Tkabꞌ Tuꞌj Pabl te Timotey
Chꞌixtaq tkyim Pabl (4:6), teꞌ tkubꞌ ttzꞌibꞌin tkabꞌ tuꞌj te Timotey. Ex axsa ntzaje tqꞌmaꞌn juntl majl a junjun xnaqꞌtzbꞌil ex nukꞌbꞌil tzeꞌnku tkuꞌx toj tnejil tuꞌj. Ex ntzaj tqꞌoꞌn junjuntl tbꞌanil tumil tzeꞌnku jun ximbꞌitz tiꞌj jaꞌ tzajnin Tyol Dios, ex tiꞌtzin tajbꞌin (3:15-17).
Exsin tzaj tnaꞌn Pabl a tnimbꞌil ex tqꞌaqꞌbꞌil tkꞌuꞌj Timotey, ex nxi tqꞌoꞌn chjonte te Dios kyiꞌjjo luꞌn. Twutz tkyaqil jniꞌ yajbꞌil n-ikyꞌx tuꞌn Timotey, nxi tkujsin te, tuꞌntzin tweꞌxix wen tzeꞌnku jun tbꞌanil xoꞌl qꞌaqꞌ te Jesucrist (2:3-4). Nxi tqꞌmaꞌn Pabl te Timotey tuꞌn mi txꞌixwe tiꞌjjo Tbꞌanil Tqanil, mo kyiꞌjjo nimil, aye skꞌoꞌn tuꞌn Dios, qalaꞌ tuꞌn tbꞌant tten tuꞌn tikyꞌx yajbꞌil tuꞌn, tuꞌn kypaj.
Ex ikyxjo, nxi toqxenin te, tuꞌn tok tkaꞌyin tchwinqil ex tuꞌn tweꞌxix tojjo tbꞌanil xnaqꞌtzbꞌil, tzeꞌnkuxjo ntqꞌmaꞌn Tyol Dios. Te kyeꞌ xjal, a at kymujbꞌil kyibꞌ tukꞌa Crist, ok chi kletil tuꞌn, toj tkyaqil nya bꞌaꞌn tzaluꞌn twutz txꞌotxꞌ, ex ok chi xel tiꞌn tzmax toj kyaꞌj, jaꞌ nkawine qMan Dios te jun majx (4:8, 18).
1
Qꞌolbꞌil tuꞌn Pabl te Timotey
1 Ayiꞌn Pabl, jun tsanjil Jesucrist; chqꞌoꞌnqiꞌn tuꞌn tajbꞌil qMan Dios, ikyxjo tzeꞌnku bꞌantnin tiꞌj tuꞌn, tiꞌjjo tkabꞌ qchwinqil noq tuꞌn s-ok qmujbꞌin qibꞌ tukꞌa Crist, a Jesús.
2 Nxi ntzꞌibꞌinjiꞌy uꞌj lo tey, a ay Timotey, nyakuj nkꞌwala, kꞌuꞌjlinxixa wuꞌn. Noqit ax qMan Dios ex qAjaw Jesucrist tzaj qꞌoꞌnte t-xtalbꞌil, ex qꞌaqꞌbꞌil tkꞌuꞌj, ex jun nukꞌbꞌil toj tkyaqil tibꞌaja.
Qo qꞌman Tbꞌanil Tqanil Crist
3 Timotey, tzeꞌnku nchin naꞌn Dios, ntzaj nnaꞌn te toj nnaꞌj Diosa qꞌijl ex qnikyꞌin, ex kukx nchin qꞌonjiꞌy chjonte te qMan, quꞌn tuꞌn nchin ajbꞌiꞌn te tukꞌa jun nnabꞌla saqxix, ikyxjo tzeꞌn ẍi ajbꞌin ojtxe nxeꞌchila.
4 Nimxix waja tuꞌn tok nkaꞌyiꞌn juntl majl, ex tuꞌn njaw ntzalaja wen tiꞌja, quꞌn tzunx ntzaj nnaꞌnjiꞌy, tzeꞌnku tej tel qpaꞌn qibꞌ tukꞌiy, quꞌn ex ox tzꞌoqꞌxa wen wiꞌja.
5 Quꞌn kubꞌ nnaꞌnjiꞌy tnimbꞌila jikyinxix wen, tzeꞌnku te tyayin, a tnejil nimil toj tjaꞌy, a Loida, exsin te tnaniy, Eunice. Ex qꞌuqlexix nkꞌuꞌja tiꞌja, qa ikyx taꞌ tejiy tnimbꞌil.
6 Tuꞌnpetziꞌn, nxi nnaꞌnxixjiꞌy luꞌn teꞌy, tuꞌn tja tiꞌn tibꞌa wen, ex tuꞌn mi tzꞌel tyajinjiy tokliꞌn, a ma tzaj tqꞌoꞌn Dios, tej tkubꞌ nqꞌoꞌn nqꞌobꞌa tibꞌaja, tuꞌn toka te jun nejinel toj Ttanim Dios.
7 Quꞌn nya jun xewbꞌaj te xobꞌajil ma tzaj tqꞌon Dios teꞌy, qalaꞌ a Xewbꞌaj Xjan, a xi tqꞌon teꞌy nim tipin, nim tqꞌaqꞌbꞌil tkꞌuꞌj, ex nim toklin tuꞌn tbꞌant ttzyuꞌnte tibꞌa wen.
8 Tuꞌntzintzjo, Timotey, mi tzaj txꞌixwiꞌy tuꞌn tyolin tbꞌi qAjaw, ex mi tzaj txꞌixwiꞌy tuꞌn ma chin kux jpuꞌn toj tze noq tuꞌn tpaj. Ex ikyxjo te, kꞌaꞌ tzikyꞌx tuꞌn, jniꞌ yajbꞌil tzul toj tchwinqila, noq tuꞌn tpajjo Tbꞌanil Tqanil qMan Dios, quꞌn ex ax ktzajil qꞌonte tipin toj tkyaqil.
9 Quꞌn ma qo klet tuꞌn, ex ikytzin ma qo ttxok, tuꞌn qok te tzꞌaqle twutz, nya tuꞌnxjo qbꞌinchbꞌin, qalaꞌ ikyxtaq t-ximjo atxix ojtxe, tej naꞌmxtaq tkubꞌ xkye twutz txꞌotxꞌ, qa tuꞌntaqx ttzaj tchqꞌoꞌn Crist, a Jesús, noq tuꞌn t-xtalbꞌil.
10 Ex o tzaj tyekꞌin tqꞌaqꞌbꞌil tkꞌuꞌj qe, teꞌ tul Jesucrist, a Kolil, a kubꞌ tiꞌj kyimin tuꞌn. Ex tuꞌn Tbꞌanil Tqanil kolbꞌil, ma tzaj tqꞌoꞌn jun chwinqil qe, a mixla jtojx tuꞌn tbꞌaj.
11 Ma chin jaw tskꞌoꞌn Dios te yolil teꞌ Tbꞌanil Tqanil kolbꞌil anetziꞌn, ex te tsanjil, ex te xnaqꞌtzil.
12 Ex noq tuꞌn tpajjo lo, n-ikyꞌx jniꞌ nya bꞌaꞌn wuꞌn. Me ex nlay chin tzaj txꞌixwiꞌy te luꞌn, quꞌn ma tzꞌel nnikyꞌa teꞌ Jesús, a ma txi nnimiꞌn, ex qꞌuqlek nkꞌuꞌja tiꞌj, qa at tipin tuꞌn tnaꞌyit, ex tuꞌn tkꞌuyitjo tkyaqiljo ma txi woqxeniꞌn te, ajxi tjapin tqꞌijil.
13 Lipektzin tiꞌj tkyaqiljo xnaqꞌtzbꞌil ma txi nyekꞌiꞌn tey; ex tuꞌn tokin te jun yekꞌbꞌil tiꞌj qnimbꞌil, ex tiꞌj tqꞌaqꞌbꞌil qkꞌuꞌj, noq tuꞌn qmujbꞌil qibꞌ tukꞌa Crist, a Jesús.
14 Ex tukꞌa onbꞌil tuꞌn Xewbꞌaj Xjan toj qanmin, niminkutzinjiy tbꞌanil xnaqꞌtzbꞌil, a ma kyij woqxeniꞌn teꞌy.
15 Bꞌiꞌnl tuꞌn, qa jniꞌ erman toj txꞌotxꞌ te Asia ma chin kyij kytzaqpiꞌn, tzeꞌnku Figelo ex Hermógenes.
16 Noqxit ax qMan Dios tzaj qꞌaqꞌin tkꞌuꞌj tiꞌj Onesíforo kyukꞌa tbꞌaj toj tja. Quꞌn ilaꞌku maj, ul qꞌuqbꞌil nkꞌuꞌja, ex mix tzaje txꞌixwe, tuꞌn jpuꞌnqinkuxa toj tze noq tuꞌn tpaj taqꞌin Dios.
17 Qalaꞌ noqx teꞌ tkaninku Rom, ok ten pitkꞌajil wiꞌja, tzmaxiꞌ tej nknet-xa tuꞌn.
18 Noqxit ax qAjaw tzaj qꞌaqꞌin tkꞌuꞌj tiꞌj tojjo tqꞌijil, aj tul juntl majl, ex ajinkuy bꞌilte jniꞌxsin xmojin qukꞌa, tej otoꞌxtaq tojjo tnam Éfeso.