1 Ne migkaǥi pa is Nengazen diyà te ki Job te, 2 “Iyan a Megbevayà he Mekeǥeǥehem. Piru ibpeletew nu ves diyà te kebpekidlalis nu kedì he nesayep a. Ne ǥuntaan tevaka a kenikew.” 3 Umbe, midtavak ni Job is Nengazen te, 4 “Kenà a ereg he edtavak kenikew. Hengkey is idtavak ku? Ebpereremek e zà. 5 Mezakel en is nekaǥi ku. Kenà ad ebpedayun te kegkaǥi.” 6 Ne mid-uman megkaǥi is Nengazen diyà te ki Job he ebpuun diyà te eribpures is laǥeng din, 7 “Pengandam ka, ne tevaka nu is menge insè ku. 8 Iyan be ibpeletew nu he kenà a metazeng su para medletew he iyan ka metazeng? 9 Mekeǥeǥehem ke ve iring kedì? Edraǥeb be is laǥeng nu iring te kedì? 10 Emun egkehimu nu heeyan, ne ipeheehè nu is kegkemekeǥeǥehem nu, kegkelavew nu, wey zengeg nu. 11-12 Ipeehè nu is dekelà he pauk nu te menge mepelevawen pinaaǥi te kebpekevevaa nu kandan. Ne runteka nu is menge lalung diyà te edhitindeǥan dan. 13 Ileveng nu sikandan is langun diyà te tanà, diyà te lugar te menge minatey. 14 Emun egkehimu nu heeyan, iyan a mismu edalig kenikew, ne ebpeǥumbenar a he zuen nu egkehimu te kedlibri te keugelingen nu.

15 “Ahaa nu is langgam he hipuputamus, he linimbag ku iring kenikew. Ebpenabtab dà sikandin iring te vaka, 16 piru utew sikandin mezesen. Is lawa zin ne utew melig-en. 17 Is ikug din iring te kayu he sidru, nepenù te zesen is menge vuvun din. 18 Is menge tulan din ne iring kelig-en te tuvu he brunsi etawa kebilya. 19 Edhuna heini he egkein-inuwan kenà te zuma he menge linimbag ku, piru siak is midlimbag kayi egkezaag ku heini. 20 Ebpenabtab sikandin diyà te menge vuvungan dutun te eguǥusà is leew he menge langgam diyà te uvey zin. 21 Edleku heini ziyà te lempek te ebpenuvù he zuǥiyen, he egketembunan te menge ribpes he uvey te wahig. 22 Iyan egkehimu he helungè din is ebpenuvù he menge zuǥiyen wey zuma pa he ebpenuvù diyà te uvey te zal-ug. 23 Kenè din igkahandek is deǥurus te wahig. Melinew is kegeǥehinawa zin minsan henduen be te egketembunan en te Wahig he Jordan. 24 Hentei is ebpekezakep kandin pinaaǥi te kedezeeti te mata zin? Hentei is ebpeketinlang te izung din pinaaǥi te kedhingutela kandin?