KLOAJYA
Wargahng Agweed Poale Yihr Yaa Kloajya
Rob Ke Nying Warga
Warga gihn ni anaa agweed Poale ke yihr yaa akuud yiiho giih geen Kloajya e nii piny Aacya. Padh Poal en naa anaa akwany akuud yaa yiiho gihn nu, abea ngo aniid Poale kejea beehdo tiihye udhiile gen ke konyo. Ke nying gihn nu, e yaa tiihj giihe naa aoohre bang gen ge anahg yaa geen Epicoj, e beehda geen duohng gihr Dhaahr Roama e nii piny Aacya.
Ngo anaa alihng Poale kejea nud ke yaa ucahb maa acub rog gen piny ne puohny giih toohd yihr akuud yaa yiiho giih Kloajya. Yaa ucahb giih nu ngo aniing gene kejea nea dhaano daahd Juog ke ngeyo uyoade boadh wahy me ne cohg kea dhiile kwaad ruohdhe mooge maa acag ke wuoro. Yaa ucahb giih nu ge abar maalo ke rob kejea dhiil dhaane kwaad giih mooge ke yugo me neehn thoam kedea kweehr dhaane cam kedea kwaad giih mooge. Poal warga agweede ne cohg ngo piny kejea puohny gihn nu be roohm keehd lum dhe yoohn yiiho maa adiehr. Ngo acohg Poale piny kejea boadh wahy me ne cohg rom ke yoado ke bang Jeacuu, abea kwaad muu nu tahr ke yugo ge be roohm keehd dhe yoohn Jeacuu. Wiih piny acag Juoge kaa dhe yoohn Jeacuu kedea uduoge ngo bange ke dhe yoohn Jeacuu. Nweehd ke Jeacuu en ne kahl med cwihny kedea kuowo upiny. Ngo ateed Poale kejea dhe yoohn wahy gihn ni e ne kahl dhe yoohn beehdo me nyaahn yihr jo yiiho.
Tiicihcuj e naa anaa akahl warga gihn ni yihr yaa Kloajya. Ngo anaa acaahdho kaa Onecimuj e beehda ubaahng gihn anaa ke tiihyo keehd Pihlmon e naa agweed Poale warga moogo yihre.
Kaa Acaan Luube
Lum umodho 1:1-8
Tiihj gihr Jeacuu 1:9-2:19
Kuowo me nyaahn bang Jeacuu 2:20-4:6
Gug luube 4:7-18
1
1-2 A Poal ngad oohr gihr Jeacuu Kriihjto naa akwany Juoge ke kar wiihe an maa Timodhy umiiho, wa ne gweed warga gihn yihru wu jo wan naa anweehd keehd Jeacuu. Wu ge tiihyo yihr Ngad Boadh nyoge ke cwihnyu acielo wu ge beed yi geen Kloajya.
Beehn Juog Wuure kedea Jeacuu Kriihjto Ruohdhe cub gene muuny kedea doohr mar gen yihru ke karu cang.
Juog Akway Wane Kedea Umuohj Wane Koohre Ke Nyingu
3 Juog, Wur Ruohdho Jeacuu Kriihjto, koohre kwaay wane kaa muohjo nea wa ukwahyo ke nyingu.
4 Koohre muohj wane muohjo bang gihn ngo alihng wane kejea Jeacuu Kriihjto ayiihu ke cwihnyu acielo kedea yaa akwany Juoge ne joe ge nhyaaru nhyaaro.
5 Lum Jeacuu ayiihu kedea yaa akwany Juoge ge anhyaaru bang gihn gaahnu ngo kejea gihn agwiir Juoge ke nyingu paare ngo ucube yihru. Gihn agwiir Juoge yihru e bange alihngu coon ge anaa apuohny adiehj Ciig Beer yihru.
6 Ciig Beer apuohny yihru wa kaa apuohnye yihr nyoge me thoohdh ke bang wiih piny. Ciig Beer e ne meehg nyoge tiihy gihn me beer kedea ke nying nihn nu e nyoge me thoohdh ge udoohng ne yaa ayiih lum Jeacuu. Wu ne room ke yaa nu ayiiho. Ciig Beer tiihy gihn me beer kiinu ke cahng apuohny wun. Kedea muuny Juog ngo angeyu ne cohg.
7 Lum rubo ke nying muuny Juog gihn angeyu e naa gihn apuohny Epabraje yihru. Epabraj beehda ngaa maa anhyaar wane kedea ngo utiihyo ke wan tiehd ke nying Ngad Boadh nyoge. Ngo utiihyo yihr Jeacuu ke cwihnye acielo kedea ke nyingu
8 kedea anahg e naa ateed ngo yihr wan kejea Wahy Juog e naa ameehg wun nhyaar yaa akwany Juoge ne joe.
9 Ke cahng alihng wane gihn beer ge arobe ke nyingu, e wa ne kwaay kwaj yihr Juog ke nyingu. Wa kwaay kwaj ke nyingu beere giih daahd Juoge utiihyu gen ge ngahyu ngahyo ne cohg. Kaano e wu udoohng ne nyoge me ngahy luube ke nying giih Juog kedea ne nyoge me ameehg Wahy Juoge dead yihdh giih Juog.
10 Giih ni ge akway wane ke nyingu, beere wu ubeehdo kiin nyoge wa ka dhiil yaa akwany Juoge beehd kiin nyoge, kedea beere cwihny Juog meehgu ke doohng med ke dhog yiehdhe beehd. Thiow wa ukwahyo ke nyingu beere kwaad gihn me beer e ne tiihyu kedea beere Juog ngahyu ngahyo keraahyo.
11 Wa ukwahyo ke nyingu beer e Juog wu meehge ke yoad tee me wa tee mare ge gihn me kaal wiihe tooro. Kedea beere cwihnyu ungahmo kedea uguumu ke med cwihny, yihdh nihn ni reje.
12 Wa ukwahyo ke nyingu beere wu bar maalo ke muohj koohr Juog Wuro bang gihn ayuge wun ne nyoge muu unywaag gihn ucube yihr joe Paar Maalo.
13 Juog wo alwahge beere wo be beehdo keehdo yi cing atiihb ukeehg. Gihn nu e wo akaabe ucube won yi cing Waahde ge anhyaare.
14 Beehda ke nying gihn atiihy Waahde e naa abeehn Juoge ulwahge won oogo yi cing atiihb ukeehg kedea uwiie adhemuohme giiho piny.
Jeacuu En Ne Wiihe Ne Maalo
15 Kriihjto e naa cahd Wahn yihro keehd me bahnge Juog be niido, e ngo romo kaa ngahyo ke yoohn Jeacuu. Kedea en e ne wiihe ne maalo kiin giih acag Juoge cang,
16 bang gihn Juog e naa ameehg Jeacuu cag giih nyepinye cang. Giih wiih piny kedea giih yi maalo ge niid kedea muu be niid ge acage. Keehd jaag maalo kedea atiihbe e naa acag gen. Giih nu ge ameehge caa yihr Waahde beere ngo wuor gene wuoro kedea umoar gene wiihe.
17 Ngo anudo umodho maan e giih nyepinye ge poohd kuu acag, kedea giih nyepiny ge acub Juoge yi cinge ne maa beere ge ucaahdh beer mee.
18 E ne wiihe ne maalo rog giih nyepinye cang bang gihn e ne kaahn akuud yaa ayiiho wa gihr ngaa me kiiw yaahy. E ne meehg akuud yaa ayiiho yoad kuowo me ne cohg bang gihn e naa acahr umodho kiin yaa athow ke tee me cub kuowo me nyaahn. Ngo acahr beere e naa ngaa me wiihe ne maalo rog nyepinye cang.
19 E naa cahd Juog ne lihg lihgi me niido Juog ree.
20 E naa athow ke nying adhemuohm nyoge ne yab yooh me beehn Juoge uwaare wiihe ke nying yaa yug adhemuohm beere ge do bang Juog.
21 Abea wun keehd maano anahgu nyoge maa atooro bang Juog kedea wu anahg yaa mahn keehde bang gihn wu abeehdo ke dhog yiehdhe me reje,
22 keehd maa atiihyu giih nu, e Juog waahde aoohre udoohnge ne dhaano utaahngo beere ngo uthoo ke nying adhemuohme giihu. Ke dhe yoohn thone noono e ne meehge Juog doohr ke wun. Kaano arumo e rogu toor adhemuohm ge gahl wun ne beehn bange. Wu nyoge me beeye keraahyo yi wong Juog.
23 Baru maalo ke yiih Ciig Beer beere wu be pahdh yaa adhemuohm kedea rogu keá yugu ne lwag lwagi uwiiu yiih Ciig Beer. Thiow baru maalo ke gaahn gihn anaa arob yihru ge anaa apuohny Ciig Beer yihru. Ciig Beer gihn ni e naa apuohny ke bang wiih piny cang kedea Ciig Beer e naa tiihya a Poal.
Gihn Atiihy Poale Ke Nying Akuud Yaa Ayiiho
24 Me neehn awaahn kan cwihnya med kejea giih raahm ge ayoada, giih raahm me wu ukony gene yi yiiho gihru. Beehde giih raahm naa anaa ayoad Ngad Boadh nyoge ke nyingu ge ne poohd bar maalo riha. Arobe kejea giih raahm ge uyoada ke nying akuud yaa yiiho ge beehda kuohm Ngad Boadh nyoge.
25 A ke nguda a adoohng ne ngaa me tiihy yihr akuud naa akwany Juoge an ne tiihj keew yaa padh yaa Judea neehn wun. A akwany ne tiihj kedea ne nyoadh lum abeehno ke yoohn bang Juog yihru wu yaa ayiiho.
26 Lum abeehn ke yoohn bang Juog, beehda gihn me keá naa robo yihr yaa acoon naa abeed wiih piny. Abea awaahn ni lum nu anyoadh Juoge yihr joe.
27 Ngo arob Juoge yihr yaa padh yaa Judea kejea nyoge cang ge udooje keraahyo kedea ge unahg anweehd keehd Ngad Boadh nyoge beere ge caa Paar Juog ge amiihr.
28 Wa urubo ke nying Jeacuu Kriihjto yihr nyoge cang kedea nyoge cang ge toohn wane toohno kedea ge puohny wane kaa dhe yooh me ngahy gene lum Juog me ne cohg. Wa upuohnyo wa gihn nu beere kwaad ngaa unweehd keehd Jeacuu ree yoade yoado nyum Juog e adhemuohm tooro ree.
29 Ke nying gihn nu, e a atiihyo keraahyo ke tee gihn ayoada bang Jeacuu Kriihjto.