25
Cafehya Pablo xi cuma me consina tsja César
1 Hya xi camá ne, cafehe Festo xi cjuahaxa me ngajan Cesarea. Hane xi cafë jyan nixtin ne, cavetju me quiji me Jerusalén.
2 Hane xi cafehe Festo ngajan Jerusalén ne, nahmi xi matitjun cojo me xi matitjun tsëhë ngajñi rë xuta tjë rë Israel ne, casua me camachaya rë Festo tsëhë jyë́ xi vincha me tsëhë Pablo.
3 Hane cafehya me favor xi tsingatju Festo cjue chjahá rë Pablo xi cjue me ngajan Jerusalén. Cuatjin meje rë me xi cuma ta, tsëhë xi ha cavisiajmichihin me xi tsiquehen me Pablo ngajan ndiya.
4 Ngajan xi Festo ne, cachja me ta Pablo ne, tacunñihi me ngajan Cesarea, hacuaha suvá Festo ne, ha cjue xati me ngajan.
5 Hacuaha cachja sa me cuitjin:
―Catji xutaxa rë yungun nuju cojo ná, hane sa xi tjin mé jyë́ rë cha ne, ngajan catincha me jyë́ rë cha cojo ná. ―Cuatjin cachja me.
6 Hya xi camá ne, cavejña sa Festo ngajan Jerusalén sacuaha jyin o sa të nixtin, sehe cafe me Cesarea. Hane camá nchujun tsëhë nixtin xi cafehe me jan ne, quiji me cavéjña me xcun xa rë me, sehe cavitexa me cjue chjahá rë Pablo.
7 Hane xi cafehe Pablo ne, quiji caxinchacunndee xuta tjë rë Israel xi canduva tsëhë Jerusalén jan tjehen rë me, hane jemu cjín xcusun jyë́ rë Pablo xi cavincha me, peru hisca camaji catsinguixi me xi cjuaquixi jain.
8 Hane Pablo ne, xi casua me cjuaquixi rë me ne, cuitjin cachja me:
―Tsajin camahani mé jyë́ xi casahme, hacuiin condra rë ley niji ngayin xuta tjë rë Israel ne, hacuiin condra rë yungun xi matitjun tsijin ne, hacuiin condra rë César, me xi matitjun tsajan. ―Cuatjin cachja Pablo.
9 Hane xi meje sahmi Festo cjuandaja cojo xuta tjë rë Israel ne, cuitjin cafinenguise me Pablo:
―¿Há meje cuihin Jerusalén, cojo sa xi ngajan tsichúva ri cojo jyë́ riji vi? ―Cuatjin cafinenguise me.
10 Ngajan xi Pablo ne, cuitjin cafayangui me:
―Ha ndihyavasen rë César, me xi matitjun camahani, sécun, hane ha nguehe xi meje rë xi chjahachuva ná cojo jyë́ naha. Xuta tjë rë Israel ne, tsajin camahani mé xi choho sahme cojo rë me. Ngayun ne, ha ndaja hyun.
11 Sa xi tsejen ta casahme ngu xcusun xi vechú chuva rë xi cueya ne, tsingatehen xi cueya. Peru sa xi tsajin cjuaquixi tsëhë hisca ngu jyë́ xi vincha me tsahan ne, tsajin yo xi cuma sahmi ná entregadu tsja xuta xi cuacun vë. Ngahan ne, féhya nuju xi nihñu ná consina tsja César, me xi matitjun camahani. ―Cuatjin cafayangui me.
12 Ngajan xi Festo ne, xi cavisiajmicjín me cojo yëjë me xi visecoo rë me ne, sehe cachja me cuitjin cojo Pablo:
―Cachjahye xi sahme ri consina tsja César ne, tsja César tsingátju ri. ―Cuatjin cachja Festo.
Cavisehen Pablo xcun Agripa
13 Hane xi cavatju ngujo nixtin jan ne, ngu me xi matitjun tsëhë jingu sa distritu, me xi hmí Agripa ne, cafehe me Cesarea cojo Berenice na xicjin me, xi sua me ngu nina Festo.
14 Hane tsëhë xi caviyuju me ngujo nixtin jan ne, cachja Festo cojo rë me tsëhë cjuacjintacun xi tacun tsja me tsëhë Pablo. Cuitjin cachja me:
―Nguehe ne, tacunñihi ngu cha xi cavejñavasen Félix cjuacjintacun rë.
15 Hya xi cëjë Jerusalén ne, nahmi xi matitjun cojo xuta changá tsëhë xuta tjë rë Israel ne, casua me camachaya ná tsëhë cha vëhë, hacuaha cafehya me xi cuichjá xi cuma cha castigu.
16 Peru ngahan ne, cachjá cojo rë me ta ngayin xuta Roma ne, tsajin niji xcusun xi nihñi castigu ngu xuta xi hincha jyë́ rë me jinguyëjë rë xi cjëë cuisehen me xcun cojo xcun cojo me xi vincha jyë́ rë me, hacuaha sacú rë me cahndë́ xi sua me cjuaquixi rë me tsëhë jyë́ xi hincha tsëhë me.
17 Hane hya xi cafehe yëjë xuta xi cuacun vë nguehe ne, catsichajan hora ta xi tu camá nchujun jan ne, cëjë ndihyavasen ne, catsingatju quiji chjahá rë cha.
18 Hane xi caxinchacun xuta xi cuacun jan cachja me ne, hisca ngu jyë́ jyë sacuatjin tsingátaha cácun ne, cavinchaain me tsëhë cha ta,
19 suvá ni cjua tsëhë xcusun rë yungun rë me xi casahmichiin xu cha, cojo cjua tsëhë ngu nima xi hmí rë Jesús, xi chja cha ta tacun quicun.
20 Peru ngahan ne, casacuinyiin ná hacutjin sacú ná cjuaquixi tsëhë cjuacjintacun vëhë ne, cafinenguësë rë cha sa xi meje cjue cha Jerusalén hane ngajan chjahachuva rë cha tsëhë cjuacjintacun xi yaha rë cha.
21 Peru tsëhë xi cafehya cha xi seyañihi sa cha hisca xi suvá me xi matitjun camahani tsichuva me cjuacjintacun rë cha ne, cavitéxa xi quiji caseyañihi sa cha hisca hya xi cuma tsingátju cha tsja me. ―Cuatjin cachja Festo.
22 Ngajan xi Agripa ne, cuitjin cachja me cojo Festo:
―Ngahan ne, hacuaha catsingátahacácun xi cuisiñujú cjua rë cha xi cuajyihi vë. ―Cuatjin cachja me.
Hane Festo ne, cuitjin cafayangui me:
―Sa cuatjin ne, nchujun ni cuisiñuju cjua rë cha. ―Cuatjin cafayangui me.
23 Hane xi camá nchujun jan ne, ngu cjuandya jyë tjin xi cafehe Agripa cojo Berenice. Hane quiji cavisehentangun me ndihyavasen cojo yëjë capitán cojo yëjë xuta xi matitjun tsëhë nandya jan. Sehe cavitexa Festo quiji chjahá rë Pablo.
24 Hane xi cafehe Pablo ne, sehe cachja Festo cuitjin:
―Ngayun Agripa, cojo ngayujun ni xi tjin tangun ngayaan nguehe ne, nguehe tacun cha vihi xi yëjë xuta tjë rë Israel ne, cavinchajyë me cha cojo ná ngajan Jerusalén, hacuaha cavinchajyë me cha hisca nguehe. Jindaya me chja me ta ha quihndë mijí rë xi cuejña sa cha cjuahñu.
25 Peru ngahan ne, casacuiin ná hisca ngu xcusun xi casahmi cha xi vechú chuva rë xi cueya cha. Hane xi cafehya suvá cha xi cuma cha consina tsja me xi matitjun camahani ne, cavejñá cácun xi tsingátju cha.
26 Peru tsajin ngu cjua xi cuma tsihindu rë nai naha, ¿há vihi ne, há vëhë casahmi cha? Vëhë xi cavitéxa xi cuisehen cha xcun ngayun, Agripa, cojo sa xi cjuë chjahantahan rë cha ne, sacú ná cjua xi tsihindu.
27 Xi má ná ne, tsajin ná cjuatacun sa xi tsingátju ngu presu hacuaha cuichjaan mé jyë́ xi caxincha tsëhë. ―Cuatjin cachja Festo.