3
João Batista Eseurîmato'
(Mt 3.1-12; Mc 1.1-8; Jo 1.19-28)
1 Reiyamî' esa' pe tîwe'sen Tibério wanî'pî Roma pata esa' pe. Mia' tamî'nawîrî tîîse, mia'taikin kaisarî ipona kono' (15) kaisarî awanî'pî pata esa' pe. Mîrîrî yai Pôncio Pilatos wanî'pî Judéia pata esa' pe. Herodes wanî'pî mîrîrî yai Galiléia pata esa' pe. Moropai Herodes yakon Filipe wanî'pî Ituréia pata esa' pe, moropai Traconites pata esa' pe. Moropai Lisânias wanî'pî Abilene pata esa' pe.
2 Anás moropai Caifás wanî'pî teepîremasanon esanon pe. Mîrîrî yai Paapa eseurîma'pî Zacarias munmu, João yarakkîrî keren po.
3 Moropai Joãoya itekare ekaremekî pinunpa'pî. Tamî'nawîrî Jordão iren ratai poro tîîko'mansenon pî'. Taapîtî'pîiya see warantî: —Morî Paapa yeseru yapi'tî, imakui'pî ankupî'pîkon tîrumakai tamî'nawîrî, Paapaya tîîwanmîra iku'to'pe. Moropai esenpatakona'tî —ta'pîiya.
4 Mîrîrî warantî ekareme'pîtî'pî Joãoya penaron profeta Isaías nurî'tîya imenuka'pî tîkaaretarî po yawîrî. Awe'menukasa' wanî'pî see warantî:
Keren po pemonkon man tîwentaimepîtî pî'. See warantî taapîtîiya:
“Uyepotorîkon erepanto' ton konekatî.
Morî pe to'sarî ite'marî ton konekatî, eerepanto'pe.
5 Tamî'nawîron wî'kon yarappana pî' tîwe'senkon ena kupî sîrîrî yettapusa' pe.
Moropai inonkon wî'kon wanî kupî sîrîrî se' kaisarî awe'to'pe.
Moropai wayai wayai pe tîwe'sen e'makon wanî kupî sîrîrî to'saron pe
moropai e'makon sakîsakîpankon ena kupî sîrîrî se' kaisarî.
6 Mîrîrî yai tamî'nawîronkon pemonkonyamî'ya pîika'tînto'pe
Paapa nîtîrî'pî epu'tî kupî sîrîrî,” taiya Is 40.3-5
kai'ma Isaías nîmenuka'pî. Mîrîrî yawîrî ikupî'pî Joãoya.
7 Mîrîrî yai arinîkon pemonkonyamî' wîtî'pî esenpatakonai João pia. Tîîse Joãoya taapîtî'pî to' pî': —Îkîiyamî' amîrî'nîkon. Anî'ya ekareme'sa' apî'nîkon, Paapa ekore'mato' yapai awe'pîika'tîkon kai'ma, amakuyikon rumakaya'nîkon pra tîîse? Paapaya atarumatîkon kupî sîrîrî.
8 Mîrîrî ye'nen ayeserukon imakui'pî ku'to'ya'nîkon rumakatî. Moropai amenan morî ayeserukon ton yapi'tî tamî'nawîronkonya ayeserurî'pîkon rumakasa'ya'nîkon epu'to'pe. Tîîse aawarîrî'nîkon rî kîkatî: “Paapa yapurînenan anna maasa pra Abraão payannî'san pe anna wanî ye'nen,” kîkatî. Mîrîrî taaya'nîkonya ya î' pe pra rî awanî, awe'pîika'tîkon pepîn. Tîîse tauya sîrîrî, ayentakon Abraão payannî'san pe tiaronkon kupî Paapaya e'painon seeni' tî'kon ke.
9 A'kî, wa'ka moro man yei ya'tîto'pe ikara yawîrî teeperu tîînen pepîn. Mîrîrî yenumî to'ya apo' ya' aaranto'pe. ˻Mîrîrî warantî Paapaya ikupî kupî sîrîrî inkamoro imakui'pî teserukon rumakatîponkon pepîn pî'.˼
10 Mîrîrî ekaranmapo'pî pemonkonyamî'ya João pî': —Moriya î' kin kupî annaya e'painon? —ta'pî to'ya.
11 Inkamoro maimu yuuku'pî Joãoya: —Anî' wanî ya asakî'ne ipon mîîkîrîya itakon tîrî e'pai awanî î' ton pîn pia. Moropai anî' wanî ya tekkari ke tiaron yentai, mîîkîrîya irataika e'pai awanî î' ton pîn pia —ta'pîiya.
12 Mîrîrî yai João pia tiaronkon tesa'kon ton pe tîniru yapisî pî' teesenyaka'masanon erepamî'pî esenpatakonakai. Moropai João ekaranmapo'pî to'ya. Ta'pî to'ya: —Anna yenupanen, î' kupî annaya e'painon? —ta'pî to'ya ipî'.
13 Moropai to' maimu yuuku'pî Joãoya: —Tîniru tîînenan winîpai kure'ne tîniru yapisîya'nîkon kai'ma ke'tî. Yapi'to'pe ta'pî yentai yapisîya'nîkon kai'ma ke'tî —ta'pîiya.
14 Moropai tiaronkon surarayamî'ya nîrî João ekaranmapo'pî. Ta'pî to'ya: —Anna kanan, î' kupî annaya e'painon?
Ta'pî Joãoya: —Anî'rî taruma'tîya'nîkon e'pai pra man, tîniru yu'se awanîkon wenai, seru'ye' pe, î' inkupî'pî ton pra tîîse. Tîîse tauya taatausinpai e'tî ayepe'pîkon anapisîkon pî' inî' panpî' itu'se tîwe'se pra —ta'pîiya.
15 Mîrîrî yai pemonkonyamî' esenumenka'pî pîika'tîton pe João yarimasa' Paapaya kai'ma. ˻Maasa pra Paapa nîmenka'pî Cristo nîmîkî pî' to' wanî'pî.˼ —Yai pra Cristo mîîkîrî, Paapa nîmenka'pî pe awanî —taapîtî'pî to'ya João pî'.
16 Mîrîrî epu'tî tîuya ye'nen Joãoya ta'pî tamî'nawîronkon pî':
—Uurîya ayenpatakonakon tuna ke neken. Tîîse tiaron yi'nî pî' man uye'ma'pî pî', ipîkku pe tîwe'sen uyentainon. Mîrîrî ye'nen uurîya mîîkîrî pisa'sa' yewa yeuka eserîke pra awanî, itarumai'pî pe wanî ye'nen. Mîîkîrîya amîrî'nîkon ˻imakui'pî rumakatîponkon˼ yenpatakona kupî sîrîrî Morî Yekaton Wannî enato'pe ayesa'kon pe. Moropai apo' ke eesenpatakonakon kupî sîrîrî. ˻Mîrîrî warantî ikupîiya tamî'nawîrî imakui'pî mo'kapa kai'ma.˼
17 Mîîkîrî yenya trigo sururukato' wanî. Mîrîrî ke isururukaiya. Ipi'pî kore'tapai yaimenkaiya. Morîkon konekaiya itense' ya'. Mîrîrî pi'pîrî'pî po'tîiya apo' ya' eesi'nîpî neporîton pe pra —ta'pî Joãoya.
18 Mîrîrî warantî itekare ekaremekî tîuya yai, pemonkonyamî' panamapîtî'pîiya tu'ke teeseurîmato' ke. Maasa pra imakui'pî teserukon rumaka to'ya yu'se awanî'pî kure'ne.
19 Mîrîrî yai pata ko'mannî'nen Herodes panamapîtî'pîiya kure'ne imakui'pî ku'sai'ya wenai. Tîîse Herodes ekore'ma'pî ipî'. Maasa pra takon no'pî Herodias yarakkîrî awanî pî' eeseurîmasa' wenai.
20 Mîrîrî ye'nen inî' panpî' imakui'pî kupî'pîiya. João yarakkamo me'po'pîiya atarakkannîto' ta inî' itekare ekaremekîiya namai.
Jesus Yenpatakona'pî Joãoya
(Mt 3.13-17; Mc 1.9-11)
21 Tîîse mîrîrî rawîrî pemonkonyamî' yenpatakonasai'ya yai Jesus nîrî yenpatakona'pî Joãoya. Mîrîrî yai Jesus epîrema tanne, ka' esettapuruka'pî.
22 Moropai Morî Yekaton Wannî autî'pî ipona waku'kaimî pe. Moropai mai ka' poinon eseurîma'pî taawon see warantî: —Amîrî unmu, uwakîri pu'kuru amîrî. Kure'ne apî' atausinpa sîrîrî —ta'pî Paapaya.
Jesus Tamorî'san
(Mt 1.1-17)
23 Mîrîrî yai teesenyaka'mato' pia'tî Jesusya yai, ikono po wanî'pî 30 kono' kaisarî. Mîîkîrî pî' to' esenumenkapîtî'pî José munmu pe awanî kai'ma.
Mîîkîrî José wanî'pî Heli nurî'tî munmu pe.
24 Heli wanî'pî Matã nurî'tî munmu pe.
Matã wanî'pî Levi nurî'tî munmu pe.
Levi wanî'pî Melqui nurî'tî munmu pe.
Melqui wanî'pî Janai nurî'tî munmu pe.
Janai wanî'pî José nurî'tî munmu pe.
25 José wanî'pî Matatias nurî'tî munmu pe.
Matatias wanî'pî Amós nurî'tî munmu pe.
Amós wanî'pî Naum munmu pe.
Naum wanî'pî Esli nurî'tî munmu pe.
Esli wanî'pî Nagaí nurî'tî munmu pe.
26 Nagaí wanî'pî Máate nurî'tî munmu pe.
Máate wanî'pî Matatias nurî'tî munmu pe.
Matatias wanî'pî Semei nurî'tî munmu pe.
Semei wanî'pî Joseque nurî'tî munmu pe.
Joseque wanî'pî Jodá nurî'tî munmu pe.
27 Jodá wanî'pî Joanã nurî'tî munmu pe.
Joanã wanî'pî Resá nurî'tî munmu pe.
Resá wanî'pî Zorobabel nurî'tî munmu pe.
Zorobabel wanî'pî Salatiel nurî'tî munmu pe.
Salatiel wanî'pî Neri nurî'tî munmu pe.
28 Neri wanî'pî Melqui nurî'tî munmu pe.
Melqui wanî'pî Adi nurî'tî munmu pe.
Adi wanî'pî Cosã nurî'tî munmu pe.
Cosã wanî'pî Elmadã nurî'tî munmu pe.
Elmadã wanî'pî Er nurî'tî munmu pe.
29 Er wanî'pî Josué nurî'tî munmu pe.
Josué wanî'pî Eliézer nurî'tî munmu pe.
Eliézer wanî'pî Jorim nurî'tî munmu pe.
Jorim wanî'pî Matate nurî'tî munmu pe.
Matate wanî'pî Levi nurî'tî munmu pe.
30 Levi wanî'pî Simeão nurî'tî munmu pe.
Simeão wanî'pî Judá munmu pe.
Judá wanî'pî José nurî'tî munmu pe.
José wanî'pî Jonã nurî'tî munmu pe.
Jonã wanî'pî Eliaquim nurî'tî munmu pe.
31 Eliaquim wanî'pî Meleá nurî'tî munmu pe.
Meleá wanî'pî Mená nurî'tî munmu pe.
Mená wanî'pî Matatá nurî'tî munmu pe.
Matatá wanî'pî Natã nurî'tî munmu pe.
Natã wanî'pî Davi nurî'tî munmu pe.
32 Davi wanî'pî Jessé nurî'tî munmu pe.
Jessé wanî'pî Obede nurî'tî munmu pe.
Obede wanî'pî Boaz nurî'tî munmu pe.
Boaz wanî'pî Salmom nurî'tî munmu pe.
Salmom wanî'pî Nassom nurî'tî munmu pe.
33 Nassom wanî'pî Aminadabe nurî'tî munmu pe.
Aminadabe wanî'pî Admim nurî'tî munmu pe.
Admim wanî'pî Arni nurî'tî munmu pe.
Arni wanî'pî Esrom nurî'tî munmu pe.
Esrom wanî'pî Farés nurî'tî munmu pe.
Farés wanî'pî Judá nurî'tî munmu pe.
Judá wanî'pî Jacó nurî'tî munmu pe.
34 Jacó wanî'pî Isaque nurî'tî munmu pe.
Isaque wanî'pî Abraão nurî'tî munmu pe.
Abraão wanî'pî Terá nurî'tî munmu pe.
Terá wanî'pî Nacor nurî'tî munmu pe.
35 Nacor wanî'pî Serugue nurî'tî munmu pe.
Serugue wanî'pî Ragaú nurî'tî munmu pe.
Ragaú wanî'pî Faleque nurî'tî munmu pe.
Faleque wanî'pî Éber nurî'tî munmu pe.
Éber wanî'pî Salá nurî'tî munmu pe.
36 Salá wanî'pî Cainã nurî'tî munmu pe.
Cainã wanî'pî Arfaxade nurî'tî munmu pe.
Arfaxade wanî'pî Sem nurî'tî munmu pe.
Sem wanî'pî Noé nurî'tî munmu pe.
Noé wanî'pî Lameque nurî'tî munmu pe.
37 Lameque wanî'pî Matusalém nurî'tî munmu pe.
Matusalém wanî'pî Enoque nurî'tî munmu pe.
Enoque wanî'pî Jarete nurî'tî munmu pe.
Jarete wanî'pî Maleleel nurî'tî munmu pe.
Maleleel wanî'pî Cainã nurî'tî munmu pe.
38 Cainã wanî'pî Enos nurî'tî munmu pe.
Enos wanî'pî Sete nurî'tî munmu pe.
Sete wanî'pî Adão nurî'tî munmu pe.
Adão wanî'pî Paapa nîkupî'pî pe.