132
Úpí pẽ Zị̃yọ́nị̃ nĩ
1 Úpí, mí ãvĩjõ ị́jọ́ Dãwụ́dị̃ drị̃ gá ku,
mí ãvĩjõ ị́jọ́ ũcõgõ ĩꞌdiní ịsụ́lé ri kí drị̃ gá pírí ku fô!
2 Úpí, mí igá ị́jọ́ ị́jọ́ ándrá ĩꞌdi ꞌbã azịlé rĩ drị̃ gá,
ũyõ ándrá ĩꞌdi ꞌbã nalé Úpí Ũkpó ꞌDị́pị, Ãdróŋá Yãkóꞌbõ drị̂ní, ĩꞌdi ꞌbã sĩ jọjọ́ la,
3 “Má icó filé jó mádrị̂ agâlé ku,
jõku tụlé gbọ́lọ́ mádrị̂ sị́gá ku,
4 má icó áma mịfị́ kí bĩlé sĩ ụ́ꞌdụ́ kojó ku,
jõku áma ínzókóꞌbí kí akulé cí ku,
5 kpere mání ãngũ ịsụ́ agá sĩ jó sịjó Úpí ní,
ãngũ Úpí Ũkpó ꞌDị́pị, Ãdróŋá Yãkóꞌbõ drị̂ní sĩ uꞌájó rĩ sịjó ráká.”
6 Ĩndre, ãma are Sãndụ́kụ̃ Tị icíma drị̂ ándrá Ĩfũrátã gá;
ãma ịsụ́ dó ĩꞌdi ámvụ́ Yãárĩ drị̂ agá.
7 Ãjọ dó, “Lẽ ãmụ kí jó Úpí drị̂ agâlé;
lẽ ãfẽ kí ị̃nzị̃táŋá úmvúke ĩꞌdidrị̂ drị̃lẹ́ gá!”
8 Úpí, mí angá, ífi ãngũ míní avị́jó rĩ gá,
ífi Sãndụ́kụ̃ Tị icíma drị̂ trũ. Sãndụ́kụ̃ ꞌdĩ ĩꞌdi ícétáŋá ũkpó mídrị́ gá rĩ drị̂ ꞌi.
9 Lẽ ãtalo mídrị̂ ꞌbã nga kí sáwã pírí sĩ ị́jọ́ pịrị rĩ kí;
ãzíla lẽ ꞌbá mídrị́ ãlá rĩ ꞌbã ngo kí úngó ãyĩkõ sĩ.
10 Ị́jọ́ ándrá míní azịlé Ãtíꞌbó mídrị́ Dãwụ́dị̃ ní rĩ ꞌbã ị́jọ́ sĩ,
lẽ mí ãvĩjõ ị́jọ́ úpí míní ãdu ũsũjó drị̃ la gá ꞌbo rĩ drị̃ gá ku.
11 Úpí na ándrá ũyõ sĩ ꞌbání ásị́ tị̃jó drị̃ la gá rá la Dãwụ́dị̃ ní,
ũyõ ándrá ĩꞌdi ꞌbã nalé rĩ icólé ujalé ku la:
Jọ, “Ma mụ ngọ́tị́ŋá ãfũlépi ími ụrụꞌbá gá rĩ
irilé úmvúke mídrị̂ drị̃ gá.
12 Anzị mídrị̂ drĩ kí tị icíma mádrị̂ tãmba rá
ãzíla drĩ kí ị́jọ́ mádrị́ mání icélé ĩꞌbaní rĩ ꞌbã ị̃ndụ́ nze rá,
anzịŋá ĩꞌbadrị̂ kí vâ mụ
adrulé úpí ru ími kẹ̃jị́ gá jãꞌdâ.”
13 Ãꞌdusĩku Úpí pẽ Zị̃yọ́nị̃ nĩ;
lẽ ꞌbã adru ãngũ ĩꞌdiní sĩ uꞌájó rĩ rú:
14 “ꞌDĩ ãngũ mání mụjó avị́jó ala gá jãꞌdâ rĩ ꞌi;
ma mụ uꞌálé ala gá ꞌdâ, ãꞌdusĩku ꞌdĩ ãngũ mání pẽlé rĩ ꞌi.
15 Ma mụ sụ̃sụ́ ãmbógó la wilé táwụ̃nị̃ ꞌdĩ drị̃ gá ãzíla ma ĩꞌdi fẽ adrulé málĩ trũ;
ma mụ ꞌbá ala gá lẽmẽrí ri kí fẽ agalé ãkónã sĩ rá.
16 Ma mụ ãtalo ala gá ri kí tãmbalé;
ꞌbá ãlá ala gá ri kí mụ úngó ngolé ãyĩkõ sĩ.
17 Ma dó mụ ũkpõ Dãwụ́dị̃ drị̂ ịtụ́lé ꞌdãá;
ꞌbá mâni mání sĩ ãdu ũsũjó drị̃ la gá rĩ la dó acá tárã rú ꞌbá mádrị̂ ꞌbaní.
18 Ma mụ mẹ́rọ́ꞌbá ĩꞌdidrị̂ ꞌbaní drị̃nzá fẽlé rá,
wó ĩꞌdi dó mụ adrulé úpí ãzí dị̃zã rú la.”