Bụ́kụ̃ Nãhụ́mị̃ drị̂
Bụ́kụ̃ Nãhụ́mị̃ drị́ ꞌdĩ jọ ị́jọ́ ị́jọ́ Nãhụ́mị̃ ꞌbã ndrelé urobí agâsĩ ri kí drị̃ gá. Ị́jọ́ Nãhụ́mị̃ ꞌbã jọlé rĩ nze ị́jọ́ ị́jọ́ ũnzí ꞌbá Ãsírĩyã gá rĩ ꞌbadrị̂ kí drị̃ gá. Nãhụ́mị̃ umve sụ́rụ́ ꞌdĩ, “Nị̃nẹ́vẹ̃” ꞌi, táwụ̃nị̃ ãmbógó sụ́rụ́ ꞌdĩ drị́ bĩsírã ngajó rĩ drị̂ ꞌbã rụ́ sĩ. Ãsírĩyã ándrá sụ́rụ́ ãzí ãngũ rụlépi ãzíla ꞌbá Ịsịrayị́lị̃ drị́ wókõ ụ́rụ́ rĩ gá rĩ kí agụlépi ãtíꞌbó rú rĩ ꞌi, ãꞌdusĩku Nãhụ́mị̃ jọ ándrá ị́jọ́ táwụ̃nị̃ ãmbógó Tẹ̃bẹ́sị̃ drị̂ ꞌbã aꞌdéjó rĩ drị̃ gá rá 3:8. Ãma icó nị̃lé la rá Nãhụ́mị̃ ụndrị́ ị́jọ́ sáwã ãzí gá ílí 663 útị drĩ Yẹ́sụ̃ ku rú ꞌdĩ ílí Tẹ̃bẹ́sị̃ ꞌbã aꞌdéjó rĩ gá ãzíla ílí 612 ꞌdĩ sĩ útị drị̃ Yẹ́sụ̃ ku rú ꞌdĩ sáwã Nị̃nẹ́vẹ̃ ꞌbã aꞌdéjó rĩ gá.
Ụ́ꞌdụ́kọ́ tị Nãhụ́mị̃ drị̂ jọ ꞌbá ịsụ́lé ũnzí rĩ Ãdróŋá la ĩꞌdi co ímbátáŋá ru rá. Ãdróŋá drĩ táni ũmbã rụ gbõ rú ku rá tí. Ãdróŋâ ũkpó trũ. Jọ rá Nị̃nẹ́vẹ̃ kí Ãsírĩyã be kí mụ aꞌdélé rá ãzíla ꞌbá ĩꞌbadrị̂ kí ála mụ kí rụlé agụlé mãbụ́sụ̃ rú. ꞌBá Yụ́dã drị̂ ꞌbaní ꞌdã dó bãsĩ ándrá ụ́ꞌdụ́kọ́ tị ãzí ru arelépi múké íni la 1:15.
1
1 Ị́jọ́ jọlé urobí áni táwụ̃nị̃ Nị̃nẹ́vẹ̃ drị̂ drị̃ gá rĩ. ꞌDĩ bụ́kụ̃ ị́jọ́ Nãhụ́mị̃ Ẽlĩkósĩ gó ru rĩ ꞌbã ndrelé rĩ icélépi rĩ.
Ũmbã ꞌbã Úpí najó táwụ̃nị̃ Nị̃nẹ́vẹ̃ sĩ rĩ
2 Úpí ĩꞌdi Ãdróŋá ãjã rú, ãrígọ́tị ũfẽlépi rĩ ꞌi.
Úpí la ãrígọ́tị ũfẽ rá, adrã ga ĩꞌdi agá tré.
Úpí la ãrígọ́tị ũfẽ ꞌbá ãꞌdị́ ꞌdịlépi ĩꞌdi be rĩ kí ụrụꞌbá gá rá,
mbã adrã ĩꞌdidrị̂ ꞌbã tã mẹ́rọ́ꞌbá ĩꞌdidrị̂ ꞌbaní.
3 Úpí rụ ũmbã gbõrú ku ãzíla ĩꞌdi ꞌbã ũkpó ãmbógó ru,
Úpí la drị̃rịma fẽ ꞌbá ị́jọ́ ũnzí ngalépi rĩ ꞌbaní rá.
Gẹ̃rị̃ ĩꞌdiní acị́jó rĩ ĩꞌdi lọ̃bị́yọŋá agâsĩ ãzíla ãlụ́kụ́kụ̃ ũkpó rĩ agâsĩ
ãzíla ị́rị́tị kí pụ́trụ́ ĩꞌdi ꞌbã pá ꞌbã ingalé rĩ kî.
4 Fẽ ãzị́táŋá mĩrĩ ꞌbaní ãzíla ị̃yị́ alagá rĩ nzụ kí rá,
ãzíla ị̃yị́ áꞌbụ agá rĩ nzụ kí ĩndĩ.
Ị̃rẹ́bị́ ámvụ́ Bãsánĩ drị̂ gá rĩ ꞌi kí ásé ꞌbé Kãrị̃mẹ́lị̃ gá rĩ kí abe rá,
ãzíla ife mị̃rị́ Lébãnõnĩ drị̂ agá rĩ ꞌbã ũfũ nụ kí rá.
5 ꞌBé ãmbogo rĩ kí yã ĩꞌdi drị̃lẹ́ gá yã-yã
ãzíla ꞌbé were rĩ kí aká-akâ.
Ụ̃nọ́kụ̂ la yã ĩꞌdi drị̃lẹ́ gá yã-yã,
ụ̃nọ́kụ̂ la yã-yã ãzíla ꞌbá pírí alagá rĩ kí abe.
6 Ãꞌdi icó pá tulé sĩ ũmbã ĩꞌdidrị́ ãcí rĩ drị̃ tẽjó nĩ yã?
Ãꞌdi icó dó ũmbã ĩꞌdidrị́ ãcí áni rĩ talé rá rĩ gá nĩ yã?
Ũmbã ĩꞌdidrị̂ la ve ãcí ru lẹ̃kụ̃lẹ̃kụ̃,
írã kí asi ĩꞌdi drị̃lẹ́ gá trã-trã.
7 Úpí ĩꞌdi múké,
sáwã ũcõgõ drị̂ kí sĩ ma áma zị ĩꞌdi agá.
Ĩꞌdi ꞌbá ásị́ tị̃lépi ĩꞌdi drị̃ gá rĩ kí tãmba nĩ.
8 Wó ị̃yị́ galépi tré rĩ sĩ,
ĩꞌdi mẹ́rọ́ꞌbá ĩꞌdidrị̂ kí ị̃lị̃kị̃ rá,
ĩꞌdi mẹ́rọ́ꞌbá ĩꞌdidrị̂ kí vú adro ãngũ ịnị agâsĩ.
9 Ĩmi ị́jọ́ itú Úpí ụrụꞌbá gá ãꞌdu ị́jọ́ sĩ yã?
Ĩꞌdi ĩmi ị̃lị̃kị̃ rá,
ĩꞌdi ị́jọ́ ĩminí itúlé ĩꞌdi ụrụꞌbá gá rĩ kí atrị pâlé ãlu.
10 Mẹ́rọ́ꞌbá ĩꞌdidrị̂ drĩ kí táni ru ĩcõkã ụ̃cị́kị́ áni,
drĩ kí táni acị́ pãrã-pãrã ꞌbá ĩmẽrãlépi íwá sĩ rĩ kí áni,
ĩꞌdi mụ kí ivélé cécé ásé ãꞌí rĩ ꞌbã vejó rĩ áni.
11 Nị̃nẹ́vẹ̃, ꞌbá ãzí ãlu la ãfũ ími agá ꞌdĩ,
ĩꞌdi ị́jọ́ ũnzí itú Úpí ụrụꞌbá gá
ãzíla ĩꞌdi ꞌbá kí imbá ị́jọ́ ũnzí sĩ.
12 ꞌDĩ ị́jọ́ Úpí ꞌbã jọlé Ịsịrayị́lị̃ ní rĩ ꞌi,
“Drĩ kí táni tị itú ãlu ãzíla drĩ kí táni adru ũꞌbíkákãnã rú tí,
ĩꞌdi kí ụlị́ rá ãzíla ĩꞌdi alị-ãlị̂.
Ádrĩ ándrá táni ĩminí ũcõgõ fẽ agá rá tí,
má icó dó ĩminí ũcõgõ fẽlé ị̃dị́ ku.
13 Ma kị̃lị̃mgbọ̃rọ̃ ꞌbá Ãsírĩyã drị̂ ꞌbã kí gĩlé ĩmi imbe gá sĩ ĩmi ĩkpãjó rĩ kí ũtrũ rá
ãzíla ma ĩbáká ĩꞌbã kí sĩ kí ũgĩjó rĩ kí ụlị́ rá.”
14 ꞌDĩ ãzị́táŋá Úpí ꞌbã fẽlé ꞌbá Ãsírĩyã rú Nị̃nẹ́vẹ̃ gá rĩ ꞌbaní rĩ ꞌi:
“Ĩmi drụ́zị́ adru anzị ĩmi drị̃lẹ́ ru sĩ ĩmi rụ́ ajíjó rĩ kí kóru.
Ma íꞌdá ĩminí idélé ãzíla ãdroŋa ĩminí ũꞌbãlé
jó ĩminí sĩ kí ị̃nzị̃jó ꞌdĩ kí agá ꞌdĩ kí andi rá.
Ma ꞌbụ́ ga sĩ ĩmi ꞌbá Ãsụ́rị̃yã gá ꞌdĩ kí ị̃sị̃jó
ãꞌdusĩku ĩmi ꞌbá ũnzí la kî.”
15 Índre, ꞌbá ị́jọ́ mgbã rĩ ujílépi rĩ
la amụ́ ꞌbé kí drị̃ gâsĩ ꞌdã,
ꞌbá ị́jọ́ ásị́ ị̃gbẹ̃ drị̂ ũlũlépi rĩ ꞌi!
ꞌBá Yụ́dã drị̂, ĩmụ drị̃ gá ụ̃mụ̃ naŋá trũ
ãzíla ĩmba ũyõ ĩminí nalé rĩ kí tã.
ꞌBá ũnzí rĩ icó kí afílé ãngũ ĩmidrị̂ gá ị̃dị́ ku,
ãꞌdusĩku ála kí ị̃lị̃kị̃ kpítã rá.