4
Qo bꞌet tzeꞌnkuxjo taj Dios
1 Quꞌn ikytziꞌn tzeꞌnku te Crist, ma tzikyꞌx tuꞌn toj t-xmilil, exsin ikyx kyejiꞌy bꞌaꞌn tuꞌn t-xi kyqꞌoꞌn kyibꞌa tuꞌn tikyꞌx yajbꞌil kyuꞌn, noq tuꞌn tpaj kynimbꞌila. Quꞌn alkyeꞌ ma tzikyꞌx tuꞌn toj t-xmilil, tok tilil tuꞌn, tuꞌn tkyij ttzaqpiꞌn il,
2 tuꞌntzintla mi bꞌete tojjo chꞌintl tchwinqil tzaluꞌn twutz txꞌotxꞌ, a tzeꞌnkuxjo tajbꞌil kyachbꞌilxjal; qalaꞌ tzeꞌnkuxitlaꞌ tajbꞌil Dios tukꞌa.
3 Akuxjo jaꞌlin, a nkubꞌ kybꞌinchintaqa ojtxe, a tzeꞌnkuxjo kytzeqbꞌilxjal nya nimilqe. Quꞌn ikytaqtzin nchi bꞌetejiꞌy tojjo jniꞌ nya wen, ex nimkutaq n-el kyanmiꞌn tiꞌj, ex txꞌujtinelqiꞌy, ex manyor kyꞌaꞌjilqiꞌy, ex noqx nchex lipe tiꞌj tkyaqiljo il, ex nchi kꞌuliꞌn kywutzjo kywutzbꞌiyil junxil kydiosxjal.
4 Me atzin jaꞌlin, nya wen n-ele toj kywutzxjal, tuꞌn mi nchi bꞌettla toj kyachbꞌil junx kyukꞌa. Tuꞌnpetziꞌn, nchi yolbꞌin nya wen kyiꞌja.
5 Me nya yajku kchi okil toj paꞌbꞌin twutzjo Dios, a Kawil kyibꞌajjo tkyaqil kyimnin, ex aye itzꞌqextaq.
6 Quꞌn ayetziꞌn, a o chi kyim, ma yolajtz Tbꞌanil Tqanil kye, tuꞌntzintla tanqꞌin kyanmin tuꞌn Dios, exla qa ma kubꞌ kyximinxjal qa ntiꞌ kyoklin tuꞌn kyanqꞌin tzaluꞌn twutz txꞌotxꞌ; ex bꞌeꞌx i kubꞌ kybꞌyoꞌn.
7 Quꞌn chꞌix tuꞌn tjapin bꞌaj tqꞌijil tzaluꞌn twutz txꞌotxꞌ; tuꞌnpetziꞌn, tenxix kynabꞌla, ex kytzyumtzin kyibꞌa, tuꞌn kyokxa toj naꞌj Dios.
8 Me tibꞌaj tkyaqiljo lo, axix il tiꞌjjo kykꞌuꞌjbꞌil kyibꞌa, quꞌn atzin kykꞌuꞌjbꞌil kyibꞌa, knajsitil nim il tuꞌn.
9 Kykꞌmomtzin kyibꞌa toj kyjay jun tukꞌa juntl, ex mi jawje kykꞌuꞌja kyxolxa.
10 Teyile junjun bꞌaꞌn tuꞌn tajbꞌin kye txqantl, a tzeꞌnxjo toklin, a ma tzaj tqꞌoꞌn Xewbꞌaj Xjan, tuꞌntzintla t-xi tsipiꞌn t-xtalbꞌil Dios teyile junjun atx taj te. Kybꞌinchinkuy tkyaqiljo lo tzeꞌnku jun tbꞌanil nejinel tibꞌaj aqꞌuntl, a nximin wen tiꞌj tkyaqiljo atx taj te.
11 Ikytziꞌn, qa at jun at toklin tuꞌn tyolin, noqit yolin tzeꞌnkuxjo Tyol Dios. Ex qa at jun at toklin tuꞌn tajbꞌin kye txqantl, noqit tzꞌajbꞌin tukꞌa tkyaqil tipin, tzeꞌnkuxjo ma tzaj tqꞌoꞌn Dios, tuꞌntzintla tkyaqiljo nbꞌant, bꞌant-xitla te nimsbꞌil tbꞌi Dios, noq tuꞌn Jesucrist, a nimxit tbꞌi toj tkyaqil tipin jaꞌlin ex te jun majx. Ikyxitjo.
Qa ma tzikyꞌx quꞌn tuꞌn tpaj qnimbꞌil
12 Ayiꞌy werman, at nkꞌuꞌja kyiꞌja. Mi chi jaw kaꞌylaja tuꞌn tkyaqiljo n-ikyꞌx kyiꞌja, nyakuj jun tiꞌ, a ntiꞌtaq tbꞌajil.
13 Qalaꞌ, chi tzalajxa tuꞌn n-ikyꞌx kyuꞌn tzeꞌnku s-ikyꞌx tuꞌn Crist, tuꞌntzintla kynojxa tukꞌa tzaljbꞌil, aj tuljo tqoptzꞌajiyil tulil.
14 Ex qa ma chi ok yisoꞌn noq tuꞌn tpaj Crist, at tkyꞌiwbꞌil kyibꞌaja, noq tuꞌn Xewbꞌaj Xjan kyukꞌiy, a T-xew Dios nqoptzꞌaj wen.
15 Ex qa at jun kyeꞌ n-ikyꞌx tuꞌn, me noqit nya tuꞌn tbꞌiybꞌin, mo tuꞌn telqꞌbꞌin, mo tuꞌn jun il, ex nya tuꞌn tlimoꞌn tibꞌ tiꞌjjo a ntiꞌ toklin tiꞌj, quꞌn kykyaqiljo lo n-ikyꞌx kyuꞌn noq tuꞌnxjo kybꞌinchbꞌin.
16 Me qa at jun n-ikyꞌx tuꞌn, noq tuꞌn tpajjo tbꞌi Crist, mina jaw txꞌixwe tuꞌn; qalaꞌ bꞌaꞌn tuꞌn tnimsin tbꞌi Dios, quꞌn tuꞌn at toklin tuꞌn tok tbꞌi te nimil tiꞌj.
17 Quꞌn chꞌix tjapin tqꞌijil tuꞌn qok qkyaqilx toj paꞌbꞌin twutz Dios, ex kxel xkye kyxol nimil. Ex qa il tiꞌj tuꞌn tkawin Dios kyibꞌaj nimil, ¿Yajtzila kye, a mi xi kynimin Tbꞌanil Tqanil, a tzaj tqꞌmaꞌn Dios? ¿Jaꞌtzila kchi kanile?
Ikytziꞌn ntqꞌmaꞌn toj Tuꞌjil Tyol Dios:
18 Qa kuj ẍi klete kyeꞌ tzꞌaqleqe, ¿Yajtzila kye nya wenqe ex bꞌinchil ilqe?
19 Tuꞌnpetziꞌn, aye n-ikyꞌx kyuꞌn, tzeꞌnkuxjo tajbꞌil qMan Dios, bꞌaꞌn tuꞌn tok tilil kyuꞌn, tuꞌn tkubꞌ kybꞌinchin wen, ex tuꞌn t-xi kyoqxenin kyanmin toj tqꞌobꞌ Dios, a Chꞌiysilkye, quꞌn kukx njapin bꞌaj Tyoljo.