10
Ke Rekelà ne Mid-ulaula ni Hisu Kristu su apey ki Ebpekeuvey te Eleteala
1 Iyan dan midumaan dut te penduan ne imbehey te Eleteala ki Moises dengan ne alung-alung dà su in-upama rà dut te tidtu ne keupianan ne ebpekeuma. Ne ke tidtu ne keupianan ne nekeuma en kayi te kenitew impepevayà ki Hisus. Su nekahi te penduan ne uman rahun ne iyan pegingawà ne ruen menge binatang ne ibpelengesa ne ibehey riyà te Eleteala su apey egkeawà ke salà dut te menge etew. Ugaid ne misan iring ketà se ed-ul-ulaan dan taman te taman, ne warà mekegaga arà te kebmetidtu te menge etew su apey ran ebpekeuvey te Eleteala.
2 Su embiya benar ne ebpeketilak dut te salà dan arà te lengesa te binatang ne ibehey ran te Eleteala, ne warà en atag din te edsaupsaup dan te uman rahun su ebmelilintad en perem ke hinawa ran dut te salà dan ne nepesehad en.
3 Inemulà te arà se lengesa ne ibehey ran te Eleteala te uman rahun ne ke kebpetenuri rà kandan te salà ne neveelan dan.
4 Su ke lengesa te menge sapì wey kambing ne warà nevenar kebpekegaga rin ne ed-awà dut te salà dan.
5 Tembù be guna su mehaan en ebpengkayi si Hisu Kristu te ampew te dunya ne migkehiyan din ke Amey rin ne Eleteala te,
“Kenà nu iyan egkiyuhan
ke menge binatang ne impelengesa
wey ke ruma pà ne ibehey ran keykew;
ugaid ne iyan nu kiyug
ne egkevaluy a ne etew,
tembù be impenehana nu en ke lawa ku.
6 Uya, kenà nu igkesuati
ke menge binatang ne edtutungen,
wey ke lengesa ne ibehey ran keykew
te id-awà dut te salà dan.
7 Engketà be arà ne egkehiyen ku te,
‘Ini ad, Eleteala, te edtuman dut te kiyug nu
iring dut te nekahi
ne impesurat nu mekeatag kediey.’ ”
8 Mid-unaan ni Hisus te egkahi te kenà ke menge binatang ne ibpelengesa ran wey ke ruma pà ne ibehey ran te Eleteala ne ebpekesuhat te hinawa rin. Ne kenà din ded dema igkesuat ke menge binatang ne edtutungen wey ke lengesa ne ibehey ran kandin te igkeawà dut te menge salà dan. Ne migkahi rin ini misan netuenan din en te langun ne ibehey ran su atag dut te edumaan dan ke nekahi te penduan ni Moises.
9 Ne midtunduhan din en maa te edlalag te, “Ini ad, Eleteala, te edtuman dut te kiyug nu.” Ne arà te lalag ni Hisus ne netuenan tew en te in-awà en te Eleteala ke neuna ne pasad din mekeatag te kebehey kandin te menge binatang ne ibpelengesa su midsembian din en te behu su ke kinepelengesa ni Hisu Kristu rut te lawa rin se insambì dut te menge binatang ne ibpelengesa.
10 Su si Hisu Kristu, ne midtuman din ke kiyug te Eleteala su midumaan din ke langun ne insuhù kandin. Ne ke kinevehey rin te lawa rin te keseveka rà mekeatag te salà te langun tew ne nekegaga arà te kinekeawà te salà tew.
11 Ketà te baley ne ebpengerapan te menge Hudiyanen, ne uman gewii ne egelevek ke menge terebpelengesa te ebehey te Eleteala te binatang ne ibpelengesa ran ne edseupseupan dan te ed-ulaula ini. Ugaid ne kenà ded lavew ini ebpekegaga ne ed-awà dut te salà te menge etew.
12 Ugaid ne kenà iring ketà se kinevehey ni Hisu Kristu te lawa rin diyà te Eleteala te ebpebpatey, su keseveka rà mulà se kinevehey rin te lawa rin dut te salà te menge etew ne ebpekegaga arà taman te taman. Neipus arà ne mibpinuu sikandin diyà te egkekewanan te Eleteala diyà te langit.
13 Ne riyà guntaan edtahad si Hisus taman te edtevanan te Eleteala ke kunterà din ne ebpegiekan te Eleteala kandan.
14 Su ke kinevehey ni Hisu Kristu te lawa rin ne ebpebpatey te keseveka rà, ne midtidtu rin ke menge etew wey midtilak din dut te lengesa rin su apey riyà te etuvangan te Eleteala ne ebmetilak dan taman te taman.
15 Ne benar ini su ruen dema impesabut dut te Kedesenan ne Ebpetuntul te Menusiyà ketà te impesurat din ne egkahi te,
16 “Ne ini se behu ne pasad ku
ne ebeelan ku rut te menge etew ku keuremà.
Ne ibpetahù ku ini se suhù ku diyà te itungan dan
ne ibpesurat ku diyà te hinawa ran
su apey ran egkerumai egenat te hinawa ran.”
17 Ne migkahi pà maa te,
“Ne kenà ku en ebpenunduhen ke meraat ne ulaula ran.”
18 Na geina te kenà ebpenunduhen te Eleteala ke salà te menge etew, ne kenà en ebpegingawà te ruen pà ibpelengesa ne ibehey te Eleteala te ked-awà dut te salà dan.
Egkepakey en ne Ebpekeuvey ki te Eleteala su atag dut te Kinepebpatey ni Hisu Kristu Kenitew
19 Engketà be, menge suled ku, ne atag dut te kinepebpatey ni Hisus kenitew, ne ruen en dalan te ebpekelusud ki riyà te Punggus ne Berekat ne Ruhu ne dutun en ke Eleteala.
20 Su ketà te kinevehey ni Hisus ke hinawa rin te ebpebpatey, ne mibeelan din ke behu ne ralan te ebpekeuvey ki te Eleteala. Ne ebpekelusud ki riyà te Punggus ne Berekat ne Ruhu ibpepevayà ki Hisus ne mibpebpatey ugaid ne biviyag ded iya. Su in-awà din arà se impehelet kenitew te ed-uvey te Eleteala ne in-upama ketà te mekepal ne saput ne impekalang dut te ed-ubpaan te Eleteala diyà te baley ne mibeelan te menge Hudiyanen te ebpengarap te Eleteala.
21 Ne guntaani ne sikandin ke mepmeupiya pà ne ebpeninindeg kenitew diyà te Eleteala, ne sikandin se ebpekemalen dut te langun tew ne menge etew te Eleteala.
22 Tembù be ed-uvey kiyu en te Eleteala se egenat te keputian te atey tew ne kenà eduwaruwa se kebperetiyaya tew kandin. Ed-uvey kiyu kandin su ke lengesa ni Hisus ke midtilak te hinawa tew rut te meraat ne ulaula ne igkevenari te hinawa tew, ne iring te midlùluan din ke lawa tew rut te metingew ne wayig.
23 Ne ebpetihel kiyu se egawed dut te kebpenareng tew te impasad te Eleteala, ini se kebpenareng ne nekahi tew en te ebperetiyayaan tew. Su egkeserihan sikandin ne edtuman ke impasad din kenitew.
24 Ebpevegbeg-etey kiyu te ebpekita te limù te menge ruma tew, ne ebpetebtevangey kiyu te ed-ulaula te meupiya.
25 Ne kenà tew edlipatan ke kegkevurun tew te ebpengarap te Eleteala apey ki kenà ebpekeiring dut te ulaula te ruma pà ne menge etew. Ugaid ne iyan tew ed-ul-ulaan mulà ne ebpekevaher ki te kebperetiyaya rut te ruma tew su netuenan tew se mehaan en se kedlived ni Hisu Kristu kayi te ampew te dunya.
26 Su embiya nesebutan tew en ke benar ne penurù mekeatag ki Hisu Kristu ugaid ne edtivevaan tew pà manen te ed-ulaula te meraat, ne warà en be egkepenareng tew te kebpekeliyu tew pà te salà tew.
27 Inemulà te iyan tew rà egkepenareng ne kegkeandek dut te hewii te kegkukuma te Eleteala kenitew. Su ketà ne ke langun ne mid-engkenà kandin ne edtutungen diyà te edsindrew ne apuy.
28 Su rengan ne misan engkey ne etew ne warà meduma rut te penduan ne intahak ki Moises, ne ruen deruwa etawa tetelu ne etew se nekekita ini ne ebpeketitihus te kinepekesurang din te penduan, ne ebpeimetayan te warà kegkeyruwi.
29 Ne embiya iring ketà se egketemanan dut te etew ne midsurang dut te penduan ni Moises, ne labi pà se kedusai rut te etew ne ed-engkenà ki Hisus ke Anak te Eleteala! Su ketà ne impekita rin se warà din peberepentaha ke lengesa ni Hisus ne imbehey te kinepatey ni Hisus su apey egketuman ke behu ne pasad te Eleteala ne ebpeketilak dut te salà din. Uya, labi pà se kedusai kandin su iring te pinegkeyà din ke Kedesenan ne Ebpetuntul te Menusiyà ke ebpayag dut te tavang te Eleteala kenitew.
30 Su netuenan tew ne ke Eleteala se migkahi te,
“Siaken se ebpenulìsulì.
Siaken se edusa te menge etew ne ed-ulaula te meraat.”
Ne migkahi pà maa te,
“Siaken ke egkukum te menge etew ku.”
31 Ne mekeandekandek nevenar embiya ebpekepevayà ki te gehem te kukuman te Eleteala ne warà kemetayen din.
32 Tentenuri niyu ke hewii te behu kew pà ne mibperetiyaya ki Hisus ne nerayahan en ke itungan niyu. Su ruen merakel ne keresayan niyu, ugaid ne warà meawà ke kerinew te hinawa niyu.
33 Su ruen hewii ne mibpegkeyà kew wey meraat se imped-ulaula ran keniyu riyà te etuvangan te merakel ne etew. Ne ruen pà hewii ne impeninindeg niyu ke ruma niyu rut te meraat ne imped-ulaula kandan.
34 Ne impekita niyu ke kegkeyru niyu rut te nengevilanggù su midtevangan niyu sikandan. Ne misan pà te mid-ahew ke menge kearen niyu ne warà nemutu ke hinawa niyu. Uya, su netuenan niyu se ruen pà beripantag ne kearen niyu ne edtahad diyà te langit ne kenà egkeahew keniyu taman te taman.
35 Engketà be ne tigkeri niyu ke keresayan ne kenà niyu engkeri ke sarig niyu te Eleteala, su rekelà se keupianan ne egketelimà niyu ne impasad te Eleteala keniyu.
36 Iyan ungayà se edtigker kew te kemerehenan apey niyu egketuman ke kiyug te Eleteala ne ebpeketelimà kew rut te keupiya ne impasad te Eleteala.
37 Su ruen impesurat ne Lalag te Eleteala ne egkahi te,
“Warè en keuhetan din
ne iyan ebpengkayi ne ke ebpekeuma.
Ne ke kebpekeuma rin
ne kenà din edsenggelen.
38 Ne ke menge etew ne metidtu kayi te etuvangan ku
ne edtigkeran dan te piya engkey se kemeresayan
su atag dut te kebperetiyaya ran kediey.
Ugaid ne embiya ruen etew ne ed-engked se eduma kediey,
ne warà iya kegkehalew ku kandin.”
39 Ugaid ne sikitew ne kenà iring ketà se ulaula tew, su kenà kiyu en ed-iring dut te menge etew ne mid-engked ke kebperetiyaya ran ne edusaan te Eleteala. Su mevaher se kegawed tew te kebperetiyaya tew ne ketà be ne ebpekeliyu kiyu.