19
B'i̱ ts'ín tsakuchjíhi̱ Jua nga kin'etsjoho̱ Nti̱a̱ná ndji̱o̱jmi ján
1 Nk'ie nga ja kama ni xu'bi̱, a̱s'a̱i kint'e nta̱ha̱ nkjin ṉkjún xu̱ta̱ xi 'yún kinchja̱ ndji̱o̱jmi ján nga b'i̱ i̱ncha kitsú:
—¡Kan'etsjoho̱ Nti̱a̱ná, kui xi ts'ínk'ankiná!
Kui xi ts'e̱ kju̱a̱chánka ko̱ nga'yún.
2 A̱t'aha̱ nda ts'ín ko̱ kixi̱ ts'ín kju̱a̱,
ja kuats'ínko̱kju̱a̱ na̱ská k'aku̱
xi ni najmi ndaha̱ kits'ínkatsúnko̱ho xu̱ta̱.
Nti̱a̱ná ja kuakasje chjí jníhi̱ xu̱ta̱ xi ts'e̱.
3 A̱s'a̱i b'a̱há ta̱ i̱ncha kitsú ngáha:
—¡Kan'etsjoho̱ Nti̱a̱ná! Ni̱nti̱ xi tíbitjuhu̱ nanki chánkoo̱ ngju̱a̱i̱nji nk'a ján tu̱ nkjéhé ni.
4 A̱s'a̱i kingjénsten santaha t'anankiu̱ jáchá xi kan ñjuu̱ ko̱ xi ñju xi tjíntu tík'uu̱n nga kits'íntsjoho̱ Nti̱a̱ná, kui xi tíjñasun a̱nte má batéxuma. B'i̱ i̱ncha kitsú:
—¡B'a̱ katuma! ¡Kan'etsjoho̱ Nti̱a̱ná!
5 A̱s'a̱i kinu'yá nku nta̱ xi nibaha̱ ra̱ má b'ejña Nti̱a̱ná nga b'i̱ kitsú:
N'e̱tsjoho̱ Nti̱a̱ná ngayjo jun xi xu̱ta̱ xi ts'e̱,
jun xi yankjún Nti̱a̱ná, xi xi̱xi̱hi̱ ko̱ xi ihi̱.
6 A̱s'a̱i kint'e nga xi nkú ts'ín nu'yá nkjin nta̱ha̱ xu̱ta̱, xi nkú ts'ín faneya ntáje̱ nga ma 'yún ko̱ xi nkú ts'ín 'yún faneya ch'o̱n. B'i̱ kitsú nto̱:
—¡Kan'etsjoho̱ Nti̱a̱ná!
A̱t'aha̱ tíbatéxuma Nti̱a̱ná, Nti̱a̱ xi tjíhi̱n nga'yún.
7 Kat'etsjoná ko̱ katsejíhinná kju̱a̱tsjo,
n'e̱kié yjoná nga kui xi chánka.
A̱t'aha̱ ja kuichu chu̱ba̱ kju̱a̱bixaha̱n Chu̱tsa̱nko̱,
ja kab'énda yjoho̱ xi k'úéjñako̱.
8 Ka'ba̱i̱hi̱ nga ngju̱a̱ najyun xi chjí,
xi je ko̱ xi tíbat'ai.
Kui niu̱ xi tsuhu̱ ra̱ ni xi nda i̱ncha kits'ín xu̱ta̱ jehe̱ Nti̱a̱ná.
9 A̱s'a̱i b'a̱ kitsúna ntítsjee̱:
—T'et'ai ni xu'bi̱: “¡Á b'a̱ nda tjíhin ts'e̱ xi kik'inyaha̱ ra̱ nga kj'u̱a̱íhi s'í kju̱a̱bixaha̱n Chu̱tsa̱nko̱!”
Ko̱ b'a̱ ta̱ kitsúna:
—Kju̱axi̱ ni xi tíxihin. Nti̱a̱ná xi b'a̱ kitsú.
10 A̱s'a̱i tsási̱nkúnch'int'aha̱ ntítsjee̱ xi má nga ts'intsjoho̱, tu̱nga b'a̱há kitsúna:
—Najmi b'a̱ tu̱ n'ei. An ta̱ ts'inxát'aha̱ Nti̱a̱ná xi nkúhu ji ko̱ ta̱ xi nkúhu já nts'ei xi tu̱ nkú tíma 'yún tak'uhún én xi tsakúya Jesu. Nti̱a̱náhá xi n'e̱tsjoihi̱.
A̱t'aha̱ én xi tsakúya Jesu, kui ée̱n xi ts'ínkinchja̱ha̱ já profeta̱.
B'i̱ ts'ín tsakuchjíhi Jua nku xi tjísuhu̱n ndje̱
11 A̱s'a̱i kikie nga tje̱nti̱xa̱ nk'a ján. Tsase ko̱ kikie nku ndje̱ taba. Xi tjísuhu̱n chu̱ 'mi Xi Kixi̱ Ts'ín ko̱ Xi Kju̱axi̱ Ni xi Tsu. Kixi̱ ts'ín nk'ie nga kju̱a̱ ts'ín ko̱ nga kján.
12 Xi tíi̱ncha nd'í tíi̱ncha tunku̱n. Nkjin corona̱ tjí'aha̱ ko̱ tjít'aha̱ nku j'áín xi nku tutu kui be.
13 Yja nku najyun xi kits'ihi̱ jní ko̱ j'áíhi̱n, kui xi Éhe̱n Nti̱a̱ná.
14 Tje̱nnkihi̱ já jun xi tjín ndji̱o̱jmi ján. Ndje̱ taba tjíntusúhu̱n nga yja najyun xi chjí, xi taba ko̱ je.
15 Ts'a tíbitju nku ki̱cha̱ xi yjo, tu̱ xi kja̱ánko̱ho nanki xi tjín a̱sunntee̱. Ndjá ku̱a̱téxumaha̱ xu̱ta̱ ko̱ ts'i̱ín nibánehe̱ kju̱a̱kjan chánkaha̱ Nti̱a̱ná xi tjíhi̱n nga'yún.
16 Najyun xi yja ko̱ ngasuhu̱ tjít'a j'áín xu'bi̱: “Nda̱ rei̱hi̱ já rei̱ ko̱ Nda̱ Nti̱a̱ha̱ já nti̱a̱.”
17 A̱s'a̱i kikie nku ntítsje xi síjñasun ts'íu̱. Kui xi 'yún kinchja̱ nga b'i̱ kitsúhu̱ ngayjee̱ ni̱se xi b'ema tje̱n nk'a ján:
—Nibá ma ñjakú nga chi̱no̱o nichine chánka xi tsjá Nti̱a̱ná.
18 Chi̱no̱o yjonintehe̱ já rei̱ ko̱ já jun k'aku̱ ko̱ já xi x'i̱n b'asje yjoho̱, yjoho̱ ndje̱ ko̱ xi b'esúhu̱n chu̱, yjonintehe̱ ngayjee̱ xu̱ta̱, xi tjíma nda̱íhi̱ ko̱ xi kich'atse, xi ihi̱ ko̱ xi xi̱xi̱hi̱.
19 A̱s'a̱i kikie chu̱ xi tsitjujín ntáchak'uu̱n ko̱ já rei̱ xi tjín a̱sunntee̱ nga tje̱nko̱ já juhu̱n. I̱ncha kama ñjakú tu̱ xi i̱ncha kja̱ánko̱ho xi tjísuhu̱n ndje̱ ko̱ já jun xi ts'e̱ xi tjísuhu̱n ndje̱.
20 Kichjubénijé chi̱ ko̱ ta̱ kichjubénijé nda̱ profeta̱ tsank'á xi kits'ín kju̱a̱nkjún nginku̱n chi̱. Kui kju̱a̱nkjún xi kits'ín ts'ana̱cha̱ko̱ho̱ ra̱ xu̱ta̱ xi kitsjánte nga kis'et'aha̱ chu̱ba̱ha̱ chi̱ ko̱ xi kits'íntsjoho̱ sénni̱stjihi̱n. I̱ncha kichjanikj'ajin tík'un chi̱ ko̱ nda̱ profeta̱ tsank'óo̱ a̱jin ntáchak'un nd'í xi títiko̱ho sufri̱.
21 Ko̱ já xingisoo̱ kin'ek'ienko̱ho ki̱cha̱ xi tíbitju ts'a xi tjísun ndje̱. Ngayjee̱ ni̱see̱ tu̱ xí i̱ncha kikjinehé yjonintehe̱ jóo̱.