30
Ãdróŋá zịlé sĩ ãwãꞌdĩfô fẽjó rĩ
1 Ma mụ Úpí ími ịcụ́lé míní áma pajó rĩ sĩ,
ãzíla míní mẹ́rọ́ꞌbá mádrị̂ kí aꞌbejó áma gụjó ku rĩ sĩ.
2 Úpí Ãdróŋá mádrị̂, má umve mi sĩ ãzãkoma aꞌị́jó,
wó mí ãtĩ ma rá.
3 Úpí, mí inga úríndí mádrị̂ angájó ãngũ ꞌbá drãlépi rá rĩ ꞌbadrị̂ agá rĩ sĩ ꞌbo;
ímba áma tã sĩ aꞌdéjó ꞌbụ́ drã drị̂ agá ku.
4 Ĩmi ꞌbá Ãdróŋá drị́ ãlá ꞌdĩ, ĩngo úngó Úpí nî,
ĩmi ịcụ́ rụ́ ĩꞌdidrị́ ãlá rĩ,
5 ãꞌdusĩku ũmbã ĩꞌdidrị̂ la lú uꞌá sáwã were,
wó ásị́ ndrĩŋá ĩꞌdidrị̂ la adru jãꞌdâ.
Áwáŋá drĩ tá ni adru ị́nị́ ãrã rá tí,
wó ụ̃ꞌbụ́tị sĩ ãyĩkõ la adru cí.
6 Mání ĩtrĩkã agá la ma ị́jọ́ kóru, ájọ,
áma ụrụꞌbá icó yãlé ku.
7 Úpí, ími ásị́ ꞌbã ndrĩjó mání ndrĩndrĩ rĩ sĩ,
ífẽ átu pá ũkpó ru ꞌbé áni.
Wó mi mụ ími mẹ́lẹ́tị zị̃lé mâ sĩ ꞌbo,
má acá ũcõgõ sĩ.
8 Ma awá mí rụ́, Úpí,
má aꞌị́ Úpí drị́ ásị́ ị̃gbẹ̃, ájọ:
9 “Mi dó drã mádrị̂ sĩ ãꞌdu ịsụ́
ádrĩ dó fi ꞌbụ́ gâlé ꞌbo rĩ gá?
ꞌBá drãlépi rá rĩ la ími ịcụ́ rá yã?
Ĩꞌdi ị́jọ́ pịrị mídrị́ míní azịlé ãzíla tãmbalé rĩ ũlũ rá yã?
10 Úpí mí are drĩ, ími ásị́ ꞌbã ndrĩ mání ndrĩndrĩ ꞌdộ:
Úpí íko áma ãzã fô!”
11 Mí uja áwáŋá mádrị̂ úngó tuŋá ru,
mí ayụ kõlĩbá áma ụrụꞌbá gá rĩ ꞌbo, íce áma andre ãyĩkõ sĩ,
12 áma ásị́ ꞌbã ngo dó sĩ úngó sĩ ími rụ́ ị̃nzị̃jó, ꞌbã ĩyãŋã tú ku.
Úpí Ãdróŋá mádrị̂, ma ãwãꞌdĩfô fẽ míní jãꞌdâ.