51
Trũtáŋá aꞌị́jó Ãdróŋá drị́
1 Ãdróŋá, mí adru mání ásị́ ị̃gbẹ́ sĩ
lẽtáŋá mídrị́ ukólépi ku rĩ sĩ.
Ásị́ ị̃gbẹ̃ mídrị́ ãmbógó rĩ sĩ
íwụ̃ ị́jọ́ ũnzí mádrị̂ kí rá fô.
2 Mí ũjĩ ị́jọ́ ũnzí mádrị̂ kí pírí
ãzíla íꞌbã ma ãlá ru ị́jọ́ ũnzí mádrị̂ kí sĩ,
3 ãꞌdusĩku ánị̃ ị́jọ́ ũnzí mádrị̂ kí rá,
ãzíla ánị̃ ma sáwã pírí sĩ ị́jọ́ ũnzí idé rĩ gá rá.
4 Ị́jọ́ ũnzí mání idélé rĩ ĩꞌdi lú mírụ́, mírụ́ áꞌdụ̂sĩ
ãzíla má idé ị́jọ́ ũnzí la ími mẹ́lẹ́tị gá.
Ị́jọ́ ꞌdĩ sĩ ị́jọ́ míní lịlé áma drị̃ gá rĩ ĩꞌdi pịrị
ãzíla ị́jọ́ míní uzájó áma drị̃ gá rĩ ĩꞌdi ị́jọ́ mgbã sĩ.
5 Ãndá, útị ma ị́jọ́ ũnzí trũ,
âꞌbã ma mâ ãndrẽ ꞌa gâlé ị́jọ́ ũnzí trũ.
6 Ãndá ãndá ru, ãyĩkõ la ími fụ ị́jọ́ mgbã rĩ ꞌbã adrujó ꞌbá agá cí rĩ sĩ.
Mi mání ũndũwã imbá agá agá ru ásị́ agâlé.
7 Mí ũjĩ ị́jọ́ ũnzí mádrị̂ kí rá, ma dó sĩ adru ãlá ru,
mí ũjĩ ma, ma dó sĩ adru imve rú sí ní ãndânĩ.
8 Ífẽ ãyĩkõ ꞌbã afí áma ásị́ gá ĩdị́,
mí anu ma rá, ífẽ má idé dó drĩ vâ mání ãyĩkõ.
9 Mí ụ̃pị̃ ími mịfị́ kí ị́jọ́ ũnzí mádrị̂ kí sĩ cí fô!
Mí ịnị́ ị́jọ́ ũnzí mádrị̂ kí pírí rá fô!
10 Ãdróŋá, íꞌbã áma agá ásị́ ãlá rĩ ꞌi,
mí uja úríndí pịrị rĩ áma agá úꞌdí ru.
11 Ídro ma ími drị̃lẹ́ gá ꞌdâ ku fô!
Íꞌdụ Úríndí mídrị́ Ãlá rĩ má rụ́ ꞌdâ ku.
12 Ífẽ mání ãyĩkõ patáŋá mídrị̂ drị̂ ĩdị́,
mí inga áma ásị́ sĩ ị́jọ́ mídrị̂ kí ị̃nzị̃jó.
13 ꞌDã ꞌbã ũngúkú gá, ma dó mụ ꞌbá ũnzí rĩ kí imbálé ãzị́táŋá mídrị̂ kí sĩ,
ãzíla ꞌbá ũnzí ꞌdĩ kí dó sĩ ru uja vúlé mí rụ́ ꞌdõlé.
14 Ãdróŋá, ítrũ ma mání ãrí asujó rĩ sĩ,
Ãdróŋá áma palépi rĩ,
ma dó sĩ mụ úngó ngolé ụ́ꞌdụ́kọ́ ụrụgá sĩ ị́jọ́ mgbã mídrị̂ iꞌdajó.
15 Úpí ínzị̃ áma tị,
ma dó sĩ ími ịcụ́ benĩ.
16 Ma tá icó míní ídétáŋá idélé rá, wó fẽ kí míní ãyĩkõ ku,
mí uꞌá ãyĩkõ sĩ ídétáŋá ivélé ivé ivê rĩ kí sĩ ku.
17 Ídétáŋá míní ãyĩkõ fẽlépi rá rĩ ĩꞌdi ásị́ nũlépi rá rĩ i;
Ãdróŋá, mí icó ásị́ nũlépi rá rĩ gãlé ásị́ ujaŋá ꞌbe ku.
18 Ãdróŋá, mí iꞌda ásí ị̃gbẹ́ Zị̃yọ́nị̃ ní ãzíla íko ĩꞌdi ãzã;
ísị bõrõ Yẹ̃rụ́sãlẹ́mụ̃ drị̂ kí úꞌdí ru;
19 ꞌdã ꞌbã ũngúkú gá mi dó sĩ uꞌá ãyĩkõ sĩ ídétáŋá idélé pịrị rĩ kî sĩ,
ídétáŋá ivélé ivé ivê rĩ kí ídétáŋá sĩ ãnãkpá ivéjó pírí rĩ be.
ꞌDã ꞌbã ũngúkú gá, ála dó mụ mọ́nị̃gọ́ kí ivélé ãlĩtárĩ mídrị̂ drị̃ gá.