18
¿Ankyexixtl at toklin toj Tkawbꞌil Dios?
(Mr. 9:33-37; Lc. 9:46-48)
1 Tojxjo maj anetziꞌn, o tzaj laqꞌeꞌy, a awoꞌy t-xnaqꞌtzbꞌin, tkꞌatz Jesús, ex xi qqaniꞌn te: ¿Ankyexixtl nim toklin toj Tkawbꞌil Dios toj kyaꞌj?
2 Tzaj ttxkoꞌn Jesús jun tal kꞌwal, ex kubꞌ twaꞌbꞌin qxola,
3 ex tzaj tqꞌmaꞌn: Twutzxix kxel nqꞌmaꞌn kyeꞌy, qa mi s-ok kyanmiꞌn tzeꞌn tanminjo tal kꞌwal lo, a manyor tal mutxin, nlayxpen chi okxtza toj Tkawbꞌil Dios toj kyaꞌj.
4 Tuꞌnpetziꞌn, atzin te nim tokliꞌn toj Tkawbꞌil Dios, a kꞌwel tmutxsin tibꞌ tzeꞌnku tal kꞌwal lo.
5 Tuꞌnpetziꞌn, ankye kxel kꞌmonte jun tal kꞌwal tzeꞌnku lo, noq tuꞌn tnimbꞌil tiꞌj nbꞌiꞌy, nyakuj ayiꞌn kchin xel tkꞌmoꞌn.
Jun techil tuꞌn Jesús, tuꞌn mi qox tzꞌaq toj il
(Mr. 9:42-48; Lc. 17:1-2)
6 Noq alkye jun xjal ntjyoꞌn tumil tzeꞌn tten, tuꞌn tel tpaꞌn jun tal kꞌwal tibꞌ tiꞌj tnimbꞌil wiꞌja, junxpetla tzꞌele te te, tuꞌn tok kꞌlet jun ma tij abꞌj te chebꞌl triy tiꞌj tqul, ex tuꞌn t-xi t-xoꞌn tibꞌ toj aꞌ, tuꞌn tkyim te jun majx, tzeꞌnkuljo tuꞌn tokx toj paꞌbꞌin twutz Dios tukꞌaꞌ til ikyjo.
7 ¡Ay! Ntiꞌx kyajbꞌin xjal aj il twutz txꞌotxꞌ, a ipbꞌilxix iteꞌke tuꞌn kykubꞌ tzꞌaq txqantl toj il. Kxel nqꞌmaꞌn kyeꞌy, kukx at te iljo tzaluꞌn twutz txꞌotxꞌ, me nim bꞌisbꞌajil texjal, a tzunx nlabꞌte kyiꞌjjo txqantl, tuꞌn kykubꞌ tzꞌaq toj il.
8 Tuꞌnpetziꞌn, qa noq tuꞌn tpaj jun tqꞌobꞌa mo jun tqan, aku kubꞌ tzꞌaqiy toj il, bꞌantla tuꞌn tel ttxꞌemiꞌn, ex qꞌimila toj tkꞌuꞌja te jun majx. Quꞌn wenitla tuꞌn tokxa toj kyaꞌj noq tukꞌa jun tqꞌobꞌa mo jun tqan, tzeꞌnkul teꞌ, tuꞌn t-xiꞌy kyukꞌa kykabꞌil toj qꞌaqꞌ.
9 Ex qa noq tuꞌn tpaj tbꞌaqꞌ twutza aku kubꞌ tzꞌaqiy toj il, qꞌimitza, ex qꞌimila toj tkꞌuꞌja te jun majx. Quꞌn bꞌantla tuꞌn tokxa toj kyaꞌj noq tukꞌa jun twutza, tzeꞌnkul teꞌ, tuꞌn txiꞌy kyukꞌa kykabꞌil toj qꞌaqꞌ, a mixla k-yupjilx.
Jun techil tuꞌn Jesús tiꞌjjo rit xi naj
(Lc. 15:3-7)
10 Mi chi el kyikyꞌinjiꞌy tal muchꞌqe lo. Quꞌn twutzx kxel nqꞌmaꞌn kyeꞌy, loqe ky-angel majx iteꞌ yolil kyiꞌj twutz nMaꞌn toj kyaꞌj.
11 Ex ayiꞌn, a Tkꞌwal Ichin, skꞌoꞌnxix tuꞌn Dios, ma chin ula kolil kyiꞌjjo tal kꞌwal, ex kyiꞌjjo a otaq chi naj toj il.
12 ¿Tzeꞌntzin chꞌin kye toj kywutz? Qa at jun xjal at jweꞌ kꞌal trit, ex qa ma kyij naj jun, ¿Ma nyapela kchi kyjel tqꞌoꞌn bꞌeljajlajaj toj jweꞌ kꞌal twiꞌ wutz, exsin kxeꞌltz jyol teꞌ a otaq kyij naj?
13 Exsin qa aku xknet tuꞌn, twutzxix kxel nqꞌmaꞌn kyeꞌy, maꞌxla tzalajx tiꞌjjo jun tzeꞌnqekuljo bꞌeljajlajaj toj jweꞌ kꞌal, a mi ẍi kyij naj.
14 Ikytziꞌn te kyTatajiꞌy, a at toj kyaꞌj. Nya taj tuꞌn tnaj jun kyeꞌ, exla qa jun tal muchꞌ kꞌwal tzeꞌnku lo.
Tzeꞌn tuꞌn tkubꞌe najsit til jun qukꞌa
(Lc. 17:3-4)
15 Qa ma kubꞌ tbꞌinchin jun nimil jun tiꞌ tiꞌja, a nya bꞌaꞌn, ku txiꞌy yolil tukꞌa tjunalx. Qꞌmanxa te, tiꞌ xbꞌajte tiꞌja. Qatzin qa ma kubꞌ tbꞌiꞌntz, atpenl kymujbꞌil kyibꞌtza tukꞌa juntl majl.
16 Me qatzin qa mi xkubꞌ tbꞌiꞌnxtz, kꞌleꞌnx juntl tukꞌiy mo kabꞌetl, tuꞌntzin kyok te tstiyil, quꞌn ikyxjo ntqꞌmaꞌn toj Tuꞌjil Tyol Dios, qa il tiꞌj tuꞌn kyok kabꞌe mo oxe tstiyil, tuꞌntzin kywutzku kbꞌajileꞌ yol.
17 Qatzin ikyxl xbꞌantjo tuꞌn, qꞌmaꞌnxa te tkyaqil Ttanim Dios. Ex qa mi xkubꞌ tbꞌiꞌnx kyyol tkyaqil Ttanim Dios, kyqꞌonka tzeꞌnku jun nya nimil, mo tzeꞌnku jun peyil pwaq, a iꞌjlemil kyuꞌnxjal.
18 Ex twutzxix kxel nqꞌmaꞌn kyeꞌy, qa ma kotpitjo xjal tuꞌn toj kyil, noq tuꞌn ktqꞌmaꞌbꞌila tzaluꞌn twutz txꞌotxꞌ, ex aj kyok toj paꞌbꞌin twutz Dios toj kyaꞌj, kchi kotpajil te jun majx. Ex qa mi xi kynimin a ktqꞌmaꞌbꞌila, ma chi kꞌlet tuꞌn kyil tzaluꞌn twutz txꞌotxꞌ, ex aj kyok toj paꞌbꞌin twutz Dios toj kyaꞌj, kchi xel toj najin te jun majx.
19 Ex ikyxjo kxel nqꞌmaꞌn kyeꞌy, qa at kabꞌe kye tzaluꞌn twutz txꞌotxꞌ, xbꞌant tiꞌj tuꞌn, tuꞌn t-xi kyqanin te nTatiꞌy toj naꞌj Dios jun tiꞌ, aꞌlchaqx kye kyajtza, ex ktzajil qꞌoꞌn kyeꞌy tuꞌn.
20 Quꞌn jaꞌ nkychmome kabꞌe mo oxej kyibꞌ tiꞌj tumil nbꞌiꞌy, loqiꞌn intin kyxol, chi Jesús.
21 Atzin te Pegr xi laqꞌe, ex xi tqanin te Jesús: WAjaw, ¿Jteꞌ maj kꞌwel nnajsin til jun wukꞌiy, qa ma kubꞌ tbꞌinchin jun nya wen wiꞌja? ¿Ma noqpela wuq maj?
22 Me xi ttzaqꞌwin Jesús te: Nya noq oꞌkxjo wuq maj, qalaꞌ wuq majjo lajaj toj jun mutxꞌ.
Techil tuꞌn Jesús tiꞌjjo aqꞌnil, a mi xkubꞌ tnajsin tkꞌas tukꞌa
23 Tuꞌnpetziꞌn, a Tkawbꞌil Dios toj kyaꞌj, ikytziꞌn tzeꞌnku jun kawil tajtaq tuꞌn tpeyin kykꞌas taqꞌnil.
24 Atzaj teꞌ tok ten bꞌinchilte lo, attaq jun, ma ninxtaq txqan tkꞌas.
25 Me ntiꞌtaqx tumil tzeꞌn tten tuꞌn tchjet tuꞌn. Atziꞌn kubꞌ tbꞌisin tajaw kꞌas, tuꞌn t-xi kꞌayit te aqꞌnil te jun majx kyexjal, me tukꞌax t-xuꞌjil ex kyukꞌax tkꞌwal ex tkyaqiljo jniꞌ attaq te, tuꞌntzintla tchjetjo tkꞌas.
26 Me atziꞌn aqꞌnil kubꞌ meje twutz kawil, ex ja kubꞌsin twutz te: Tata, qꞌaqꞌintz tkꞌuꞌja wiꞌja. Ok chjetil weꞌ wuꞌn tkyaqilx, noq tuꞌn chebꞌeku.
27 Bꞌeꞌx tzaj qꞌaqꞌin tkꞌuꞌj kawil tiꞌj, ex bꞌeꞌx kubꞌ tnajsin tkꞌas te jun majx; ex bꞌeꞌx xi ttzaqpiꞌn.
28 Me aꞌkxtaq tetzjo aqꞌnil, tej tel knet jun tukꞌa tuꞌn, a kꞌasbꞌinintaq twutz noq jun tal jteꞌbꞌin pwaq. Me tzaj ttzyuꞌn tukꞌa tqul, ex ok tẍpoꞌn, ex xi tqꞌmaꞌn te: Chjomjiy tkꞌasa weꞌy.
29 Me antej kꞌasbꞌine kubꞌ meje, ex ja kubꞌsin twutz te: Qꞌaqꞌintz tkꞌuꞌja wiꞌja. Ok chjetil weꞌ wuꞌn tkyaqilx, noq tuꞌn chebꞌeku.
30 Me mix ttziye ikyjo. Bꞌeꞌx xiku tiꞌn, tuꞌn tkux jpet toj tze, tzmaxi tuꞌn tjatzjo, ajxi tchjet tuꞌn tkyaqil.
31 Tej tok kykaꞌyin txqantl aqꞌnil ikyjo, bꞌeꞌx tzaj chyoꞌn kyanmin tiꞌj. Bꞌeꞌx i xiꞌ qꞌmalte te kawil tkyaqiljo otaq bꞌaj.
32 Bꞌeꞌxsin xi tqꞌmaꞌn kawil, tuꞌn ttzaj txketjo tnejil aqꞌnil, ex xi tqꞌmaꞌn te: Ay aqꞌnil manyor aj ilxa. Ma kubꞌ nnajsin weꞌ tkyaqil tkꞌasa, noq tuꞌn xkubꞌ mejey nwutza.
33 Ikytzintla tejiy matla tzaj qꞌaqꞌin tkꞌuꞌja tiꞌj tukꞌiy, tzeꞌnku weꞌ saj qꞌaqꞌin nkꞌuꞌja tiꞌja.
34 Bꞌeꞌx tzajx txqan tqꞌojjo kawil tiꞌj, ex xi tqꞌmaꞌn, tuꞌn t-xi qꞌoꞌn toj kyqꞌobꞌjo xqꞌuqil tze, ex tuꞌn tbꞌaj bꞌyoꞌn, ex tzmaxi tuꞌn tjatzjo, aj tchjet tkꞌas tkyaqil.
35 Atzaj teꞌ tbꞌaj yolin Jesús tiꞌjjo techil lo, xi tqꞌmaꞌn: Ikytziꞌn kchi tenbꞌilajiꞌy tuꞌn nTatiꞌy toj kyaꞌj, qa mina xkubꞌ kynajsiꞌn til jun kyukꞌiy tukꞌa tkyaqil kyanmiꞌn.