M̃aki Nasumo Nap̃a
YOANE
Siriyuia
Visayuena Na Tusi Nene
Suniena na plas na tusi nini
M̃aki p̃esa kiena Yoane, naga kiena sitomena keviu lua.
Nasumo, Yoane sinenan sape visirlua sitomena kiena li nalelagaena lala nap̃a aulo m̃aki nini, vena silaga monar asikol la ruruia nap̃a kiela sitomena ve taaga ga, a vena asikola ruruia amio Ntewa, amio narina nap̃a Yesu Kristo.
A nalua, naga vena visaen vanila vena ve ataveve re navianiena la nap̃a kiela vianena pe mesmesu re poli, komin navianena la nene akilia akila kare sum̃are e kiela visena na visokanen lala, ana yoko kilia kila nap̃a li nalelagaena la tap̃atete si asikol ruru la e sitomiena ve taaga.
Navianena la nene asum̃a apian ke yaru lala, asape p̃elaga viowa la apimi am̃alivi komin yaru la asike e yomarava, a amiyum̃ae ke ga e suri na yomarava la ne. Amio nanene, asitom sape Yesu, naga narina Ntewa, ana pe pe yaru ruru re sane ita poli. La asum̃a apisa ke asape visae Ntewa tamalia yaru, yaru nena tap̃atete sitomali si malena na yomarava nini, a pe pe suri re poli visae yaru na sanene kila milamulena viowa po pe kila re milamulena viowa poli a pe pe suri re m̃ena poli visae naga sinena si yaru tap̃ena pona ve sinena si re, ana suri la nene maran taaga ga, pe suri na yomarava ga.
Yoane siri m̃aki nini, sape kila meraravan nap̃a naga yepen mavin sitomiena la nene pano-o pap̃isi, a pisawal meraravan nap̃a Yesu Kristo, naga pe yaru nena sane ita. A naga pisaar m̃arera sape yaru la nap̃a amlelaga e Yesu, a sinela si Ntewa, monar sinela sisi la m̃enaga.
Komp̃asnen Tusi La Na Nini
Visena p̃esa 1:1-4
Legiena a yemalo 1:5—2:29
Narina Ntewa lala a narina Yermare lala 3:1-24
Ninuna nap̃a pe purp̃esnen visena lelaga a ninuna nap̃a pe purp̃esnen visena na visokanena 4:1-6
P̃elaga kiena yaru nap̃a sinena si yaru 4:7-21
P̃elaga na lelagaena nap̃a kilia taulu make suri la silaga 5:1-21
1
Yar na visawalen malena kiena ne Ntewa van ita, naga pimi e yomarava p̃isi rui
1 Sur tai, nanua sumo e pogos nap̃a yomarava siaria, ana nagane in na nemloge, nepisu e kilamarau, in na nepisu ruru pano-o, netol nena e lum̃au. Sur nene, kiena kia sanini, sape Navisawalen Malena, po Purp̃es nen Malena, po Malena Nap̃a Ve Uro Re Pogos Tai, nane in na sineun nesape nesiri van amiu.
2 Sur nene, nanua sumo pe tekilia re poli, naga sum̃a ga amio Ntewa arimata pano-o, nagane na pimi p̃arpoyo merarava e marata e yomarava nini narui, ana imimi moki mepisuia, a mepisawal pan yeririna lala.
3 Imimi memloge ruru nena e kiligamimi lala, a mepisu nena e kilamaramimi, ana mesape mevisawal van amiu vena kam m̃ena ga alelaga ea. Visae kam alelaga ea, yokorena kam m̃ena aim ave taaga amio imimi, sa nap̃a imimi mepe taaga ga memio arimata Ntewa a narina Yesu Kristo rui.
4 Sur nene kila pupia kekarena sike amio imimi silaga, a visae auarar ruru visena la nap̃a nesape nevisa van amiu e m̃aki nini, yoko pupia kekarena nene sike m̃ena amio amiu, p̃isi na kila ita punu ga teloge wo vap̃isi.
Ntewa naga pe purp̃es nen yomerarava
5 Visena nap̃a narina ne Ntewa mla pan imimi, pisape monar mevisawal van yeririna tap̃ena lala, sa nene, naga pisa sape, Ntewa pe purp̃es nen yomerarava, pe narin yemalolo re nena tai teke puna.
6 Ve sanene, visae tepisawal ke tesape tepe taaga temio Ntewa, ana tekila ke ga p̃elaga na yemalolo la na wa, nanene tepisokan ke ga ne, pe tekila re sur na lelaga nene poli.
7 Ana visae tesum̃a teyal m̃a e yomerarava nap̃a Ntewa sike e silaga, kila yoko telapran ita ruru wo silaga, ana tevisu tana na narina, Yesu, kilia kevan ita temekiki e kieta mlamulena viowa lala.
Nayalena e yomerarava kiena ne Ntewa: Monar teligan plan p̃elaga na mlamulena viowa lala
8 Yeririna nap̃a pisawo ke, pisape naga pe naviowaena su re e kiena malena poli, kiena visena nene pe pe lelaga re poli, naga pisa kotalia ke sina ga naga.
9 Ana visae tevisa plan ga kieta naviowaena lala, yoko Ntewa viewo ita, p̃isi na war plan kieta naviowaena lala vetan ita, kila ita temekiki. Naga ga kila ruru mrapa na kilaen sanene rui, ana ita towasine ga naga sane yoko kila van ita sanena nap̃a pisaaria.
10 Ana visae tesum̃a tevirovia, tevisa m̃a tesape pe tekila re naviowaena poli na, nanene ita tekila sane Ntewa naga pisokan ga, a ita tekila sane kiena visena nowo na lelagaena, pe tepuarar ruru re nena e kieta malena la poli.