57
Ãzãkoma aꞌị́jó Ãdróŋá drị́
1 Ãdróŋá, ími ásị́ ꞌbã adru mání ị̃gbẹ́ ru, ími ásị́ ꞌbã adru mání ị̃gbẹ́ ru,
ãꞌdusĩku áma ídri la ru zị̃ ími agá.
Ma áma zị̃ ími ụ́pụ́pị́ ꞌbã índríléndri gá kpere lị́kị̃ ꞌbã alị agá.
2 Ma awá Ãdróŋá Ụrụgá Ãndânĩ rĩ rụ́,
Ãdróŋá ãko mání lẽlé ri kí fẽlépi pírí rá rĩ rụ́.
3 Ĩꞌdi mání ãzãkoma fẽ angájó ꞌbụ̃ gá sĩ áma pajó;
ĩꞌdi ꞌbá áma ĩkpãlé pi rĩ kí ndẽ rá.
Ãdróŋá la mání lẽtáŋá ĩꞌdidrị́ ukólépi ku rĩ iꞌda ị́jọ́ mgbã ĩꞌdidrị̂ be rá.
4 Ídri mádrị̂ ĩꞌdi kẹ̃mị̃ kí drĩdríŋĩ gá;
ála ma ꞌbá lẽlépi áma ꞌdịlépi rĩ kí drĩdríŋĩ gá,
sị́ la ci kí cécé ãjụ́ ãzíla ꞌé drị̂ áni;
ĩdra la kí ãcí ru cécé ménéŋá áni.
5 Ãdróŋá, înga ími rụ́ ꞌbã alị ꞌbụ̃ drị̃ gâsĩ rá!
Dị̃zã mídrị̂ ꞌbã adru ụ̃nọ́kụ́ drị̃ gá ꞌdâ pírí!
6 Mẹ́rọ́ꞌbá mádrị̂ ꞌbe kí mání imbá sĩ áma rụjó;
ũcõgõ mádrị̂ ndẽ dó ma rá.
Ga kí ꞌbụ́ mgbi gẹ̃rị̃ mání acị́jó rĩ gâsĩ,
wó kí vúŋá uja vâ aꞌdélé ala gá nĩ.
7 Ãdróŋá, átị̃ ásị́ ími drị̃ gá,
áma ásị́ ũkpó ru mî sĩ,
ị́jọ́ ꞌdĩ sĩ, mã dó mụ ími rụ́ ungolé ãzíla ịcụ́lé!
8 Úríndí mádrị̂, mí ángá ụrụgá!
Mí angá ãngũ sãrã sĩ
ãꞌdụ́ngụ́ colé ụ̃ꞌdị́ be.
9 Úpí, ma ími rụ́ ịcụ́ sụ́rụ́ kí drĩdríŋĩ gá.
Ma úngó ungo ími rụ́ ịcụ́jó ꞌbá pírí kí drĩdríŋĩ gá,
10 ãꞌdusĩku lẽtáŋá mídrị́ ukólépi ku rĩ ca kpere ꞌbụ̃ gâlé;
ị́jọ́ mgbã mídrị̂ ca kpere ꞌbụ̃ gâlé.
11 Ãdróŋá, înga ími rụ́ ꞌbã alị ꞌbụ̃ drị̃ gâsĩ rá!
Dị̃zã mídrị̂ ꞌbã adru ụ̃nọ́kụ́ drị̃ gá ꞌdâ pírí!