16
Ini ne Mekeatag te Ibehey ne Tavang Diyà te Ruma dut te Menge Mibperetiyaya ne riyà te Inged ne Hirusalim
1 Na ruen pà ini ibpesabut ku keniyu ne ini ne mekeatag te kebehey niyu te tavang dut te menge mibperetiyaya ki Hisus ne egkepesangan diyà te inged ne Hirusalim. Iyan niyu dumai ke impesabut ku en dut te menge mibperetiyaya ne riyà te lusud te inged ne Gelasiya.
2 Uman Akad ne penehana kew te ibehey niyu riyà te Eleteala, ne diyà egkelevat dut te nepentiyari niyu ne isivey niyu en neraan ke langun ne kandin dema. Buruna niyu ini neraan su embiya ebpekeuma a ne apey melemu rà se kedtimua ku.
3 Su embiya ebpekeuma a ne edsuhuen ku ke menge etew ne nepemilì niyu ne ebpekeewit dut te imbehey niyu riyà te inged ne Hirusalim. Ne ibpeewit ku rema ini se surat ku kandan su apey ke menge etew ne ebpeketelimà ketà ne egketuenan dan ke engkey se elin ne lakew rut te menge etew ne mid-ewit.
4 Ne embiya iyan ku egkepegitung ne iyan meupiya ne ebpendiyan a te inged ne Hirusalim, ne ebpekeruma ran en kediey.
5 Ebpengkeniyan a te keniyu ugaid ne ed-una a ebpevayà diyà te lusud te inged ne Mesidunya, su diyan a iya ebpevayà.
6 Ne embiya ebpekeuma a keniyan te keniyu ne malù pà meuhet se ked-ubpàubpà ku keniyan, su kalu ke kenà e pà edlaus taman te ebpekesahad arà se ked-uran-uran. Ne meupiya ke embiya egketevangan a niyu ketà te ked-awà ku en riyà te keniyu.
7 Su kenà ku egkesuatan ne mehaan dà se kebpemekebalak tew, ugaid ne iyan netahù te itungan ku ne malù meuhet ke embiya idluhut te Eleteala.
8 Ugaid ne kayi a ed-ubpà te inged ne Ipisu taman te kenà egkeuma ke hewii ne ed-ingaranan te Pintikust.
9 Su ruen pà merakel ne etew kayi ne egkiyug ne ebpemineg te kebpenurù ku, ne ibpemesabut ku kandan misan merakel se egkunterà te Eleteala kayi.
10 Ne embiya ebpekeuma si Timoteo keniyan te keniyu ne gelhelaa niyu sikandin su egelevek ded dema sikandin te Kerenan iring kediey.
11 Su iyan iya se ibpekita niyu ke ked-adat niyu kandin. Ne tevangi niyu sikandin te ked-awà din en su apey egkehalew se hinawa rin te kedlived din kayi te kediey. Su ebpenerengen dey sikandin rut te menge suled tew te kebperetiyaya ki Hisu Kristu.
12 Ne si Epulus ne suled tew rema te kebperetiyaya ki Hisus, ne kepipira ku en buyua kandin te meduma sikandin dut te menge suled tew ne ebpengkeniyan te keniyu. Ne kenà pà egkiyug guntaani, ugaid ne ebpengkeniyan ded sikandin embiya warà en ebpekevangan kandin.
Ke Mewri ne Penduan ni Pablo
13 Na guntaani ve, menge suled ku, ne uram kew te keduma niyu ki Hisus. Ne itindehi niyu te mevaher ke kebperetiyaya niyu ki Hisu Kristu. Kenà niyu igkeyeyai ne ibpekita niyu ke keduma niyu te kiyug te Eleteala, ne kenà niyu igkeandek te keduma kandin misan egkerehenan kew.
14 Kayi te langun ne ed-ul-ulaan niyu ne ibpekita niyu ke limù niyu te ruma ne etew.
15 Na menge suled ku, netuenan niyu te iyan neuna ne mibperetiyaya riyà te lusud te inged ne Gerisya ne telteleanak ne ensi Istipanya. Ne egenat dà ketà ne kenà dan eduwaruwa se edtavang dut te menge ruma ran ne mibperetiyaya.
16 Tembù be, menge suled, ebuyuen ku keniyu ne dumai niyu ke lalag dut te etew ne iring ketà wey misan engkey ne ruma ran ne edtavang te ibpehelevek kandan.
17 Ne ingkehalew ku te nekeuma en si Istipanya, si Fortunatu wey si Ekeykus, su iring te migkurang ke kegkelimengawi ku keniyu.
18 Ne inmeupiya sikandan te hinawa ku wey iring te inmeupiya te ginawa niyu. Dait ne ed-edatan niyu se iring kayi ne menge etew.
19 Ne ebpenginginsà keniyu ke langun ne mibperetiyaya kayi te langun ne inged te lusud te inged ne Asiya. Ne ebpenginginsà rema keniyu si Ekila ki Prisila abpeg din ke langun ne mibperetiyaya ki Hisus ne egkevurun diyà te valey ran kayi te Ipisu, su uman kew ran dà egkepegitung su sabap dut te kebpekidseveka niyu ki Hisus.
20 Langun ne ruma ku ne mibperetiyaya kayi ne ebpenginginsà dan dema keniyu.
Ne sikiyu rema keniyan ne mebpeed-edatey wey mebpelimlimuey kew.
21 Ini ve se egkehiyen ku kayi te ketepusan te surat ku, ne siaken si Pablo se edsurat kayi, ne ebpenginginsà a keniyu langun.
22 Ne ke menge etew ne engkungkun ne mibperetiyaya ugaid ne warà limù te hinawa ran ki Hisu Kristu, ne edusaan dan te Eleteala taman te taman.
“Marana tha,” ne iyan din meana ne, “Hisu Kristu ke Kerenan tew, lived ke en te mehaan!”
23 Ne iyan ku kiyug ne ebpeneuven kew perem ni Hisu Kristu ke Kerenan tew.
24 Ne ke limù ku ne kenà meawà diyà te keniyu sabap dut te mibpekidseveka kiyu ki Hisu Kristu.
Arà dà taman. Pablo