Bụ́kụ̃ Nẽhẽmíyã drị̂
Bụ́kụ̃ Ézĩrã ꞌbadrị́ Nẽhẽmíyã be rĩ nze kí ãmaní úfẽ ándrá ꞌbá Ịsịrayị́lị̃ drị̂ ꞌbaní rụ́kụ̃sã sĩ ru ujajó Ịsịrayị́lị̃ gá sáwã ándrá ĩꞌbã kí agụjó ãtíꞌbó rú Pásĩyã gá ãzíla Bãbụ̃lọ́nị̃ gá rĩ ꞌbã ũngúkú gá rĩ drị̃ gá. Nẽhẽmíyã ri ị́jọ́ ũrãlé ála bõrõ Yẹ̃rụ́sãlẹ́mụ̃ drị̂ sị úꞌdí ru íngoní yã rĩ drị̃ gá. ꞌBá ụ̃nị̃táŋá Bĩbĩlíyã drị̂ trũ ụrụgá rĩ ãtị̃ kí rá Ézĩrã sĩ ãzíla icí bụ́kụ̃ 1 Ị́jọ́ sụ́rụ́ drị́ kí bụ́kụ̃ 2 Ị́jọ́ sụ́rụ́ drị́ be nĩ ãzíla sĩ vâ bụ́kụ̃ Ézĩrã kí Nẽhẽmíyã be nĩ. Ézĩrã drĩ ándrá bụ́kụ̃ ꞌdĩ kí icí nĩ ku yã áni, ꞌbá ãzí ãlu la icí kí nĩ. Ícó bụ́kụ̃ Nẽhẽmíyã drị̂ icílé ãni rú ílí 430 sĩ ꞌdĩ sĩ útị drĩ Yẹ́sụ̃ ku.
Nẽhẽmíyã ĩꞌdi ándrá ꞌbá úpí Pásĩyã drị́ Ãrĩtãsẽrĩsésĩ ní ãkónã fẽlépi mésã sị́ gá rĩ ꞌi. Zị Úpí Ãrĩtãsẽrĩsésĩ ꞌi sĩ ĩꞌdiní rụ́kụ̃sã fẽjó sĩ gõjó vúlé Yẹ̃rụ́sãlẹ́mụ̃ gâlé sĩ ãzãkoma fẽjó bõrõ Yẹ̃rụ́sãlẹ́mụ̃ drị̂ sịjó úꞌdí ru. Úpí Ãrĩtãsẽrĩsésĩ ãꞌị̃ Nẽhẽmíyã ní mụjó ị́jọ́ ꞌdĩ ngajó rá, ꞌdã ꞌbã ũngúkú gá pẽ dó Nẽhẽmíyã adrujó gávũnã Yụ́dã gá rĩ rú, ꞌdĩ ãngũ Yẹ̃rụ́sãlẹ́mụ̃ andre celépi rĩ drị̂ rú 5:14. ꞌBá ãzí drĩ kí ándrá táni ũꞌbĩ Nẽhẽmíyã atrịlé sĩ bõrõ Yẹ̃rụ́sãlẹ́mụ̃ drị̂ sịjó úꞌdí ru ku rá tí, ãzãkoma Ãdróŋá drị̂ sĩ úde ãzị́ bõrõ sịjó rĩ ụ́ꞌdụ́ 52 vúlé gá rá. ꞌDã ꞌbã ũngúkú gá, Ézĩrã ko dó Nẽhẽmíyã ãzã sĩ ꞌbá Ịsịrayị́lị̃ drị̂ kí drị̃ cejó sĩ tị icíma ĩꞌbadrị́ Ãdróŋá be ándrá celépi rá rĩ icíjó úꞌdí ru.
1
Ị́jọ́ Nẽhẽmíyã ꞌbã zịlé rĩ
1 ꞌDĩ kí ị́jọ́ Nẽhẽmíyã Hãkãlíyã ngọ́pị ꞌbã jọlé rĩ kî.
Ílí kãlị́ ị̃rị̃ rĩ ꞌbã ĩmbá Kị́sị̃lẹ̃vụ̃ drị́ mání uꞌájó úpí Ãhãsũwérẽ drị́ko gá Sụ́sã gá ꞌdãá rĩ sĩ,
2 má ádrị́pịka kí ꞌbã ãzí ãlu Hãnánĩ amụ́ kí ãgọbị Yụ́dã gá la kí abe. Kí dó mụ amụ́lé ꞌbo, ázị dó kí ꞌbá Yãhụ́dị̃ rú ándrá acelépi Yụ́dã gá mụlépi ãmị́yọ́ŋá ãngũ gá ku rĩ kí ꞌbã ị́jọ́ sĩ. Ázị vâ kí ị́jọ́ kí acị́ Yẹ̃rụ́sãlẹ́mụ̃ gâlé íngoní yã rĩ kí drị̃ gá.
3 ꞌBá ꞌdĩ jọ kí mání, “ꞌBá Yãhụ́dị̃ rú acelépi Yụ́dã gá ꞌdãá rĩ kí ꞌbá ãgõlépi ãmị́yọ́ŋá ãngũ gá rĩ kí abe ũcõgõ ãmbógó la agá drị̃nzá be ãzíla ꞌbá ãmị́yọ́ŋá ru uꞌálépi kí andre gá rĩ ꞌbã kí dó kí idemará ru. Bõrõ sĩ Yẹ̃rụ́sãlẹ́mụ̃ andre cejó rĩ andi rá ãzíla ívé kẹ̃jị́tị la kí ãcí sĩ rá.”
4 Ma dó mụ ị́jọ́ jọlé ꞌdĩ kí arelé ꞌbo, ári dó vũ gá ãzíla má awá dó mị́ndrẹ sĩ. Má awá ụ́ꞌdụ́ ãzo rú, ágã dó sĩ ãkónã nalé úmgbé ãzíla ázị dó Ãdróŋá ꞌbụ̃ gá rĩ ꞌi.
5 Ájọ dó:
“Úpí Ãdróŋá ꞌbụ̃ gá rĩ, mi ãmbógó ru ãzíla ụ̃sụ̃táŋá ru, mi Ãdróŋá tị icíma mídrị̂ kí tãmbalépi lẽtáŋá mídrị́ ukólépi ku rĩ abe ꞌbá ími lẽlépi ãzíla ãzị́táŋá mídrị̂ kí tãmbalépi rá rĩ ꞌbaní rĩ ꞌi.
6 ꞌBárĩ, mí andré drĩ ãzíla mí are drĩ ãtíꞌbó mídrị̂ ĩꞌdi ꞌbã ími zị agâ ị́nị́ kí ị̃tụ́ be ꞌbá mídrị́ Ịsịrayị́lị̃ rú ꞌdĩ kí ꞌbã ị́jọ́ sĩ fô! Ãma pírí idé kí ị́jọ́ ũnzí ími ụrụꞌbá gá rá. ꞌBá mâ átẹ́pị drị́ lị́cọ́ gá ri kí, ꞌbá mádrị́ lị́cọ́ gá rĩ kí ãzíla ꞌbá pírí Ịsịrayị́lị̃ drị̂ kí abe ãmba ãzị́táŋá mídrị̂ kí tã ku.
7 ꞌEtáŋá ãmadrị́ ími ụrụꞌbá gá rĩ kí ũnzí-ũnzí ãzíla ãmba ãzị́táŋá mídrị̂ kí tã ị́jọ́ míní azịlé ãzíla míní fẽlé ãtíꞌbó mídrị́ Mụ́sã drị́ rĩ kí abe pírí ku.”
8 “Mí agá drĩ ị́jọ́ ándrá míní jọlé ãtíꞌbó mídrị́ Mụ́sã ní, ‘Ĩdrĩ ị́jọ́ mání jọlé ĩminí ꞌdĩ kí vú ũbĩ ku, ma ĩmi iré sụ́rụ́ ãzí kí agá,
9 wó ĩdrĩ ĩmi tị uja má rụ́ ãzíla ĩdrĩ ãzị́táŋá mádrị̂ kí vú ũbĩ rá, ĩdrĩ táni adru ãmị́yọ́ŋá ãngũ gá álị́-álị́ ru, ma ĩmi atrá ãngũ ãlu gá ãzíla ma ĩmi ají ꞌbãlé ãngũ mání pẽlé sĩ rụ́ mádrị̂ ị̃nzị̃jó rĩ gá.’ ”
10 “ꞌDĩ kí ãtiꞌbo ãzíla ꞌbá mídrị́ míní unzelé ũkpõ mídrị́ ãmbógó ãzíla drị́ mídrị́ ũkpó rĩ sĩ rĩ kî.
11 ꞌBárĩ Úpí, lẽ ími bị́lẹ́ ꞌba are ị́jọ́ ãtíꞌbó mídrị̂ ꞌbã zịlé ími tị gá ꞌdĩ ꞌi ãzíla ị́jọ́ ãtiꞌbo mídrị́ lẽlépi ị̃nzị̃táŋá fẽlépi ími rụ́ ní ꞌdĩ ꞌbã kí zịlé ꞌdĩ kí fô! Ífẽ ãtíꞌbó mídrị̂ ꞌbã ịsụ́ ásị́ ị̃gbẹ̃ ãmbógó ĩꞌdidrị̂ drị́ rá fô!”
Ụ́ꞌdụ́ ꞌda kí agá ma ándrá ꞌbá wáyĩnĩ fẽlépi úpí mádrị̂ ní rĩ ꞌi.