3
Midtukud Si Solomon te Baley te Nengazen diyà te Jerusalem
1 Ne mibpuunan en ni Solomon is kedtukuza te valey te Nengazen diyà te Jerusalem diyà te Buvungan te Moria, he zutun mebpaahà is Nengazen te amey zin he si David. Diyè din heini tukuza te gunasà ni Arauna he Jebusihanen, kes lugar he inteǥana ni David.
2 Mibpuunan din en heini te edtukud te ikezuwa he andew te ikezuwa he vulan, te ikeepat he tuig te kedhadì din.
3 Is pundasyun kayi te valey te Megbevayà ne 90 he ǥiek is keluǥayad ne 30 he ǥiek is keluag.
4 Is barkun diyà te etuvangan te valey te Nengazen ne 30 he ǥiek iring duen te keluag te sukud te valey te Nengazen, ne 30 zaan he ǥiek is ketikang din. Ne mid-epizan ni Solomon te lunsey he vulawan is diyà te seled kayi.
5 Ne mibpeelevatan din is lewahan kayi te valey te Nengazen te kayu he sipris wey mid-epizan te pudu vulawan, wey mibpendeyzeyanan te menge palma wey menge kedina.
6 Mibpezeyzeyanan din daan haazà is baley te Nengazen te mahalen he menge vatu wey vulawan he ebpuun pa ziyà te Parvaim.
7 Mibpeepizan din te vulawan is menge selegunting, menge ǥemawan wey menge marku kayi, wey menge elavat. Ne mideyzeyanan te in-ukir he kirubin is menge elavat.
8 Is Utew Segradu he Lugar ne 30 he ǥiek is keluag din ne 30 he ǥiek is ketikang din, iring ded is keluaǥan din duen te keluaǥan te valey te Nengazen. Ne is seled kayi ne mid-epizan te menge 23 he tunilada he vulawan.
9 Is migamit he menge ransang mid-epizan daan te vulawan he menge tengà te kilu is keveǥat. Is menge elavat te menge ruǥu he zapit te zivavew ne mid-epizan daan te vulawan.
10 Mibpevaal zaan si Solomon diyà te seled te Utew Segradu he Lugar te zezuwa he kirubin, ne mibpeepizan din heini te vulawan.
11-13 Is kada kirubin ne zezuwa is pakpak, ne is kada pakpak ne pitu wey tengà he ǥiek is keluǥayad. Umbe is keluǥayad te nevekar he menge pakpak duen te zezuwa he kirubin ne 30 he ǥiek. Is divaluy he pakpak dan ne ebpeked-uma is purù, ne is divaluy pa he pakpak dan ne ebpekesenggir te elavat.
14 Is kurtina he nekaalang duen te Utew Segradu he Lugar manggad he linu he imburda zutun is meitem is kaavuavu zin, merudtem wey kanggan, imburda zaan dutun is kirubin.
Is Dezuwa he Tukud he Brunsi
(1 Menge Hadì 7:15-22)
15 Mibaal zaan si Solomon te zezuwa he tukud diyà te etuvangan duen te valey te Nengazen, ne is ketikang te kada sevaha ne 52 he ǥiek. Is kada tukud ne zuen din ulu he is keluǥayad din ne pitu wey tengà he ǥiek.
16 Is kada ulu mideyzeyanan te impedlambid he mid-iring te kedina ne impemikit dutun is mibpen-iring te prutas he pumigranata. Nenggatus is kezakel kayi he menge zayandayan.
17 Impehitindeg din haazà is menge tukud diyà te etuvangan te valey te Nengazen. Is tukud he zapit te divavà ne migngezanan din te Jakin, ne is tukud dapit te zizaya ne migngezanan din te Boaz.