23
Ị́jọ́ Dãwụ́dị̃ ꞌbã jọlé ãsị̃jọ́ rĩ kî
1 ꞌDĩ kí ị́jọ́ Dãwụ́dị̃ ꞌbã jọlé ãsị̃jó rĩ kî:
“Ị́jọ́ Dãwụ́dị̃ Yésẽ ngọ́pị ꞌbã jọlé rĩ,
ị́jọ́ ágọ́bị́ Ãdróŋá Ụrụgá ãndânĩ rĩ ꞌbã ingalé ụrụgá rĩ ꞌbã jọlé rĩ,
ágọ́bị́ Ãdróŋá Yãkóꞌbõ drị̂ ꞌbã sĩ ãdu ũsũjó drị̃ la gá rĩ,
ꞌbá úngó Ịsịrayị́lị̃ drị̂ kí ngolépi rĩ.”
2 “Úríndí Úpí drị̂ jọ ị́jọ́ márụ̂ sĩ,
ụ́ꞌdụ́kọ́ ĩꞌdidrị̂ ándrá áma tị gá.
3 Ãdróŋá Ịsịrayị́lị̃ drị̂ jọ ị́jọ́,
ꞌBá Ịsịrayị́lị̃ tãmbalépi rĩ jọ mání:
Drị̃lẹ́ drĩ ꞌbá kí drị̃ ce gẹ̃rị̃ pịrị rĩ sĩ,
drĩ kí drị̃ ce ụ̃rị̃ Ãdróŋá drị̂ trũ,
4 ĩꞌdi cécé dị̃zã ãngũ jilépi ụ̃ꞌbụ́tị sĩ sáwã ị̃tụ̂ ꞌbã agájó rĩ sĩ rĩ áni,
Ụ̃ꞌbụ́tị ulepete ụ̃rụ́ꞌbụ̃ kóru
cécé ãngũ alị́lépi uzogó vúlé gá rĩ áni,
fẽlépi la ásé ní sĩ adụ́jó vũ rụ́ lé rĩ.”
5 “Ãdróŋá pẽ lị́cọ́ mádrị̂ nĩ,
ãꞌdusĩku idé tị icíma má be jãꞌdâ rĩ ꞌbo,
mba áma tã, ụ̃tị̃ ãzíla itú ị́jọ́ mádrị̂ kí wókõ pírí sĩ!
Fẽ patáŋá mádrị̂ ní ífí kalé
ãzíla fẽ ị́jọ́ áma ásị́ ꞌbã lẽlé rĩ kí rá.
6 Ála ꞌbá ị́jọ́ ũnzí ngalépi rĩ kí ꞌbe ásé gá cécé ụ̃cị́kị́ ꞌbejó rĩ áni,
ãꞌdusĩku kí ꞌbá drị́ ũsõ-ũsõ.
7 ꞌBá ụ̃cị́kị́ galépi rĩ lẽ
ꞌba ayú ãko ãzí idélé aya sĩ la jõku ãjụ́ ꞌbã sị́,
ála dó sĩ kí ivé ãcí sĩ rúmú-rúmú ãngũ ĩꞌbã kí sĩ adrujó rĩ gá.”
Ãsĩkárĩ Dãwụ́dị̃ drị́ ũkpó rĩ kî
8 ꞌDĩ kí ãsĩkárĩ Dãwụ́dị̃ drị́ rụ́ kụlépi ambamba rĩ kî: Yõsébũ Bãsẹ̃bẹ̃hẹ́tị̃ Tãkẹ̃mọ́nị̃ gó ru rĩ ꞌi. Ĩꞌdi ándrá drị̃lẹ́ ãsĩkárĩ Dãwụ́dị̃ drị́ na rụ́ kụlépi ãndânĩ rĩ ꞌbadrị̂ ꞌi. ꞌDị ándrá ãꞌdị́ ãsĩkárĩ 800 kí abe, ãzíla ụꞌdị́ kí pírí ãꞌdị́ ãlu ꞌdã gá.
9 ꞌBá ĩꞌdi ũngúkú gá ãni rú rĩ ĩꞌdi ándrá Ị̃lị̃yãzárị̃ Dõdáyĩ ngọ́pị Ãhóhĩ gó ru rĩ ꞌi. Ụ́ꞌdụ́ ãzí sĩ Ị̃lị̃yãzárị̃ icí kí ru Dãwụ́dị̃ be sĩ ãꞌdị ꞌdịjó ꞌbá Fị̃lị̃sị̃tị́nị̃ drị̂ kí abe ịsụ́ ꞌdĩ sĩ Ãsĩkárĩ Ịsịrayị́lị̃ drị̂ ꞌbã ãndãkã apá kí rá.
10 Ĩlĩyãzárĩ angá ãzíla ũsõ dó ꞌbá Fị̃lị̃sị̃tị́nị̃ drị̂ kí kpere ĩꞌdi ꞌbã drị́ ní ũrõ agá ãzíla drị́ la ĩbĩ dó sĩ ru ménéŋá ụrụꞌbá gá, ménéŋâ icó dó sĩ ru anzé lé ku. Úpí fẽ dó sĩ ĩꞌdiní ãꞌdị́ ãzí ãmbógó la ndẽlé ụ́ꞌdụ́ ꞌdã sĩ nĩ. Ãsĩkárĩ ãgõ kí dó sĩ lú Ĩlĩyãzárĩ rụ́ ꞌdõlé amụ́lé ãko ĩꞌbadrị́ ãꞌdị́drị̂ kí ũtrũlé.
11 Ãsĩkárĩ ãmbógó rụ́ kụlépi Ĩlĩyãzárĩ ũngúkú gâsĩ rĩ ĩꞌdi Sãmáhĩ Ágĩ Hárã gó ru rĩ ꞌbã ngọ́pị ꞌi. ꞌBá Fị̃lị̃sị̃tị́nị̃ drị̂ tra kí dó ándrá ru ãngũ ãlu gá Léhĩ gá, ꞌdĩ ãngũ ándrá ámvụ́ ru adrulépi úsú trũ wẽwẽ rú rĩ gá, wó ãsĩkárĩ Ịsịrayị́lị̃ drị̂ uja kí apálé ꞌbá Fị̃lị̃sị̃tị́nị̃ drị̂ kí sĩ rá.
12 Wó Sámã sõ dó pátrákã ámvụ̂ ꞌbã ágágá ꞌdãá, ụtrị́ ĩꞌdi ãzíla ũsõ dó sĩ ꞌbá Fị̃lị̃sị̃tị́nị̃ drị̂ kí vũ gá. Úpí fẽ dó sĩ ĩꞌbaní ãꞌdị́ ãmbógó la ndẽlé rá.
13 Sáwã sĩ ãkónã trajó ámvụ́ agá rĩ sĩ, ꞌbá na ãmbogo kãlị́ na kí ĩsélé gá rĩ amụ́ kí Dãwụ́dị̃ rụ́ ụ̃jị́gọ́ ãni rú táwụ̃nị̃ Ãdũlámũ drị̂ gá, ịsụ́ íni ꞌdĩ ãsĩkárĩ Fị̃lị̃sị̃tị́nị̃ drị̂ tra kí dó ru áꞌbụ Rẹ̃fãyị́mụ̃ drị̂ gá.
14 Sáwã ꞌdã sĩ Dãwụ́dị̃ ri adrulé ámvụ́ andre celé Bõrõ sĩ cí la gá ãzíla ꞌbá Fị̃lị̃sị̃tị́nị̃ drị́ ru tralépi ãngũ ãlu gá la ri kí adrulé Bẹ̃tẹ̃lẹ̃hẹ́mụ̃ gá ꞌdãá.
15 Ị̃yị́ vị́ ndẽ dó Dãwụ́dị̃ rá ãzíla jọ dó, “ꞌBá ãzí drĩ tá mụ mání ị̃yị́ ãbĩlé mvụlé kídí kẹ̃jị́tị sĩ fijó Bẹ̃tẹ̃lẹ̃hẹ́mụ̃ gá rĩ ꞌbã andre gá la tá múké!”
16 Ãsĩkárĩ ãmbogo rụ́ kụlépi kụ-kụ̃ rĩ alị kí dó ꞌbá Fị̃lị̃sị̃tị́nị̃ drị̂ kí agâsĩ, ãbĩ kí dó ị̃yị́ kídí kẹ̃jị́tị sĩ fijó Bẹ̃tẹ̃lẹ̃hẹ́mụ̃ gá rĩ ꞌbã andre gá rĩ agụlé Dãwụ́dị̃ ní. Wó Dãwụ́dị̃ gã ị̃yị̂ mvụlé úmgbé; uja rá la ĩꞌdi sũlé vũ rụ́ Úpí ní ídétáŋá ru.
17 Jọ, “Úpí, má icó ị́jọ́ ꞌdĩ ngalé ku. Má icó ãrí ꞌbá ru ídri fẽlépi drãní sĩ mụjó ị̃yị́ ꞌdĩ ãbĩjó rĩ ꞌbadrị̂ mvụlé ku.” Ị́jọ́ ꞌdĩ sĩ Dãwụ́dị̃ gã dó sĩ ị̃yị̂ mvụlé úmgbé. ꞌDĩ kí ị́jọ́ ãsĩkárĩ drị̃lẹ́ na rụ́ kụlépi kụ̃kụ̃ rĩ ꞌbã kí ngalé rĩ kî.
18 Ãbĩsáyĩ Yõwábũ ꞌbã ádrị́pị Zẹ̃rụ̃yị́yã ngọ́pị ĩꞌdi ándrá drị̃lẹ́ ru ãsĩkárĩ kãlị́na kí drị̃lẹ́ gá. ꞌDị ãꞌdị́ ãjụ́ sĩ ãsĩkárĩ 300 kí abe, ụꞌdị́ kí rá, acá dó sĩ ãsĩkárĩ na drị̃lẹ́ ru rụ́ kụlépi kụ̃kụ̃ ri kí ꞌbã ãzí ru.
19 Ĩꞌdi ándrá ꞌbá rụ́ kụlépi ãsĩkárĩ kãlị́na ꞌdã kí agá ãndânĩ rĩ ꞌi, wó rụ́ kụŋá ĩꞌdidrị̂ ca ándrá drị̃lẹ́ na ꞌdã ꞌbadrị̂ gá ku.
20 Bẽnãyíyã Yẽhõyídã ngọ́pị ĩꞌdi ándrá ãsĩkárĩ ãzí ásị́ ũkpó ụ̃rị̃ kọ́lị angájó Kãbị̃zẹ́lị̃ gá la, ꞌdị ãꞌdị́ ãzí ãmbógó la, alagá ꞌdị ꞌbá ãzí Mụ̃wábụ̃ rú kẹ́jẹ́ŋị́ ru la kí ị̃rị̃. Ụ́ꞌdụ́ ãzí sĩ, fi ãzíla ụꞌdị́ ãsĩkárĩ ị̃rị̃ ãꞌdị́ sĩ ndẽlépi nĩ rĩ kí rá. Ụ́ꞌdụ́ ãzí rĩ sí dro vâ kẹ̃mị̃ kpere ꞌbụ́ gá, ꞌdĩ ụ́ꞌdụ́ ũfú ꞌbã sĩ ꞌdejó la sĩ ãzíla ꞌdị ĩꞌdi rá.
21 ꞌDị vâ ãsĩkárĩ Mị̃sị́rị̃ gó ru ãmbógó la ịsụ́ íni ꞌdĩ ãsĩkárĩ ꞌdã ãjụ́ trũ drị́ gá. Wó Bẽnãyíyã ayú ife sĩ ãꞌdị́ ꞌdịjó ĩꞌdi be. Apá dó ãjụ̂ ãsĩkárĩ Mị̃sị́rị̃ gó ru ꞌdã drị́ gâlé rá, ꞌdị dó sĩ ĩꞌdi ãjụ́ ĩꞌdidrị̂ ꞌbã vúŋá sĩ.
22 Ị́jọ́ Bẽnãyíyã Yẽhõyídã ngọ́pị ꞌbã ngalé ꞌdĩ ají ĩꞌdiní rụ́ kụma ãmbogo ãzí na rụ́ kụlépi kụ̃kụ̃ rĩ ꞌbadrị̂ áni.
23 Úfẽ ándrá dó sĩ ĩꞌdiní ãrútáŋá ꞌbá ãzí kãlị́na rĩ ꞌbaní ãndânĩ, wó ãrútáŋá ĩꞌdiní ịsụ́lé rĩ ca ꞌbá ãzí na ꞌdã ꞌbadrị̂ gá ku. Wó Dãwụ́dị̃ ꞌbã dó ĩꞌdi ãsĩkárĩ ãmbógó ꞌî andre tẽlépi rĩ rú.
24 ꞌBá ándrá kãlị́na ꞌdã kí agá ĩndĩ rĩ kí:
Ãsãhẹ́lị̃ Yõwábũ ꞌbã ádrị́pị ꞌi,
Ĩlĩhãnánĩ Dọ́dọ́ ꞌbã ngọ́pị angájó Bẹ̃tẹ̃lẹ̃hẹ́mụ̃ gá,
25 Sámã Hãrọ́dị̃ gó ru rĩ kí
Élĩkã Hãrọ́dị̃ gó ru rĩ be,
26 Hẽlézĩ Pẽlónĩ gó ru rĩ ꞌi,
Írã Ị̃kẹ́sị̃ ngọ́pị angájó Tẽkówã gá,
27 Ãbị̃yẹ̃zẹ́rị̃ angálépi Ãnãtọ́tị̃ gá rĩ ꞌi,
Mẽbụ̃náyĩ Hụ̃sị̃ gó ru rĩ ꞌi,
28 Zãlị̃mọ́nị̃ Ãhóhĩ gó ru rĩ ꞌi,
Mãhãráyĩ Nẽtõfátĩ gó ru rĩ ꞌi,
29 Hẽlébũ Bãánã Nẽtõfátĩ ngọ́pị ꞌi,
Ĩtáyĩ Rĩbáyĩ Gị̃bẹ́yã gá rĩ ꞌbã ngọ́pị ꞌbá Bénzãmĩnĩ gá rĩ ꞌbadrị̂ ꞌi,
30 Bẽnãyíyã angálépi Pĩrãtónĩ gá rĩ ꞌi,
Hĩdáyĩ angálépi áꞌbụ Gásĩ gá rĩ ꞌi,
31 Ãbĩ-ãlĩbónĩ angálépi Ãrábã gá rĩ ꞌi,
Ãzị̃mãvẹ́tị̃ angálépi Bãhụ̃rị́mụ̃ gá rĩ ꞌi,
32 Ẽlĩhábã Sãlĩbõnĩ gó ru rĩ ꞌi,
anzị Yãsénĩ drị̂ kí, Yónãtãnĩ
33 Sámã Hãrárĩ gó ru rĩ ꞌbã ngọ́pị ꞌi,
Ãhĩyámũ Sárã Hãrárí gó ru rĩ ꞌbã ngọ́pị ꞌi,
34 Ẽlĩfẽlétĩ Ãhãsĩbáyĩ Mãákã gá rĩ ꞌbã ngọ́pị ꞌi,
Ẽlĩyámũ Ãhị̃tọ̃fẹ́lị̃ Gị̃lọ́tị̃ gó ru rĩ ꞌbã ngọ́pị ꞌi,
35 Hézĩrõ Kãmẹ́lị̃ gá rĩ,
Pãrárĩ Ãrị́bã gó ru rĩ ꞌi,
36 Ĩgálĩ Nátãnĩ Zóbã gá rĩ ꞌbã ngọ́pị ꞌi,
Hágĩrĩ ngọ́pị ꞌi,
37 Zẽlékĩ Ãmọ́nị̃ gó ru rĩ ꞌi,
Nãhãráyĩ Bẹ̃rọ́tị̃ gó ru rĩ ꞌi, ꞌbá ãko ãꞌdị́ drị́ Yõwábũ Zẹ̃rụ̃yị́yã ngọ́pị drị̂ kí ujílépi rĩ ꞌi,
38 Írã Ĩtírĩ gó ru rĩ ꞌi,
Gãrébũ Ĩtírĩ gó ru rĩ ꞌi,
39 Ụ̃rị́yã Hị́tị̃ gó ru rĩ trũ.
Kí pírí rĩ gá ãsĩkárĩ kãlị́ na drĩ ázị̂rị̃.