56
Resruok mar ogendini mamoko
1 Ma e gima Jehova Nyasaye wacho:
“Ngʼaduru bura makare
kendo utim gima kare,
nikech warruokna osekayo machiegni
kendo timna makare chiegni fwenyore.
2 Ogwedh ngʼat matimo ma,
mangʼado bura makare kendo ngʼatno marito chiengʼ Sabato ka ok odwanye,
kendo ok oyie lwete mulo gik mogak.”
3 Kik ngʼat ma japiny moro
moseyie kuom Jehova Nyasaye wachi ni,
“Jehova Nyasaye biro kweda e kind ogandane adier.”
Kendo ngʼato angʼata mabwoch kik wachi ni,
“An mana ka yien motwo.”
4 Nimar ma e gima Jehova Nyasaye wacho:
“Joma bwoch, morito Sabato mara,
mayiero timo gima miya mor,
kendo morito singruokna,
5 ei hekalu mara, anami nying-gi bedo rapar
moloyo bedo gi yawuowi kod nyiri;
bende anamigi nying ma ok norum nyaka chiengʼ.
6 Kendo jopinje mamoko mane oseyie kuom
Jehova Nyasaye katiyone kohero nyinge, kendo kalame,
jogo duto marito chiengʼ
Sabato ma ok odwanye kendo morito singruokna,
7 gin duto anakelgi e goda maler
mi anamigi mor e oda mar lamo.
Chiwo mag-gi mag misengini miwangʼo pep kod misengini mamoko
nayiego e kendona mar misango;
kendo oda noluongi ni od lamo mar ogendini duto.”
8 Jehova Nyasaye Manyalo Gik Moko
Duto ma en Jal ma choko jo-Israel duto,
mane oter e twech wacho niya,
“Pod abiro choko jomoko makel irgi,
kaweyo mago mosechoki.”
Nyasaye ngʼado bura ne joricho
9 Biuru un le manie thim,
biuru mondo utiek gik moko un le mag bungu duto!
10 Jorito mag Israel muofni,
giduto gionge rieko;
gichalo mana gi guogi mamuol,
ma ok nyal giyo;
kendo riere piny mi lek, nikech gihero nindo.
11 Gin guogi ma dhogi mit kendo ok giyiengʼ.
Gin jokwath maonge winjo;
giduto gibaro ka giluwo yoregi giwegi,
kendo moro ka moro dwaro gima kelone ohala ne en owuon.
12 Giwacho e kindgi giwegi ni,
“Biuru mondo wakaw divai!
Wamadhuru kongʼo mi wamer!
Kendo kiny nochal mana gi kawuono,
to bende onyalo bedo maber moloyo.”