Tuꞌj Pabl te Tito
Tito tbꞌi jun xjal nya aj Judiy, ex otaq nimin tiꞌj Jesucrist (Gal. 2:1-3). Otaq kyij tqꞌoꞌn Pabl Tito tojjo tal muchꞌ txꞌotxꞌ tkuꞌx toj ttxuyil aꞌ, Creta tbꞌi, exsin o txi qꞌoꞌn toklin tuꞌn tok tchmoꞌn jun chꞌuq nimil antza. Tzeꞌnqeku tuꞌj Pabl te Timotey, ikytzin uꞌj luꞌn nojne tuꞌn nimku tqꞌaqꞌbꞌil tkꞌuꞌj ex ttzaljbꞌil tiꞌj Tito.
Te tnejil, a uꞌj luꞌn ntqꞌoꞌn junjun tumil kyiꞌjjo nejinel kyxol nimil ex jniꞌ kyoklin exjo t-xilin kychwinqil. Atzin luꞌn junx tyol tukꞌa uꞌj xi ttzꞌibꞌin te Timotey (2Tim. 3:1-13). A kynabꞌl ex kychwinqil ex kyxnaqꞌtzbꞌil bꞌaꞌnxix tuꞌn tok te yekꞌbꞌil kywutzxjal, quꞌn attaq nimku xnaqꞌtzil, a nya twutzxix kyyol, ex bꞌeꞌx i kubꞌ kysbꞌuꞌn kynabꞌl nimku xjal tukꞌa kyxnaqꞌtzbꞌil.
Te tibꞌajxi, ntzaj toqxenin Pabl te Tito tuꞌn t-xi tqꞌmaꞌn tzeꞌn tuꞌn kybꞌete ilaꞌku chꞌuqxjal toj tumilxix toj Tanim Dios (cap. 2). Toj toxin capítulo, nyolin Pabl tiꞌj junjun tumil, tzeꞌn tuꞌn kybꞌete tkyaqil nimil toj kychwinqil.
1
Xi ttzꞌibꞌin Pabl jun uꞌj te Tito
1 Ayiꞌn Pabl, nxi ntzꞌibꞌinjiꞌy uꞌj luꞌn, quꞌn jun taqꞌnil qMan Diosqiꞌn, ex jun tsanjil Jesucrist, chqꞌoꞌnqiꞌn tuꞌn, tuꞌn kyniminxjal, a skꞌoꞌnqe tuꞌn Dios; ex tuꞌntzin tel kynikyꞌ tiꞌj Tyol, a twutzxix, noq tuꞌn kukx tuꞌn kyximiꞌn tiꞌj Dios.
2 Tkyaqiljo lo tzajnin tiꞌjjo jun qꞌuqbꞌil qkꞌuꞌj tiꞌjjo chwinqil te jun majx, ikyxjo tzeꞌnku tqꞌma Dios, atxix tej naꞌmtaq tuꞌn tkubꞌ xkye tkyaqil. Ex atzin anetziꞌn o tzaj tqꞌmaꞌn Dios, ex nlay qo kubꞌ tsbꞌuꞌn.
3 Me atzin jaꞌlin, ma kanin tqꞌijil tuꞌn tyekꞌin te Diosjo Tyol kyexjal, noq tuꞌn xi nyolinjiꞌy Tyol, a oqxenintz weꞌy tuꞌn, a Klolqe te jun majx.
4 Nxi ntzꞌibꞌinjiꞌy uꞌj luꞌn tey, Tito, a ay ma tzꞌoka tzeꞌnku jun nkꞌwala, tuꞌn ma nimiꞌn tzeꞌnku weꞌ tiꞌjjo Tbꞌanil Tqanil, a xi nqꞌmaꞌn tey. Wajatlaꞌy noqit ax qMan Dios ex qAjaw Jesucrist, a Klolqe, tzaj kyꞌiwlintiy tukꞌa t-xtalbꞌil, ex tuꞌn tten jun nukꞌbꞌil toj tchwinqila.
A taqꞌin Tito toj txꞌotxꞌ Creta
5 Tej tkyij nqꞌoꞌn toj txꞌotxꞌ Creta, kyij nqꞌmaꞌn tey tuꞌn tkubꞌ tbꞌinchinjiy a naꞌmx tuꞌn tbꞌant, ex tuꞌn kyjaw tskꞌonjiꞌy nejinel toj Ttanim Dios te junjun tnam, ikyxjo tzeꞌnkuꞌ xi woqxeniꞌn tey.
6 Jun nejinel toj Ttanim Dios, il tiꞌj tuꞌn tnajan tzꞌaqle toj tkyaqil, tuꞌntzin mix aꞌl jun aku tzaj qꞌmante jun tiꞌ tiꞌj. Il tiꞌj tuꞌn tten junxchꞌin t-xuꞌjil, ex aye tkꞌwal, il tiꞌj tuꞌn kyok te nimil, ex nya meltzꞌil kyibꞌ, tuꞌntzintla ntiꞌ jun yol ktzajil kyiꞌj, tuꞌn nya wen kybꞌinchbꞌin.
7 Quꞌn ayetzin xjal luꞌn at-xix kyoklin tuꞌn kyok te nejinel toj Ttanim qMan Dios, ex ma tzaj tabꞌtzin Dios jniꞌ taqꞌin kye. Tuꞌnpetziꞌn, il tiꞌj tuꞌn tten jun kychwinqil jikyin wen. Ex nya wen tuꞌn tok jpet kynabꞌl, ex nya aj qꞌojilqe, ex nya txꞌujtinelqe, ex nya aj yasilqe, ex mina pon kykꞌuꞌj tiꞌj jun kykanebꞌ nyaxix toj tumil.
8 Qalaꞌ, jun nejinel toj Ttanim Dios il tiꞌj tuꞌn tkubꞌ t-xkꞌaꞌmin bꞌetin xjal toj tja, ex tuꞌn tbꞌinchin bꞌaꞌn toj tkyaqil, ex at-xix tnabꞌl, ex tzꞌaqle toj tchwinqil, ex tzyuꞌn tibꞌ tiꞌj jniꞌ nya bꞌaꞌn.
9 Ex il tiꞌj tuꞌn tok lipe tiꞌj Tbꞌanil Tqanil, a ma tzaj yekꞌin, tuꞌntzin tbꞌant tnimsin kykꞌuꞌj txqantl tukꞌa jun xnaqꞌtzbꞌil bꞌunin, ex tuꞌn t-xmoxin kyiꞌjjo a nchi yolbꞌin tiꞌj.
10 Il tiꞌj jun nejinel ikyjo, quꞌn tuꞌn at nim xjal ajqꞌoj tiꞌj Tbꞌanil Tqanil. Ex nimku xjal ntiꞌ tajbꞌin kyyol, ex nchi kubꞌ kysbꞌuꞌn txqantl. Kyxoljo xjal luꞌn nimku nkyqꞌmaꞌn, qa il tiꞌj tuꞌn tok kyechil tiꞌj kytzꞌumil tzeꞌnku kyij tzꞌibꞌin toj Tuꞌjil Tyol Dios, qa kyajxjal tuꞌn kykyij toj wen tukꞌa Dios. Me tkyaqiljo yol luꞌn, nya twutzx.
11 Tuꞌnpetziꞌn, il tiꞌj tuꞌn t-xi yekꞌit qa ntiꞌ tumiljo kyxnaqꞌtzbꞌil luꞌn, tuꞌn mi chi xnaqꞌtzinil, quꞌn nchi najsin kynabꞌl nimku xjal, ex nchi bꞌinchin mibꞌin kyiꞌj. Ex tkyaqiljo lo nchi xnaqꞌtzin xjal luꞌn noq tuꞌn kykanbꞌin pwaq.
12 Ex jaw weꞌ jun nmaq yolil kyxol xjal aj Creta, ex chiꞌ kyjaluꞌn kyiꞌjx t-xjalil:
Aye aj Creta noqx ikyꞌil yolqe, ex ntiꞌ kynabꞌl;
noqx nchi bꞌinchin tzeꞌnku ntqanin kyxmilil; manyor loꞌlqex ex manyor kyꞌajqexch.
13 Ex twutzxixjo, a o tqꞌma. Tuꞌnpetziꞌn, il tiꞌj tuꞌn kyxi kawit, tuꞌntzin kyel wen toj kynimbꞌil tiꞌj qMan Dios,
14 ex tuꞌn mina txiꞌ ambꞌil te kyxnaqꞌtzbꞌil xjal aj Judiy, a ntiꞌ tumil, ex a tzajnin kye ojtxe qxjalila; ex tuꞌn mina txi kybꞌiꞌnjiꞌy a kyajbꞌil, quꞌn aye xjal luꞌn ma kyij kyiꞌjlin a yol twutzxix.
15 Me metzin kye nimil, a tzꞌaqle taꞌ kynabꞌl, wen teꞌ te kye tkyaqil. Me ayetzin kye nya tzꞌaqle toj kynabꞌl, tkyaqil n-ok kyqꞌoꞌn te nya wen, tuꞌn ma naj kyanmin ex kynabꞌl tuꞌn il.
16 Ex nkyqꞌmaꞌn xjal luꞌn qa ojtzqiꞌn Dios kyuꞌn, me tukꞌa kybꞌinchbꞌin n-ele qnikyꞌ tiꞌj, qa nya twutzxjo kyyol. Quꞌn aye xjal luꞌn manyor ikyꞌilqe, ex mibꞌin chi nimin, ex ntiꞌ kyaj tuꞌn kybꞌinchinte jun tiꞌ, a wen.