Tnejil Tuꞌj Pabl te Timotey
Aye kabꞌe tuꞌj Pabl te Timotey, tukꞌaꞌ uꞌj te Tito, atzin kybꞌi o tzꞌok qꞌoꞌn: Uꞌj kye Kyikꞌlel, quꞌn xi smaꞌn noq oꞌkx kye xjal, a o chi ok te kyikꞌlel, ex nchi aqꞌnin kyxol nimil.
Ante Timotey jun kuꞌxin ex nimil; atzin tnana jun qya aj Judiy, ex atzin ttata jun ichin aj Grecia. Antza jyete Timotey tuꞌn Pabl toj tnam Listra (Kybꞌi. 16:1-3). Ex o tzꞌok te jun tukꞌa ex mojilte Pabl toj taqꞌin qAjaw. Atzin tnejil uꞌj tuꞌn Pabl te Timotey nyolin tiꞌj oxe tumil xnaqꞌtzbꞌil ma tij wen:
Tzeꞌnku kyoj capítulo 1—3, ntzaj tqꞌmaꞌn qa nimxix tbꞌis ntzaj kyiꞌjjo xnaqꞌtzbꞌil, a nya twutzxix, a otaq tzꞌoksin kyxol nimil. Ayetziꞌn xnaqꞌtzbꞌil lo, noq jun kyximxjal tzaluꞌn twutz txꞌotxꞌ, ex ntiꞌ tajbꞌin tuꞌn kybꞌet nimil toj tumilxix kyuꞌn. Tuꞌnpetziꞌn, tqꞌma Pabl qa ilxix tiꞌj jun xnaqꞌtzbꞌil twutzxix, tzeꞌnku tuꞌn kyklet-xjal noq tuꞌn t-xtalbꞌil qMan, ex tzeꞌnku oꞌkx te Jesucrist at toklin tuꞌn tyolin kyiꞌjxjal twutz Dios (2:5).
Atzin tkabꞌ tumil ma tij tojjo uꞌj lo nyolin tiꞌj tzeꞌn tuꞌn tnikꞌeteꞌ kꞌulbꞌil toj tumilxix, ex ankyeqexixjo xjal tuꞌn kyok te nejinel ex mojil toj Ttanim Dios. Te tibꞌajxi, xi tqꞌoꞌn Pabl jun tumil te Timotey tzeꞌn tuꞌn t-xi xkyeye taqꞌin, ex tuꞌn tok te jun tbꞌanil aqꞌnil te Jesucrist (4:6). Ex at juntl tumil xnaqꞌtzbꞌil tojjo uꞌj luꞌn, tzeꞌnku naꞌj Dios kyuꞌn nimil kyiꞌj tkyaqil xjal, ex tzeꞌn tuꞌn kybꞌete ichin ex qya toj tumilxix.
1
Jun qꞌolbꞌil tuꞌn Pabl te Timotey
1 Ayiꞌn Pabl, jun tsanjil Jesucristqiꞌn, chqꞌoꞌn tuꞌn Dios, a Klolqe, ex tuꞌn qAjaw Jesucrist, a qꞌuqlexix qkꞌuꞌj tiꞌj.
2 Nxi ntzꞌibꞌinjiꞌy uꞌj luꞌn tey, Timotey, ay ok nqꞌoꞌn te nkꞌwala toj qnimbꞌil. Noqit ax qMan Dios ex Crist, a Jesús, tzaj qꞌoꞌnte t-xtalbꞌil, tqꞌaqꞌbꞌil tkꞌuꞌj, ex jun nukꞌbꞌil toj tchwinqila.
Jun tqanil tiꞌjjo xnaqꞌtzbꞌil nya toj tumil
3 Quꞌn ikytziꞌn tzeꞌnku in kubꞌsin nwutza tey, tej nxiꞌy toj txꞌotxꞌ te Macedonia, exsin ikyx teꞌ jaꞌlin kxel nqꞌmaꞌn juntl majla tey, tuꞌn tkyija toj tnam Éfeso, tuꞌn t-xi tnikꞌuꞌn te junjun xjal, tuꞌn mina txi kyyekꞌin jun xnaqꞌtzbꞌil, nya toj tumil,
4 ex tuꞌn mi tzꞌok kybꞌiꞌn kylaꞌjxjal ex jniꞌ kybꞌisxjal, a ntiꞌ bꞌajsbꞌil kye, kyiꞌj ojtxe qxeꞌchil. Quꞌn tkyaqiljo luꞌn, noq tuꞌn qyasin tiꞌj, ex mi n-onin qiꞌj tuꞌn tjapin qnimbꞌil tzeꞌnku taj Dios.
5 Nya tiquꞌnil nxi ntzꞌibꞌinjiꞌy luꞌn, noq tuꞌn tok kykꞌuꞌjlin kyibꞌa kyxolxa kykyaqilxa, tukꞌa jun kꞌuꞌjbꞌil, a tzajnin tojxix kyanmiꞌn saqxix, ex toj tbꞌanil kynabꞌla, ex tuꞌn kynimbꞌila twutzxix.
6 Quꞌn at junjun ma tzꞌel txalpaj kyiꞌjjo lo; ma txi lipe tiꞌjjo kyximxjal, a ntiꞌ tajbꞌin.
7 Kyaj tuꞌn kyok te xnaqꞌtzil tiꞌjjo tkawbꞌil qMan Dios, ex mi n-el kynikyꞌ te a nkyqꞌmaꞌn, ex tiꞌjjo kyxnaqꞌtzbꞌil nxi kyqꞌoꞌn nyakuj twutzxix.
8 Quꞌn bꞌiꞌn quꞌn, qa bꞌaꞌn teꞌ tkawbꞌil Dios, me qa ma tzꞌajbꞌin quꞌn tzeꞌnkuxjo taj.
9 Bꞌaꞌn tuꞌn ttzaj qnaꞌn, qa ntiꞌ kawbꞌil ntzaj kyibꞌajjo nkubꞌ kybꞌinchin wen, qalaꞌ kyibꞌajjo nchi bꞌinchin nya wen: Tzeꞌnqeku xjal n-el kyiꞌjlin kawbꞌil, ex kykyꞌeꞌ tuꞌn kynimin, ex aye nya bꞌaꞌnqe, ex aj ilqe, ex aye kykyꞌeꞌ tuꞌn t-xi kynimin qMan Dios exsin Tyol, ex aye nkubꞌ kybꞌyoꞌn kyman ex kytxu, ex kykyaqiljo bꞌyol xjal,
10 ex kykyaqiljo nchi bꞌinchin aj pajil tiꞌjlbꞌinxi mejebꞌlin, ex aye nchi kyꞌaꞌjin, ichin tukꞌax jun ichin ex qya tukꞌax jun qya, exqetziꞌn jniꞌ elqꞌil xjal, ex jniꞌ sbꞌul yol, ex tkyaqiljo nkujsinte tyol, a nya twutzx, twutz kawil; ex tkyaqiljo nkubꞌ kybꞌinchin nya bꞌaꞌn tiꞌjjo xnaqꞌtzbꞌil twutzxix.
11 Ex atziꞌn xnaqꞌtzbꞌil luꞌn ikyxjo tzeꞌnku ntqꞌmaꞌn Tbꞌanil Tqanil tzꞌaqlexix, a oqxenintz weꞌy tuꞌn qMan Dios, nimxixjo tbꞌi.
Ntzaj tqꞌoꞌn Dios qipin tuꞌn qajbꞌin te
12 Kxel nqꞌoꞌn chjonte te qAjaw Jesucrist, a ma tzaj qꞌoꞌnte wipiꞌn, quꞌn ma chin ok tqꞌoꞌn tzꞌaqle twutz, ex ma chin kubꞌ tqꞌoꞌn toj taqꞌin.
13 Nejlku nim ma chin qꞌojliꞌy tiꞌj, ex ajinqiꞌn ẍin el iꞌjlin kye Ttanim, ex ma chin yasin tiꞌj. Me ma tzaj qꞌaqꞌin tkꞌuꞌj wiꞌja, quꞌn naꞌmtaq nnimiꞌn tiꞌj, ex mi n-eltaq nnikyꞌa teꞌ nbꞌanttaq wuꞌn.
14 Me nimxix t-xtalbꞌil ma tzaj tqꞌoꞌn qAjaw wibꞌaja, junx tukꞌa qnimbꞌil ex tqꞌaqꞌbꞌil qkꞌuꞌj, noq tuꞌn qmujbꞌil qibꞌ tukꞌa Crist, a Jesús.
15 Twutzxix teꞌ luꞌn, ex tkyaqil tuꞌn t-xi niminte: Qa a Crist, a Jesús, ul twutz txꞌotxꞌ tuꞌn kykletjo aj il, ex ayinkuy nimxix wila tzeꞌnku kye txqantl.
16 Tuꞌnpetziꞌn, qa ma chin kleta tuꞌn tqꞌaqꞌbꞌil tkꞌuꞌj Jesucrist wiꞌja, exsin ikyx aku klet txqantl. Quꞌn ikytziꞌn ma chin okejiꞌy te jun yekꞌbꞌil kyejo a tuꞌntaq kynimin tiꞌj, tuꞌn t-xtalbꞌil, tuꞌn tten kychwinqil te jun majx.
17 Tuꞌnpetziꞌn, kukx qqꞌonx chjonte ex qnimsiks tbꞌi qMan Dios, a Kawil tibꞌaj tkyaqil, a itzꞌ te jun majx, me a nya qꞌanchaꞌl, a oꞌkx jun Dios at. Ntiꞌ juntl. Ikyxitjo.
18 Atzin jaꞌlin, Timotey, ay nkꞌwala, kxel woqxeninjiꞌy nukꞌbꞌil lo tey: Tzꞌokxit tilil tuꞌn, tuꞌn tbꞌet-xixa wen toj tnimbꞌila ex tukꞌa tnabꞌla, tuꞌntzin tjapin tuꞌn, tzeꞌnkuxjo yolajtz tiꞌja ojtxe toj tbꞌi qMan Dios.
19 Quꞌn ilaꞌ ma chi kubꞌ tzꞌaq toj kynimbꞌil, tuꞌn mi ẍi ok lipe kyiꞌjjo lo,
20 tzeꞌnku ma bꞌaj te Himeneo ex Lejantr, ayeꞌ o chex nqꞌoꞌn tjaqꞌ tkawbꞌil tajaw il, a satanás, tuꞌntzin tajtz tiꞌj kyanmin, ex tuꞌn mi chi yolbꞌine tiꞌj qMan Dios.