16
Is Pista te Kedlavey te Belinsuǥuen
1 “Silibraha niw is Pista te Kedlavey te Belinsuǥuen te vulan he Abib para te kebeǥey te zengeg diyà te Nengazen he Megbevayè niw, su zutun he vulan impeǥawas kew zin diyà te Ehipto te mezukilem.
2 Pemuhat kew te kerehidu etawa vaka zutun te kedsilibraha niw te Pista te Kedlavey te Belinsuǥuen. Ipemuhat niw heini para te Nengazen he Megbevayè niw ziyà te lugar he ebpilien din he zutun sikandin ebeǥayi te zengeg.
3 Keena niw heini zuma te supas he wazè din tapey. Seled te pitu he andew kaan kew te supas he wazè din tapey iring te mibeelan niw hein egaanggaan kew is egenat puun te Ehipto, keenà niw heini he supas he simbulu te ked-antus niw, su para metenuzi niw seled te tivuuk he untung niw is timpu te kegawas niw puun te Ehipto.
4 Kinahanglan he wazà tapey he egkaahà diyà te menge valey niw seled te tivuuk he nasyun seled te pitu he andew. Wey kinahanglan he wazà egkesamà duen te usa he ibpemuhat taman te edsunud he meselem.
5 “Haazà is uyaǥen he ibpemuhat niw zutun te kedsilibriha niw te Pista te Kedlavey te Belinsuǥuen, ne kenè niw ipemuhat diyà te minsan hendei zà he inged he ibeǥey keniyu te Nengazen he Megbevayè niw,
6 kekenà, diyè niw zà ipemuhat te lugar he ebpilien din he zutun sikandin ebeǥayi te zengeg. Wey kinahanglan he ibpemuhat niw heini emun edsanlep en is andew he iyan kes uras te kebpuun niw ziyà te Ehipto.
7 Hilutua niw heini ne keena niw ziyà te lugar he ebpilien te Nengazen he Megbevayè niw. Ne emun meselem en ne likù kew ziyà te menge tulda niw.
8 Kaan kew te supas he wazè din tapey seled te heenem he andew. Ne te ikepitu he andew, kenè kew terebahu, kekenà, tiǥum kew te ked-azap te Nengazen he Megbevayè niw.
Is Pista te Kedraǥun
(Exodus 34:22; Leviticus 23:15-21)
9 “Bilang kew te pitu he simana puun te kebpuun te tiraǥun.
10 Ne zutun silibraha niw is Pista te Kedraǥun te kebeǥey te zengeg diyà te Nengazen he Megbevayè niw pinaaǥi te kineugelingen he menge halad niw sumalà te menge tuvad he nezawat niw puun te Nengazen he Megbevayè niw.
11 Ne medlipey kew ziyà te etuvangan te Nengazen he Megbevayè niw ziyà te lugar he ebpilien din he zutun sikandin ebeǥayi te zengeg. Silibra kew zuma te menge anak niw, menge suluǥuen niw, menge Levihanen he menge meǥinged diyà te menge inged niw, menge kenà Israilihanen, menge ilu wey menge valu he vahi he menge meǥinged diyà te menge inged niw.
12 Tentenuzi niw he menge uripen kew zengan diyà te Ehipto, umbe purungi niw sunuza heini he menge sulunuzen.
Is Pista te Kebaal te menge Lawig
13 “Silibraha niw is Pista te Kebaal te menge Lawig seled te pitu he andew zutun te kegketapus te tiraǥun, dutun te egkepasad en is kegunas te trigu wey egkekeres en is paras.
14 Medlipey kew is edsilibra kayi he pista duma te menge anak niw, menge suluǥuen niw, menge Levihanen, menge kenà Israilihanen, menge ilu wey menge valu he vahi he menge meǥinged diyà te inged niw.
15 Seled te pitu he andew is kedsilibraha niw kayi he pista te kebeǥey te zengeg te Nengazen he Megbevayè niw ziyà te lugar he ebpilien din. Su ebeǥayan kew te Nengazen he Megbevayè niw te zekelà he uzar wey edtuvazan din is langun he menge vaal niw, ne utew kew egkengelipey.
16-17 “Kada tuig, kinahanglan he edtampu is langun he menge maama niw kayi te tetelu he pista: is Pista te Supas he Wazè din Tapey, is Pista te Kedraǥun, wey is Pista te Kebaal te menge Lawig. Is kada sevaha kandan ne medhendiyà te etuvangan te Nengazen he Megbevayè niw ziyà te lugar he ebpilien din, ne kinahanglan he med-uwit sikandan te ibpemuhat dan diyà te Nengazen sumalà te egkehimu zan, sumalà te tuvad he imbeǥey kandan te Nengazen he Megbevayè niw.
Is menge Zatù
18 “Pilì kew te menge zatù wey menge upisyal te kada tribu niw ziyà te langun he inged he ibeǥey keniyu te Nengazen he Megbevayè niw. Ne heini sikandan emun ebpenhusey zan ne kinahanglan he wazà egkevintahaan.
19 Kenè dan bulegkua is hustu he kukuman ne emun edhukum sikandan kinahanglan he wazè dan edlevanan. Kenè dan medawat te suhul su is suhul ebpekepelakap te uluwanen wey metazeng, wey ebpekeipiktu te kedhukum dan.
20 Kinahanglan he egkeikul is hustu he kukuman su wey kew meuyag ne egkaangken niw sikan is tanà he ibeǥey keniyu te Nengazen he Megbevayè niw.
Is Ked-azap te Selakew en he Ed-ezapen
21 “Kenè kew pehitindeg te tukud he simbulu zuen te vahi he ed-ezapen he si Ashera ziyà te avey te pemuhatà he ebeelan niw he para te Nengazen he Megbevayè niw,
22 wey kenè kew vangun te tedeman he vatu he para te ked-azap, su egkeepesan heini te Nengazen he Megbevayè niw.”