60
Ãzãkoma zịjó Ãdróŋá tị gá mẹ́rọ́ꞌbá kí ị́jọ́ sĩ
1 Ãdróŋá, ígã dó ãma úmgbé ãzíla mí iré dó ãma kpékpé;
ídrĩ táni adru ãmaní ũmbã sĩ rá tí, mí uja drĩ mi ãmarụ́ ꞌdõlé fô!
2 Ífẽ vũ ãmadrị̂ ní ru ayajó aya-ayâ; ãzíla ínzị̃ tị la mgbọ rú;
íkụ̃ ãngũ ru tị nzị̃lépi rĩ kí cí ĩꞌdi ꞌbã ru asujó asu asû rĩ sĩ.
3 Ífẽ ꞌbá mídrị̂ ꞌbaní drị̃cịlé ũnzí-ũnzí ꞌbo;
mí ịmvụ́ ãma ũmbã mídrị̂ sĩ rá, ãma dó sĩ acị́ cécé ãmvụ ꞌbã rĩ íwá rĩ áni.
4 Íli ꞌbá ími ị̃nzị̃lépi rĩ kí bị́lẹ́ ị̃ndụ́ ꞌbo,
ị́jọ́ ꞌdĩ sĩ, kí dó sĩ apá ru zị̃lé ala gá lị́kị̃ amụ́lépi rĩ sĩ.
5 Ípa ãma ãzíla íko ãma ãzã ũkpó mídrị̂ sĩ; mí umvi zịtáŋá ãmadrị̂ kî,
ị́jọ́ ꞌdĩ sĩ ꞌbá mî ãni míní lẽlé ri kí dó sĩ patáŋá ịsụ́.
6 Ãdróŋá ajọ́ ị́jọ́ angájó jó ĩꞌdidrị́ ãlá rĩ agâlé,
“Ma adru ãyĩkõ sĩ mání táwụ̃nị̃ Sẹ̃kẹ́mụ̃ drị̂ ꞌbã lõkókõrí ꞌbãjó rĩ sĩ
ãzíla ma áꞌbụ ꞌa Sụ̃kọ́tị̃ drị̂ awa ꞌbá mádrị̂ ꞌbanî.
7 Ãngũ Gị̃lẹ́dị̃ drị̂ kí Mãnásẽ drị̂ be má ãni;
Ãsĩkárĩ mádrị́ ásị́ ũkpó rĩ kí mụ ãfũlé Ịfụrayị́mụ̃ gá ãzíla ũpi mádrị̂ kí mụ ãfũlé Yụ́dã gá.
8 Mụ̃wábụ̃ la mụ acálé ãtíꞌbó mádrị́ vụ̃rụ́lé rĩ rú,
ãzíla Ídõmũ la mụ adrulé ãtíꞌbó mádrị̂ ꞌi.
Mã mụ uzálé ụ́ꞌdụ́kọ́ re sĩ mání Fị̃lị̃sị̃tị́yã ndẽjó rĩ sĩ.”
9 Ãdróŋá, ãꞌdi la dó mání áma agụ táwụ̃nị̃ andre celé bõrõ sĩ rĩ gá nĩ yã?
Ãꞌdi la mání áma drị̃ ꞌde mụjó ãꞌdị́gá sĩ táwụ̃nị̃ Ídõmũ ndẽjó nĩ yã?
10 Ãdróŋá, ãndá-ãndá ru ígã dó ãma úmgbé yã?
Mí icó dó mụlé ãꞌdị́gá ãsĩkárĩ ãmadrị̂ kí abe ku yã?
11 Íko ãma ãzã mẹ́rọ́ꞌbá kí ị́jọ́ sĩ,
ãꞌdusĩku ãzãkoma angálépi ꞌbá ꞌbá ru rĩ drị́ rĩ ĩꞌdi ãzị̂kó ru.
12 Ũkpõ Ãdróŋá drị̂ sĩ, ãma ãꞌdị́ ndẽ rá;
ãꞌdusĩku ĩꞌdi mẹ́rọ́ꞌbá ãmadrị̂ kí atu pá sĩ vũ gá.