijó, Yónã uꞌá dó sĩ ị̃ꞌbị ꞌdã ꞌa gâlé ụ́ꞌdụ́ na ãzíla ị́nị́ na.