2
Hya xi canduva Hasen rë Nina
1 Hya xi camá ne, xi cavechú nixtin tsëhë suhi xi hmí Pentecostés ne, ngu cahndë́ ni camatangun xu yëjë ni xuta ladu rë Jesús.
2 Xi siu tangun me jan ne, ha tu ñahñu cahndë xu me xi jercu cafane ngajan ngahnga, sacuaha nuhya rë xi fane vanga tjo xi jemu hñu camahani. Sehe yëjë ni xuta jan ne, cahndë xu me xi canduva cafane hisca cahntsua ndihya hiscan siu me.
3 Hacuaha cavëë xu me ndihi xi langa sacuaha neje xuta, hane cavitsojo quiji casatë xu rë jima ngu jima ngu me.
4 Hya xi camá ne, catsë xu rë Hasen rë Nina xahasen rë jima ngu me jan, hacuaha cavetsihin cachja xu me jima ngu me cjuandaja rë Nina ne, cachja xu me jingu sa hne xi maji rë me, tucutjin xi Hasen jan casahmi xi camá cachja me.
5 Ngajan Jerusalén ne, siu xuta tjë rë Israel xi faharcun jain me Nina, canduva me tsëhë yëjë ni nangui xi tjin ngasunhndë.
6 Hane hya xi canuhya rë xi cuatjin jercu fane ne, jercu xutacjín camatangun xu me xi quiji cavutsejen me mé xi camá. Hane xutacjín jan ne, jemu quijircun xu rë me, tsëhë xi hora xi tichja xuta ladu rë Jesús ne, xuta jan ne, hne ni rë suva me cahndë me jima ngu me xi cuacun jan.
7 Ngajan xi cachja xu me cojo xicjin me cuitjin:
―¿Mé nga vihi ni? ¡Yëjë ni me xi tichja vi ne, xuta distritu Galilea me!
8 ¿Hacutjin má xi jima ngu ngayaan ne, tinuhyan hne naja suvaan ta,
9 tsëhë xi jemu cjín nangui canduvan? Ngujo ngayaan ne, xuta Partia ngayaan. Ngujo nga ngayaan ne, xuta Media ngayaan. Cojo sa xuta Elam, xuta Mesopotamia, xuta Judea, xuta Capadocia, xuta Ponto, xuta Asia,
10 xuta Frigia, xuta Panfilia, xuta Egipto, xuta ladu Libia, tiñataha nandya xi hmí Cirene, xuta Roma,
11 xuta Creta, xuta Arabia. Ngayaan xuta ngu nangui xi macjain naja Nina rë xuta tjë rë Israel ne, jemu cjín ngayaan xi nechanyanjñe nguehe ngajñi rë xuta tjë rë Israel. Hacuaha ngayejen ngarca ni tinuhyan xi tichja me hne naja. Tichja me tsëhë cjuandaja xi jercu casahmi Nina. ―Cuatjin xu cachja xuta xi cuacun jan.
12 Hane tsëhë xi cuatjin camacjíncacun me xi jemu quijircun camahani rë me ne, cavinenguise xicjin xu me cuitjin:
―¿Mé rë meje cuichja xcusun vi? ―Cuatjin cavinenguise me.
13 Peru yahnga me ne, catsixcuehyu me xuta ladu rë Jesús, hane cachja xu me ta chihi xuta jan.
Cjua xi cachja Pedru
14 Hya xi camá ne, caxinchacun yëjë tengu apóstol jan ne, sehe cachja xu Pedru cojo xutacjín jan cuitjin:
―Ngayujun ngarcun ni ngayun xuta tjë rë Israel xi nechun nguehe Jerusalén matsejen ne, tinuhyun ngujo cjua xi cuichjá cojo nuju vi, cojo sa xi cumachaya nuju.
15 Ngayujun ni matsejen ne, nújun ta me xi cuicun vi ne, chihi me. Peru quixiin xi nújun ta ndicumaha ni ne, sehe fane ñaja tsëhë nguitajñu.
16 Peru xcusun xi sehe cavatju camá nguehe matsejen ne, cavetjucaa cjua xi cachja xutachanga naja profeta Joel hatsëë nixtin, hya xi catsihindu me cjua xi casua Nina. Cuitjin catsihindu me:
17 Cjua xi cuicun vi xi chja Nina cojo naja:
Hya xi cuma tiña nixtin xi cjuë ngasunhndë ne,
hya tsingátju Hasen naha xi cuisehen xahasen rë xuta jingujyë ni ngasunhndë;
hane quihndi nuju, sa chjuun sa xihin ne, suacuenda me cjua naha,
hacuaha cha nixti nuju cojo xuta changá nuju ne,
cuichja chini cojo rë me tsëhë cjuatacun naha.
18 Hacuaha nixtin hya ne, tsingátju Hasen naha xi cuisehen xahasen rë me xi sahmi cjuatacun naha, sa chjuun, sa xihin,
hane me vëhë ne, suácuenda me cjua naha.
19 Hya sahme xcusun cjuarcun vihi ngajan ngahnga, cojo nguehe nangui xi chutsujun:
cuáxëcaa jni, cojo ndihi, cojo nihndi cjín.
20 Tsuhi ne, cuma jma;
sá ne, cuma hani sacuaha jni.
Cuatjin cuma hya xi chaja sa xi cuechú nixtin xi ngahan xi Nina ngahan ne, tsichúva yëjë ni xuta cojo cjuatacun rë me;
ngu nixtin jyë ngu nixtin ndajyihi nixtin vëhë.
21 Hane nixtin hya ne, yëjë ni xuta xi cjuehya ná me cjuandaja naha ngahan xi Nina ngahan ne,
cuetjutje me.
Cuatjin catsihindu profeta Joel cjua xi cachja Nina.
22 Cjuinduju sa tichja Pedru cjua vihi:
―Quihndë matsejen ne, tinuhyun cjua xi cuichjá cojo nuju, ngayujun ngarcun ni xuta tjë rë Israel. Jesús, me Nasaret matsejen ne, camachaya naja xi Nina catsingatju rë me matsejen ta, tsëhë xi jemu cjín xcusun cjuarcun casahmi me ngajñi naja sacuatjin xi ha ndaja hyun. Camá casahmi me cjuarcun jan matsejen ta, ngatsë rë xi Nina casua rë me cahndë́ xi cuatjin casahmi me.
23 Nina matsejen ne, ha vëë me yëjë ni xcusun. Vëhë xi cojo tjun sa ne, ha catsingataha cacun me ta Jesús vë ne, cuma me entregadu cojo xuta tsehen. Cuatjin cavejña Nina cjuatacun rë me hisca chaja sa xi cuetjucaa xcusun vëhë. Sacuaha xi ngayun canicuhun Jesús ta, ngatsë nuju xi cavetaha xuta tsehen me xcun cru.
24 Peru cavëhëndaya Nina me tsëhë cjuaveya, catsicuya me me cjuahñu ta, tsëhë xi hatuxa camaji xi cavéjña me ngahma gubiernu rë cjuaveya.
25 Xutachanga naja David matsejen ne, catsihindu me tsëhë Jesús cuitjin:
Cahvë Nina xi cjui titjun me tsahan yëjë ni nixtin;
ticojo ná me, cojo sa xi tsajin mé cuma ná.
26 Vëhë xi xahasen naha ne, jemu sua rë, hacuaha ntsuva ne, suvá cjuandaja chjá.
Hacuaha vëhë xi ngahan ne, vetahá cácun Nina.
27 Cuatjin sahme ta, tsëhë xi ngayun Nina ne, hacuiin nismutacun hasen naha xi cuejña ngajan Hades hiscan siu nima,
hacuaha hatuxa tuun cahndë́ xi cjuehndu yojo naha, ngahan xi hatuxa tjënguë nuju cojo yëjë xahasen naha.
28 Ngayun ne, catuhun camachaya ná ndiya xi cuéchu hiscan sacú ná cjuahñu ndajyihi.
Hacuaha ninguitsun rë xahasen naha cjuasua xi cuéchutaha nuju hiscan nechun.
Cuatjin catsihindu David.
29 Hacuaha cachja sa Pedru cuitjin:
―Ngayujun ngarcun ni matsejen ne, nguehe cuichjáquixë cojo nuju matsejen ta, xutachanga naja David ne, cahme me, hacuaha caseyaniji me hatsëë nixtin. Hane tsjun rë me ne, tacun cuaha hisca quihndë hiscan xi cavéjña.
30 Peru xi chaja sa xi cueya David jan matsejen ne, ngu profeta me, hacuaha ha vëë me xi ha cachja Nina cojo rë me cuitjin: Ngahan suva hvë xi ngu xuta tjë riji ne, cuitexa rë xuta, sacuatjin tivitexe ngaye. Cuatjin cachja Nina cojo David.
31 Vëhë xi camachaya rë David xcusun xi sahmi Nina ngascan. Ha vëë me xi cuya nga cjuahñu me xi tsingatju Nina, hane vëhë xi cachja me ta hacuaha hacuiin cuejña me vëhë ngajan Hades ngajñi rë nima, hacuaha hacuiin cjuehndu yojo rë me.
32 Hane ngayijin ni matsejen ne, cahyin suvin xi Jesús, me xi catsingatju Nina vë ne, catsicuya Nina me cjuahñu.
33 Hane quihndë matsejen ne, ha catsiquijin Nina me xi cavechú me ngahnga hiscan véjña suvá Nina. Hacuaha cafahatsja me Hasen rë Nina sacuatjin xi cachja Nina Nahmi rë me xi sua rë me. Vëhë xi Jesús matsejen ne, tisahmi me xcusun xi tijima nguehe ngajñi niji.
34 Xi tsejen ne, cachjaain David tsëhë suvá me ta, tsëhë xi hacuiin quiji me ngahnga sacuatjin quiji Jesús matsejen ta, catsihindu sa me cuitjin:
Nina ne, cachja me cojo Nai naha cuitjin:
“Tinechin nguehe, ladu quixi naha,
35 hisca hya xi yëjë ni xi sahmi ri condra ne, cuiyujú ngahan ngahma gubiernu riji.”
Cuatjin catsihindu David hatsëë nixtin.
36 ’Vëhë xi ngayujun ni xuta nangui Israel matsejen ne, ndaja catijne rcun cjua xi chjá cojo nuju vi: Jesús vë, me xi ngayun catuhun xi cahme xcun cru matsejen ne, Nina casahmi me xi me vëhë ne, camá me Nai naja hacuaha catsingatju Nina me xi cuaxëtje naja me. ―Cuahaxutjin cachja Pedru cojo xutacjín jan.
37 Xi cahndë xutacjín jan cjua vëhë ne, jemu choho camá rë me. Ngajan xi cavinenguise me Pedru cojo apóstol xi yahnga jan cuitjin:
―Xi má nuju ngayun ne, ¿mé xi ndatjin nihñi? ―Cuatjin cavinenguise xuta jan.
38 Ngajan xi cachja xu Pedru cojo rë me cuitjin:
―Nindeyun cjuatacun nuju. Hacuaha jima ngu ngayun ne, catixtenda ngayun, ngatsë rë xi camangu tacún cojo Jesucristu, sehe ngajan xi tsinchataha nuju Nina tsëhë jyë́ nuju. Xi cuatjin ne, hacuaha sahmi me cjuandaja xi sua nuju me Hasen rë me.
39 Cjuandaja vëhë ne, ha cachja Nina xi sua nuju me ngayun cojo quihndi nuju, hisca cojo yëjë xuta tjë nuju. Nina naja ne, sua me cjuandaja vëhë xi cuma rë yëjë ni xuta xi cuaxijin me. ―Cuahaxutjin cachja Pedru.
40 Hacuaha jemu cjín sa cjua cachja me cuitjin, hacutjin meje rë xi sahmi xuta jan:
―Naxunxun yojo nuju tsëhë xuta tsehen xi siu quihndë. ―Cuatjin cachja xu me.
41 Ngajan xi xuta xi cachuya rë me cjua xi cachja Pedru ne, caxtenda me. Hane cuatjin xi nixtin vëhë xu ne, sacuaha jyan mil xuta xi cavisehen me ladu rë Jesús.
42 Casua me yojo rë me cojo cjua xi tivicuya apóstol jan, hacuaha nguñaja cacun xu me xi ma tangun me cojo yëjë sa xuta ladu rë Jesús. Nchunchujun ni ne, camatangun me cojo xicjin me xi sahmi me oración, cojo xi sinë tangun me niñu.
Cjuandaja xi caviyuju xuta ladu rë Jesucristu cojo xicjin me
43 Jemu cjín xcusun xu cjuarcun casahmi apóstol ngatsë rë ngahñu xi casua Nina me, hane vëhë xi yëjë ni xuta xi hacuiin ladu rë Jesús ne, jemu tsacjun me.
44 Peru yëjë ni xuta ladu rë Jesús ne, camatangun xu cjuatacun rë me, hacuaha yëjë ni xcusun xi tsëhë jima ngu xu me ne, hacuaha camá tsëhë yëjë ni me xi yahnga jan.
45 Caviteña xu me xcusun xi tjin rë me ne, sehe cavatëcja xu me tujún ngajñi rë yëjë ni me xi casahmi chaja rë.
46 Nchunchujun xu ni ne, camatangun me nguñaja cacun me ngajan yungun xi matitjun xi cjuaharcun me Nina. Hacuaha xi cajinë xu me niñu ndava me cojo xicjin me ne, jemu cojo cjuasua, cojo cjuandaja cojo cjuajeya.
47 Hacuaha jemu cavaxëndaja me Nina. Hane yëjë xuta xi yahnga jan ne, xi cavëë xu me xcusun rë xuta ladu rë Jesús jan ne, cachja xu me ta xuta ndaja me xi cuacun vë. Hacuaha nchunchujun ni ne, tivaxëtje Nai naja ngujo ngujo sa xuta. Vëhë xi nchunchujun ni ne, jima cjín sa xuta yungun jan.