5
1 Nca³tsˀi³ na⁴ˀmi³ti¹tjon² to⁴cho⁴ta⁴-vi⁴ tjo³jin³-ni¹, cˀoa⁴-sˀin² ni²qui³ncha¹nta³ xi³ tˀa³tsˀe⁴ cho⁴ta⁴ nqui³xcon⁴ Ni³na¹, jme¹-ni³ nca³ tsjoa¹tˀa³-si¹ni³le⁴ Ni³na¹ cjoa⁴tjao² cao⁴ njin¹ xi³ sˀe³jten⁴ xi³ tˀa³tsˀe⁴ je¹.
2 Je² xi³ ma³tse³-le⁴con³ cho⁴ta⁴ xi³ ma³jnqui³ je¹ nca³ tsi² ma³cho⁴ya³-le⁴, cˀoa⁴ nca³ xin² ntia⁴² tjio¹ma³, nca⁴ je² cˀoa⁴-ti⁴ fa³ˀai³tˀa³-le⁴ cjoa⁴ˀi³nta³.
3 To⁴jo³-sˀin² nca³ tsjoa¹tˀa³ xi³ tˀa³tsˀe⁴ je¹-le⁴ cho⁴ta⁴, cˀoa⁴-ti⁴sˀin²ni³ tjin¹ne²-le⁴ nca³ tsjoa¹tˀa³ xi³ tˀa³tsˀe⁴ je¹ xi³ ti⁴tsˀe⁴-ni³.
4 Ni⁴ˀya³-jin² xi³ ti⁴je² scoe¹-ni³ xa¹ncˀa³-ve⁴, to⁴je² xi³ Ni³na¹ qui³nchja⁴-le⁴ jo³-ni³ Aarón.
5 Cˀoa⁴-ti⁴sˀin²ni³ Cristo li²coi³ tsa³cˀa³sje³je³ya³-ni³ yao³-le⁴, nca³ ti⁴je² coan³-ni³ na⁴ˀmi³ti¹tjon², to⁴nca³ Ni³na¹ tsa³-ca³sen¹nta³ Cristo, cˀoa⁴qui³tso²-le⁴: Ji³ ni¹³ ˀnti¹-na⁴, ji³ xi³ ntˀai⁴ cˀoa⁴-sˀin² ˀnti¹-na⁴ xin³-le²³.
6 Cˀoa⁴-ti⁴sˀin² tso² nqui²jnco³cˀa²: Ji³ ni¹³ na⁴ˀmi³ xi³ ti¹jna³ nca³ntsjai², jo³-sˀin² nca³ qui³sˀe³ne²-le⁴ Melquisedec.
7 Cˀia⁴ ni⁴čhjin³-le⁴ nca³ tsˀa³mjen³ i⁴ son³ˀnte³-vi⁴, Cristo tsa³cˀe¹tsˀoa³, cˀoa⁴ qui³si³je¹ nca³nˀion¹, qui³squi³ˀntia¹. Cˀoa⁴-sˀin² qui³tsjoa³tˀa³-le⁴ je² xi³ coan³-le⁴ tsˀa³sje³ntjai²-ni³ ya⁴ cjoa⁴vi³ya³. Qui³tsa³cjon²que³ nta³ tsa³ve³xcon¹ Ni³na¹, coi³ nca³ qui³no²ˀya²-ni³le⁴.
8 Nta³ tsa² cˀoa⁴-sˀin² ˀnti¹-le⁴ coan³, to⁴tˀa³-le⁴ cjoa⁴ñˀain³ xi³ tsa³cˀai²-le⁴ coan³-le⁴ nca³ nta³ qui³si³tjo³son².
9 Cˀia⁴ nca³ ña³qui³ cjoa⁴qui²xi⁴ je³ji³tjo³son²-le⁴, cˀia⁴ coan³ nai³-le⁴ cjoa⁴vi³tjo³ntjai² nca³ntsjai² xi³ tˀa³tsˀe⁴ nca³tsˀi³ xi³ si¹tjo³son²-le⁴.
10 Ni³na¹ tsa³ca³sen¹ Jesús na⁴ˀmi³ti¹tjon², jo³-sˀin² nca³ qui³sˀe³ne²-le⁴ Melquisedec.
A³li² xin²-jin² ntia⁴² cjoian¹
11 Tse³ tjin¹ xi³ to⁴jo³ tjin¹-na³jin⁴ nca³ coi⁴no²cjoai⁴-jin⁴ xi³ tˀa³tsˀe⁴, cˀoa⁴ ñˀain³ tjin¹ nca³ ni²qui²xi⁴yai³⁴-jin⁴, nca⁴ jon² ñˀain³ no²ˀyao²³.
12 Je³-la⁴ cˀoa⁴-sˀin² maestro coaon⁴³ tsa²cai³, nca⁴ je³co²tse³ coan³cjain¹-no³, to⁴nca³ ma³chjen¹-no³ nca³ coa⁴co²ya³ nqui²jnco³cˀa²-no³ jña³-le⁴ cjoa⁴ xi³ ti¹tjon² tsa³cˀe¹tsˀia⁴cao⁴-ni³ je² en¹-le⁴ Ni³na¹. Cˀoa⁴-sˀin² cji³mao³ jo³-ni³ tsa² xi³ ˀnti¹, xi³ ma³chjen¹-sa³le⁴ nta¹chi³qui³, a³li²coi³ ma³chjen¹-no³ tso³jmi² xi³ ta²ja³.
13 Cˀoa⁴ nca³tsˀi³ xi³ cˀoa⁴-sˀin² vˀa³cao⁴tˀa³-le⁴ nta¹chi³qui³, li²coi³ tjio¹nta³ nca³ coan⁴cho⁴ya³-le⁴ je² en¹ xi³ ña³qui³ cjoa⁴qui²xi⁴, nca³ cˀoa⁴-sˀin² ˀnti¹-sa³.
14 To⁴nca³ je² tso³jmi² xi³ ta²ja³, coi³ xi³ ma³chjen¹-le⁴ je² xi³ je³coan³jcha¹, xi³ nˀion¹ coan³nca³cao⁴-le⁴ je² cjoa⁴fa³ˀai³tsjen³-le⁴ nca³ ma³-le⁴ fa³ˀa¹jin³ je² xi³ nta³, cˀoa⁴ je² xi³ tsˀen⁴.