10
Mibpemilì si Hisus te Pitu Nepulù wey Deruwa ne Etew ne Impeipanew Rin
1 Guna su neipus arà ne ruen pitu nepulù ne ruma pà ne menge meama ne mibpemilì te Kerenan ne impeipanew rin ini te igeheruwa riyà te langun ne menge inged ne mehaan din ebayai.
2 Ne migkehiyan din sikandan te, “Medmarkel se menge etew ne warà pà meketelimà dut te Meupiya ne Tudtul mekeatag te Eleteala. Iring sikandan te melutuen ne pareyanan. Meluag nevenar ini se pareyanan, ugaid ne warà utew ruma rut te ebpengehani. Pemuyù kew riyà te Eleteala ke kemuney rut te pareyanan te medsuhù pà sikandin te ruma ne ed-ehani diyà te pareyanan din.
3 Na, genat kew en, ugaid uram kew su edsuhuen ku sikiyu riyà te menge etew ne ebpekekaid, ne iring kew te nati te bilibili ne ebpekeseruk diyà te senge ingeren en ne mewalew ne asu.
4 Kenà kew ewit te kureta, kempiru, etawa telumpà ne idsambì. Ne kenà kew edlanganlangan te ebpekibpengasak dut te langun ne menge etew ne egkeuma niyu riyà te ralan.
5 “Ne piya engkey ki baley se egkepemenayikan niyu ne penehetiat kew se egkahi te, ‘Menu ma ebpeneuven te Eleteala ke langun ne ed-ubpà kayi te valey ini!’
6 Embiya ruen ketà te valey ebperetiyaya wey egalàhalà keniyu ne dekelà se penaub te Eleteala kandan. Ugaid ne embiya kenà kew ran egelhelaan ne kenà edlaus kandan ke kebpenaub te Eleteala.
7 Ubpà kew ketà te valey ne ruen migalàhalà keniyu taman te egkeuma ke ked-awà niyu ketà te inged dan. Kenà kew ed-arat-arat te ked-ubpà niyu. Ne telimaa niyu misan engkey se idsaru ran wey ibpeinum dan keniyu su mehelalew ran en keniyu. Su ke etew ne egelevek ne dait ne edsukayan.
8 “Piya endei ne inged se egkeumaan niyu ne ruen egalàhalà keniyu, ne telimaa niyu misan engkey se idsaru ran keniyu.
9 Pemawii niyu ke menge ebpenderaru ketà te inged. Ne kehiya niyu rut te menge etew ketà te inged te mehaan en ke hewii te Kedatù te Eleteala kandan.
10 Ugaid ne embiya ebpekeuma kew riyà te inged ne warà egalàhalà keniyu, ne pendiyà kew te ralan ne kahi kew riyà te menge etew te,
11 ‘Mibpemunas dey en ini se lipupuk te inged niyu ne mideket te paa rey su tuus ini te kenà en kilid kenami ketà te hewii ne kedtimbang te Eleteala keniyu. Ugaid ne iyan niyu tentenuri ne mehaan en ke gewii te Kedatù te Eleteala dut te menge etew.’
12 Ugaid ne idtarem ku keniyu,” ke si Hisus, “muna pà ke kedusai te Eleteala kandan ketà te hewii ne kedtimbang din te menusiyà dut te kinerusa rin te menge mehinged riyà te Sudum.”
Ke menge Etew ne Warà Mebperetiyaya ne Mekeandek-andek se Egketemanan Dan
(Mateo 11:20-24)
13 Ne migkahi maa si Hisus te, “Sikiyu ne menge etew riyà te inged ne Kurasin, mekeandek-andek se egketemanan niyu! Ne sikiyu te inged ne Bitsaida, mekeandek-andek dema se egketemanan niyu! Su embiya ke menge etew rà diyà te menge inged ne Tiru wey Sudum se nekekita kayi te mekegeyip ne mid-ulaula ku riyà te keniyu ne neuhet dà ne mid-ewaan dan en ke meraat ne ulaula ran ne mibevelegkas dan en te sakù ne mid-evuwan dan ke ulu ran su tuus te nekedsendit dan.
14 Ketà te hewii ne kedtimbang te Eleteala te menusiyà ne iyan pà dekelà ke kedusa te Eleteala keniyu rut te mehinged te Tiru wey Sidun.
15 Ne sikiyu rema ne menge etew diyà te inged ne Kapirnawum,” ke si Hisus, “egkesuat kew perem ne ebpekesugkur diyà te langit, ugaid ne ibpetimbag kew riyà te apuy ne rakà.”
16 Ne migkehiyan ni Hisus ke pitu nepulù ne ebpeipenawen din te, “Ke menge etew ne ebpemineg te ibpenurù niyu ne iring te iyan a ran ebpeminehen. Ne engkey se kenà edtelimà keniyu ne iring te iyan a rin warà telimaa. Ne engkey se kenà edtelimà kediey ne iyan din warà telimaa ke Eleteala ne midsuhù kediey.”
Ke Kineulì Dut te Pitu nepulù wey Deruwa
17 Guna su mid-ulì ke pitu nepulù wey deruwa ne midsuhù ni Hisus, ne nengesuatsuat dan nevenar! Migkahi ran diyà te ki Hisus te, “Kerenan, misan ke vusew ne mibperumaruma te lalag dey ke ibpeawà dey te ibpepevayà te ngaran nu.”
18 Ne migkahi si Hisus kandan te, “Nekita ku si Setanas ke datù te pekaid ne neulug diyà ebpuun te langit ne iring te kilat se kegkeulug din.
19 Tentenuri niyu te mibehayan ku en sikiyu te gehem su apey misan ebpekehiek kew te uled etawa awa ne kenà kew egkevisaan. Kenà kew egketalew rut te kevaher te datù te pekaid, ne warè en ebpekekaid keniyu.
20 Ugaid ne kenà iyan niyu igkehalew se ebperumaruma ke vusew keniyu,” ke se Hisus, “ugaid ne iyan niyu ikehalew ne impesurat en te Eleteala ke menge ngaran niyu riyà te langit.”
Pinehalew si Hisus dut te Kedesenan ne Ebpetuntul te Menusiyà
(Mateo 11:25-27; 13:16-17)
21 Ketà ne hewii ne mibpehalew si Hisus dut te kedlumun te Kedesenan ne Ebpetuntul te menusiyà ne mideyù din ke Eleteala se egkahi te, “Ew Amà, sikuna ke Kerenan diyà te langit wey kayi rema te ampew te dunya. Dekelà se kebpeselamat ku kenikew su impayag nu ke ketau nu rut te menge etew ne warà egketùtuenan dan, ne in-eles nu ini se ketau nu rut te menge etew ne dekelà se netuenan dan. Uya, dekelà se kedeyù ku keykew, Amà, te ini se mid-ulaula nu su ini ke kiyug nu.”
22 Ne migkahi maa si Hisus dut te menge etew te, “Ke Amey ku se mibpesarig kediey te langun taman. Warà netau kedì te Anak a te Eleteala liyu rà te Amey ku ne Eleteala. Ne warà netau te Amey ku ne Eleteala liyu rà te siaken ne Anak din wey ke menge etew ne egkiyuhan ku te ebpayag mekeatag dut te Amey ku.”
23 Ne midsinaru si Hisus dut te menge edumdumaan din te sikandan dà se midlelehan din te, “Dayirayi kew su nekita niyu ini se ibpehelevek te Eleteala kedì.
24 Su benar ini se egkehiyen ku keniyu te kenà pira rà se ebpelambas te Lalag te Eleteala wey ke menge mepurù dengan ne egkesuat perem ne ed-inteng kayi te nengekita niyu te gunteani en, ugaid ne warà dan en mekita. Ne egkesuat dan perem ne ebpemineg kayi te nengerineg niyu te gunteani en, ugaid ne warà dan en mekerineg.”
Ke Sempità ni Hisus Mekeatag te Meupiya ne Etew ne Riyà Ebpuun te Inged ne Semeriya
25 Ne senge hewii maa ne ruen senge etew ne meyterù te penduan se mibpengkayi te ki Hisus su edseligkat perem te menge insà din. Ke sikandin te, “Meyterù, engkey se ed-ul-ulaan ku su apey a mevehayi te umur ne warà edtemanan din?”
26 Ne migkahi si Hisus te, “Engkey se impesurat ne penduan te Eleteala ne intelaan ni Moises? Engkey se egkesebutan nu rut te kebasa nu ketà?”
27 Ne migkahi ke meama te, “ ‘Iamin nu ke hinawa nu te edlimù te Kerenan ne Eleteala nu, ne iamin nu ke baher nu wey itungan nu te ed-ulaula ke engkey se ebpekesuhat te hinawa rin’ wey ‘Ikelimù nu ke ruma nu iring te kegkelimù nu te hinawa nu.’ ”
28 Ne migkahi si Hisus te, “Benar ini se migkahi nu. Ul-ulaa nu ve ini ne egkevehayan ka te umur ne warà edtemanan din.”
29 Ugaid ne kenà egkiyug ini se meyterù te penduan ne egkepilayan te pengasak ne ketà ne mid-insà en maa te, “Engkey se ruma ku?”
30 Ne midtavak si Hisus te impepevayà te sempità, ke sikandin te, “Duen senge etew ne Hudiyanen ne riyà ebpuun te Hirusalim ne ebpetupang kayi te inged ne Hiriku. Kayi te ralan ne ruen neuma rin ne menge tulisan ne midruug kandin ne pinegkedew ran sikandin ne wey ran ewai ne igelimbeka rè be se hinawa rin.
31 Guna su mid-ewaan en dut te menge tulisan ne ruen senge etew ne Hudiyanen ne terebpelengesa te Eleteala ne mibpevayà ketà te ralan. Ugaid ne nekita rin dà ini se etew ne nekeid-irehà dutun te ralan, ne mid-elihu rin ne midlevundus en se ed-ipanew.
32 Ne engketà ded maa se senge etew ne mibpevayà ketà te ralan ne Hudiyanen ded dema, ne kevuwaran ni Levi ne iyan din helevek ne ed-amung dut te menge terebpelengesa diyà te Nekebpuru ne Valey te Eleteala. Nekeuma ne nekita rin ded dema ini se etew ne nekeid-irehà dutun te ralan, ne mid-elihu rin ded dema ne midlevundus en se ed-ipanew.
33 Warà dà meuhet ne ruen en maa senge etew ne nekeuma ne mibpevayà ketà te ralan ne kenà Hudiyanen su mehinged te Semeriya. Nekita rin dà ini se meama ne nekeid-irehà ketà te ralan ne midaat se nanam din.
34 Mid-uvey rin en ne mibawian din ke menge palì te lana wey vinu ne mibagkes din. Nepasad din te ebawì ne midsepuwat din diyà te kudà din ne mibpeneheewit din diyà te valey ne ed-eranan ne rutun din maa tugenura.
35 Nepawà ne mibehey sikandin te kureta rut te kemuney te valey se egkahi te, ‘Tugenura nu pè be kedì ini se meama. Embiya ruen pà igkegastu nu kandin ne id-ulì ku rà kenikew ketà te kedlived ku.’ ”
36 Ne migkahi si Hisus ketà te meyterù te penduan te, “Endei rapit kayi te tetelu ne meama se meupiya ne ruma ketà te meama ne midruug te tulisan?”
37 Ne migkahi ke meyterù te, “Arà se neyru kandin se meupiya ne ruma rin.”
Ne migkahi si Hisus te, “Ini ve se iringi nu.”
Mibpenumbaley si Hisus diyà te engki Marta wey Maria
38 Gewii te edlevundus en ensi Hisus te ked-ipanew ran ne nekeuma ran ketà te senge inged. Ne ruen ketà meritan ne ed-ingaranan ki Marta ne mibpepemenayik kandan diyà te baley rin.
39 Duen ari rin ne ed-ingaranan ki Maria. Ne mibpinpinuu si Maria ini riyà te uvey ni Hisus su ebpemineg te penurù din.
40 Ne si Marta ne warà kebpinuu rin su sikandin dè be se ed-elugan te kegkaan dan. Ne ketà ne mid-uvey rin si Hisus se egkahi te, “Menu warà nu metuusi, Mama, te ebpedterayen e rà keniyan te ari ku se egelevek kayi te avu? Kehiyi nu pà si Maria te ebpeemungen kedì.”
41 Ugaid ne migkahi si Hisus te, “Sikuna, Marta, merakel utew se igkeuru nu ne kenà beripantag.
42 Ugaid ne seveka rà se beripantag. Ne iyan nepemilì ni Maria ini se meupiya ne kenà egkeawà kayi te kandin.”