95
Úngó sĩ Ãdróŋâ ịcụ́jó rĩ
1 Ĩmi amụ́, ãma amụ́ kí úngó ngolé Úpí, nî;
ãngo kí úngó ụ́ꞌdụ́kọ́ ụrụgá sĩ Ãdróŋá ãma tãmbalépi rĩ nî.
2 Ãma amụ́ kí ĩꞌdi drị̃lẹ́ gá ãwãꞌdĩfô fẽŋá trũ
ãzíla ãngo kí úngó ụ́ꞌdụ́kọ́ ụrụgá sĩ sĩ ĩꞌdi rụ́ ịcụ́jó.
3 Ãꞌdusĩku Úpí ĩꞌdi Ãdróŋá ãmbógó rĩ ꞌi,
ãzíla ĩꞌdi úpí ãmbógó ãdroŋa pírí kí drị̃lẹ́ gá rĩ ꞌi.
4 Rụ ụ̃nọ́kụ̂ pírí ĩꞌdidrị́ alé gá,
iꞌdójó ụ̃jị́gọ́ mgbi rĩ kí agá cajó kpere ꞌbé drị̃ mbílí rĩ kí agá.
5 Mĩrĩ pírí kí Úpí ãni ãꞌdusĩku idé kí nĩ,
ãzíla drị́ ĩꞌdidrị̂ ídé ãngũ ãꞌí rĩ kí nĩ.
6 Ĩmi amụ́, ãma ãvụ̃ kí vụ̃rụ́ sĩ ĩꞌdi ị̃nzị̃jó,
ãtị̃ kí ãja Úpí ãma ꞌbãlépi rĩ drị̃lẹ́ gá,
7 ãꞌdusĩku ĩꞌdi Ãdróŋá ãmadrị̂ ꞌi,
ãzíla ãma ꞌbá ĩꞌdiní tã mbalé rĩ kî,
kãbĩlõ ĩꞌdiní ucélé rĩ kî.
Ĩmi are ãndrũ ị́jọ́ ĩꞌdi ꞌbã jọlé rĩ,
8 Ĩmi ásị́ ꞌbã mba cécé ándrá ĩmĩ áyị́pịka kí ꞌbã ásị́ ꞌbã mbajó Mẹ̃rị́bã gá rĩ ani ku,
cécé ĩꞌbaní idélé ãngũ kõtórõ rú Másã gá rĩ áni ku.
9 Ĩmĩ áyị́pịka ụ̃ꞌbị̃ kí ándrá áma ásị́ rá,
drĩ ándrá táni ị́jọ́ pírí mání idélé rĩ kí ndre agá rá tị.
10 Ị́jọ́ ꞌdĩ sĩ má uꞌá ándrá ꞌbá ílí ꞌdã agá rĩ ꞌbaní ũmbã sĩ ílí kãlị́ sụ́,
ãzíla ájọ ĩꞌbaní, “ꞌBá ꞌdĩ uja kí tị márụ́ ꞌdâ bụ́lụ́ gá,
gã kí ị́jọ́ mání jọlé ĩꞌbaní rĩ kí ngalé úmgbé”
11 Ị́jọ́ ꞌdĩ sĩ ũmbã mádrị̂ sĩ ána ũyõ,
“Ícó kí filé ãngũ mádrị́ sĩ avị́jó rĩ gálé ku.”