34
Is Kedhadì ni Josia ziyà te Juda
(2 Menge Hadì 22:1-2)
1 Mibpenuiǥen si Josia te walu he tuig hein nehimu sikandin he hadì. Diyà sikandin med-ubpà te Jerusalem, ne midhadì sikandin seled te 31 he tuig.
2 Meupiya is baal zin diyà te etuvangan te Nengazen ne mid-iringan din is ulaula te kepuun din he si David. Midsunud din is hustu.
3 Dutun te ikewalu he tuig te kedhadì din he vatè pa sikandin, mibpuun en sikandin medangep diyà te Megbevayà te kepuun din he si David. Ne hein ike12 he tuig te kedhadì din, mibpuunan din lumpiyuwi is Juda wey Jerusalem pinaaǥi te kebpependezeeti zin te menge simbahan diyà te metikang he menge lugar, te menge tukud he simbulu te vahi he ed-ezapen he si Ashera, zuma he menge ed-ezapen wey menge ledawan.
4 Mibpezèdeetan din daan is menge pemuhatà he para te menge ledawan te ed-ezapen he si Baal wey is menge pemuhatà he edtutungan te veyewà diyà te avey kayi. Imperuntek din is menge tukud he simbulu te vahi he ed-ezapen he si Ashera wey is duma he menge ed-ezapen wey menge ledawan, ne insawed din heini ziyà te menge leveng te menge etew he nemuhat kayi he menge ed-ezapen.
5 Impetutung din daan is menge tulan te menge memumuhat kayi he menge ed-ezapen diyà te menge pemuhatà he iyan pemuhatè dan. Pinaaǥi kayi midlumpiyuwan din is Juda wey Jerusalem.
6 Iyan daan heini mibeelan din diyà te menge inged he Manase, Efraim, wey Simeon, wey pehendiyè en te Naftali, ragkes en is nezeetan he menge inged diyà te peliǥuy kayi.
7 Mibpezèdeetan din is menge pemuhatà wey menge tukud he simbulu te vahi he ed-ezapen he si Ashera, wey imperuntek din is menge ed-ezapen wey is menge pemuhatà he edtutungan te veyewà. Ne hein nepasad din te ebaal heini ziyà te tivuuk he Israel, ne mid-ulì sikandin diyà te Jerusalem.
Naahà is Libru te Kesuǥuan diyà te Baley te Nengazen
(2 Menge Hadì 22:3-20)
8 Hein ike-18 he tuig te kedhadì ni Josia, dutun te nelumpiyuwan din en is tanà wey is baley te Nengazen, midisisyun sikandin he ebpurungan sikan is baley te Nengazen he Megbevayè din. Insarig din heini he terebahu ziyà te ki Shafan he anak ni Azalia, diyà te gubirnedur te Juda he si Maasea, wey ziyà te edumala te menge libru te ginhedian dan he si Joa, he anak ni Joahaz.
9 Heini sikandan midhendiyà te ki Hilkia he lavew he memumuhat su ibeǥey zan is selapì he mid-uwit te menge etew ziyà te valey te Megbevayà. Heini he selapì nekulikta te menge Levihanen he perevantey te ǥemawan te valey te Nengazen he ebpuun diyà te menge etew ziyà te Manase, Ifraim, wey ziyà te nesamà he menge etew ziyà te Israel, wey ziyà te menge etew ziyà te Juda wey Benjamin, ragkes en is diyà he meǥinged te Jerusalem.
10 Ne zutun, imbeǥey zan haazà is selapì diyà te menge etew he midseriǥan te kedumala te kebpurungi zuen te valey te Nengazen ne migamit dan haazà he suhul te menge terebahanti.
11 Is duma he selapì imbeǥey zan diyà te menge terebahanti su wey zan ikepemasa te vinesbasan en he menge vatu wey te menge kayu he para zutun te valey te Nengazen he minsan egkezeetan en ne mibey-anan te menge hadì te Juda.
12 Metinumanen is menge terebahanti he edterebahu. Midumala sikandan te heepat he menge Levihanen he iyan ensi Jahat wey si Obadias, he menge kevuwazan ni Merari, wey si Zacarias wey si Meshulam, he menge kevuwazan ni Kohat. Heini he menge Levihanen memetau he edtukar te menge instrumintu.
13 Iyan sikandan midseriǥan te kedumala te menge terebahanti he nekedseselekawà is menge terebahu zan. Is duma he menge Levihanen menge sikritaryu sikandan, menge peresurat te dukumintu he memetau, wey menge perevantey te ǥemawan te valey te Nengazen.
14 Ne hein egkuwaan en is selapì he nekulikta zutun te valey te Nengazen, naahà te memumuhat he si Hilkia is Libru te Kesuǥuan te Nengazen he imbeǥey ziyà te menge Israilihanen pinaaǥi ki Moises.
15 Midtudtul zin diyà te ki Shafan, he sikritaryu te hadì, he neehè din diyà te valey te Nengazen is Libru te Kesuǥuan. Ne imbeǥey zin haazà diyà te ki Shafan,
16 ne mid-uwit haazà ni Shafan diyà te hadì. Ne migkeǥiyan din haazà is hadì te, “Sikami is menge upisyal, mibeelan dey is langun he ebpeveelan nu.
17 Migkuwa zey sikan is selapì diyà te Baley te Nengazen ne imbeǥey zey ziyà te midseriǥan para te kebpurung duen te valey te Nengazen.”
18 Migkeǥiyan din pa haazà is hadì te, “Duen libru he imbeǥey kedì te memumuhat he si Hilkia.” Ne mibasa zin haazà diyà te etuvangan dutun te hadì.
19 Ne hein nezineg dutun te hadì is ingkesurat diyà te kesuǥuan, mibindas din is kumbalè din he tuus te kegkeseeng din.
20 Segugunè din mibmendui si Hilkia, wey si Ahikam he anak ni Shafan, si Abdon he anak ni Micas, si Shafan he sikritaryu, wey si Asaya he suluǥuen din. Ke sikandin te,
21 “Insai niw is Nengazen para kedì wey para te nesamà he menge etew te Israel wey Juda mehitenged te ingkesurat kayi te libru he naahà. Utew kiw nepeuki te Nengazen su wazà medtuman is menge kepuun tew te lalag te Nengazen. Wazè kiw medtuman te menge ingkesurat kayi he libru.”
22 Umbe, migenat si Hilkia wey is menge midsuǥù te hadì he ibpezuma kandin pehendiyà te vahi he ebpeneuven he si Hulda su ebpenginginsè dan kandin. Heini si Hulda ziyà med-ubpà te veǥu he vahin te Jerusalem ne esawa sikandin ni Shalum he anak ni Tokhat wey apù ni Hasra. Si Shalum iyan midseriǥan te ked-atur te menge visti ziyà te valey te Nengazen.
23-24 Migkaǥi si Hulda ziyà te kandan te, “Keǥiyi niw is etew he midsuǥù keniyu kayi te kedì he iyan heini lalag te Nengazen he Megbevayà te Israel: Edezeetan ku heini he lugar wey is menge meǥinged kayi, sumalà is ingkesurat diyà te libru he mibasa ziyà te etuvangan nu.
25 Ibpeehè ku is pauk ku kayi he lugar ne kenà heini egkeengked, su inselikwey a te menge etew ku; su midtutung dan te veyewà su mid-azap dan te zuma he menge ed-ezapen. Midhimu zan he mepauk a pinaaǥi te menge ulaula zan.
26 “Piru keǥiyi niw is hadì te Juda, he midsuǥù keniyu te ked-insà diyà te Nengazen, he kenè pa sikandin meipeng su iyan heini lalag te Nengazen he Megbevayà te Israel:
27 Mibpemineg ku is pengemuyù nu tenged te kedsendit nu wey kebpekevevaa nu te keugelingen nu ziyà te etuvangan ku hein nezineg nu is migkaǥi ku he ebpekesuǥat kayi he lugar wey te menge meǥinged kayi. Mibindas nu is kumbalè nu wey midsineǥew ka ziyà te etuvangan ku su nekedsendit ka. Umbe siak is Nengazen migkaǥi a te
28 mintras uuyag ke pa, kenè ku ebpeeǥiyan te kezeetan heini he lugar wey is menge meǥinged kayi. Ebpatey ka he melinawen, ne ed-uwiten ku sikew ziyà te zivaluy he untung.” Ne migkeǥiyan dan sikan is hadì te tavak ni Hulda.
Midsaad si Josia he Edtumanen Din is menge Suǥù te Megbevayà
(2 Menge Hadì 23:1-20)
29 Ne zutun impetawag ni Hadì Josia is langun he edumala te Juda wey Jerusalem.
30 Midhendiyà sikandin te valey te Nengazen duma te langun he menge etew ziyà te Juda wey Jerusalem puun te utew lavew is pid-etawan din pehendiyà te utew minus is pid-etawan din. Miduma zaan is menge memumuhat wey menge Levihanen. Mibasa ni Josia ziyà te kandan is langun he ingkesurat duen te Libru te Kebpekid-uyun te Megbevayà he naahà diyà te valey te Nengazen.
31 Ne midhitendeg si Josia diyà te kilid te tukud he hitindeǥà te menge hadì. Ne nenangdù sikandin diyà te etuvangan te Nengazen he edsunud sikandin te Nengazen pinaaǥi te kedtuman te menge suǥù din, menge penurù, wey menge sulunuzen, te kedtuman he ebpuun diyà te tivuuk he gehinawa zin wey kedsavut din. Ne midsaad sikandin he edtumanen din is menge ibpetuman diyà te paaǥi te kebpekid-uyun te Megbevayà he ingkesurat dutun te libru.
32 Ne migkeǥiyan din daan is menge etew ziyà te Jerusalem wey Benjamin he medsaad sikandan he edtumanen dan is paaǥi te kebpekid-uyun te Megbevayà. Umbe midtuman dan is paaǥi te kebpekid-uyun te Megbevayà, he Megbevayà te menge kepuun dan.
33 Ne zutun impepen-awà ni Josia is langun he utew mezaat he menge ed-ezapen diyà te tivuuk he tanà te Israel, ne impepenilbi zin is menge etew ziyà te Nengazen he Megbevayè dan. Dutun te uuyag pa sikandin, midsunud dan is Nengazen he Megbevayà te menge kepuun dan.