8
Ini ne Mekeatag te si Hisus en ke Mepurù ne Terebpelengesa tew ne tuus te ruen behu ne Pasad te Eleteala Kenitew
1 Iyan meana kayi rut te langun ne migkahi ku ne ruen en Mepurù ne Terebpelengesa tew ne ebpeninindeg kenitew diyà te Eleteala. Ne diyan en sikandin ebpinpinuu te dapit te egkekewanan te Eleteala diyà te langit.
2 Edtumanen din ini se kebmepurù din te kedterebpelengesa rin diyà te etuvangan te Eleteala diyà te Punggus ne Berekat ne Ruhu diyà te baley ne mibeelan ne ebpengeningeniyan te Eleteala. Ne kenà etew se mibaal kayi ugaid ne Eleteala ke Kerenan tew.
3 Ne langun ne menge Mepurù te Terebpelengesa ne ebpeninindeg dut te menge etew diyà te Eleteala ne netendù sikandan te ebehey dut te ibpelengesa ne menge binatang wey ke ruma pà ne ibehey te menge etew riyà te Eleteala. Ne iring din ded dema si Hisus ke Mepurù ne Terebpelengesa tew, su ruen ded dema ibpekevehey rin diyà te Eleteala.
4 Ne sikandin ke Mepurù ne Terebpelengesa tew riyà te langit, ugaid ne embiya kayi pà sikandin te ampew te dunya ne kenà egkedterebpelengesa sikandin su kenà sikandin inenakan ni Levi ne igenat dà te ruen terebpelengesa ne sikandan se ebehey te Eleteala te edumaan dan ke suhù te penduan ne intahak ki Moises rengan.
5 Ugaid ne ke helevek dan te terebpelengesa kayi te ampew te dunya ne iyan din iring ne alung dà wey limbahan dà dut te tidtu ne ed-ul-ulaan diyà te langit. Duen dema baley ne ebpengeningeniyan dan te terebpelengesa ne alung dà dema dut te benar ne diyà te langit. Su ruen migkahi te Eleteala ki Moises te kebpeitindeg din en ketà, ke sikandin te, “Dumai nu nevenar ke langun ne impekita ku keykew te riyà ki te buvungan.”
6 Ugaid ne ini se helevek ni Hisus te kedterebpelengesa ne mepurù pà dut te nengehelevek te menge terebpelengesa rengan. Ne iring din ded dema ke keupiya ini se behu ne pasad te Eleteala te si Hisus se terebpelengesa tew ne ebpeninindeg kenitew su muna pà se keupiya rin ketà te neuna ne pasad te Eleteala. Iyan din ked-una te keupiya ini se behu ne pasad su ruen impenendan din mekeatag ketà ne mepmeupiya pà nevenar.
7 Su embiya ke neuna ne pasad te Eleteala ne ebpekegaga, ne kenà din en edsembian te behu.
8 Ugaid ne nekita te Eleteala te midsurang ke menge etew dut te suhù te penduan ne intahak ki Moises. Tembù be midsewayan din sikandan te egkahi te,
“Ruen hewii ne ebpekeuma ne ebeelan ku ke behu ne pasad
dut te menge etew ne inenakan ni Israyil
wey ke menge etew ne inenakan ni Huda.
9 Ne kenà iring ini dut te neuna ne pasad ku
riyà te menge keep-epuan dan dengan
te kinetevangi ku kandan
te ed-awà dut te inged ne Ihiptu,
su warà dan tumana
ke neuna ne impasad ku kandan,
tembù be mid-ewaan ku sikandan.
10 Ugaid ne ini se behu ne pasad ku
ne ebeelan ku keuremà dut te menge inenakan ni Israyil,
ne ibpetahù ku ini se suhù ku te itungan dan
ne ibpesurat ku ini te hinawa ran
su apey ran egkerumai egenat te hinawa ran.
Ne ketà be ne siak ke Eleteala ne edtewehan dan,
ne sikandan ke menge etew ku.
11 Su ketà be ne hewii ne kenà en ebpegingewaan
te ebpenuruen den pà ke menge ruma ran mekeatag kediey.
Su langun dan egenat te kevevaan taman te kepuruan
ne egketau en kediey.
12 Ne ebpeseharen ku sikandan,
ne kenà ku en ebpenunduhen ke meraat ne ulaula ran.”
13 Ne ketà te impesabut en te Eleteala te ruen en behu ne pasad din, ne nesebutan tew en te nesembian din en arà se raan ne penduan su neipus en. Ne embiya ke raan ne nesembian en, ne egkeawà en su warà en pantag din.