16
Ke Kinekevanew ni Hisus
(Mateo 28:1-8; Lucas 24:1-12; Juan 20:1-10)
1 Guna su neipus en ke Hewii te Id-imeley ne mibpemasa ensi Maria Magdalena, si Salumi, wey si Maria ke iney ni Santiago te periyemut su ebpendiyà dan te midlevengan ki Hisus su ebperiyemutan dan ke lawa rin.
2 Mesmeselem pà te hewii ne Akad ne mibpendiyà dan en te midlevengan ki Hisus.
3 Gewii ran te ed-ip-ipanew ne mibpengasak dan te, “Engkey se ebpeliliren tew rut te batu ne inlekeb dut te leveng din?”
4 (Su dekelà nevenar ini se vatu.)
Nekeuma ran ne nekita ran te nelilid en ke vatu ketà.
5 Ne mid-awuk dan en ne iyan dan nekita ne menguwed ne meama ne mibevelegkas te meputì ne riyà mebpinuu te egkekewanan dan, ne nengeandek dan.
6 Ne migkahi en ini se suluhuen te, “Kenà kew meandek!” ke sikandin. “Ebpemengà kew ki Hisus ne ebpuun diyà te Nasarit ne inlansang dan te pinebelevag ne kayu, ugaid ne warè en kayi su nevanew en. Intengi niyu ma ini se midtehuan dan kandin.
7 Na, ipanew kew en ne penudtula niyu ve riyà te menge edumdumaan din abpeg ki Pedro te, ‘Si Hisus ne ed-una en keniyu riyà te Geliliya, ne riyà niyu en egkekita sikandin su arà ke impasad din rengan keniyu.’ ”
8 Arà dà ne midlihawang dan en se ebpelelahuy su nekiyab se atey ran te kegkeandek dan. Ne warà dan kegkehiya te misan entei en su neandek dan.
KE RAAN NE KETEPUSAN
Mibpekita si Hisus ki Maria Magdalena
(Mateo 28:9-10; Juan 20:11-18)
[
9 Guna su nevanew en si Hisus ne mesmeselem pà te hewii ne Akad, ne riyà mid-una mibpekita sikandin te ki Maria Magdalena. Ini ke meritan ne midsuukan te pitu ne vusew ne midsegseg ni Hisus dengan.
10 Nekita rà ni Maria ne mid-ipanew sikandin su ebeyaan din ke menge edumdumaan ni Hisus. Neuma rin sikandan ne ebpeninehew ran te kegkemutu ran te kinepatey ni Hisus.
11 Guna su mibpenudtulan dan en ni Maria te nekita rin en si Hisus su nevanew en, ne warà dan mebperetiyaya.
Mibpekita si Hisus Dut te Deruwa ne Edumdumaan Din
(Lucas 24:13-35)
12 Neipus ini se kinepekita ni Hisus ki Maria Magdalena, ne mibpekita maa sikandin te nesalin ke paras din diyà dut te deruwa ne edumdumaan din gewii te ed-ipanew ran se ebpendiyà te taneb.
13 Ne midlived dan kayi te Hirusalim su ebpenudtulan dan ke menge ruma ran te nekita ran en si Hisus, ugaid ne warà dan mibperetiyaya.
Mibpekita si Hisus Dut te Sepulù wey Seveka ne Edumdumaan Din
(Mateo 28:16-20; Lucas 24:36-49; Juan 20:19-23; Nenged-ulaula 1:6-8)
14 Ketepusan be ne mibpekita si Hisus dut te sepulù wey seveka ne edumdumaan din gewii te egkaan dan. Midseweyan din sikandan su kurang ke sarig dan ne merehen te hinawa ran te kebperetiyaya rut te lalag te menge etew ne nekekita kandin te nevanew en.
15 Migkehiyan din sikandan te, “Pendiyà kew te langun ne menge inged kayi te ampew te dunya ne ibpesabut niyu ke Meupiya ne Tudtul mekeatag kediey riyà te langun ne menusiyà.
16 Ne piya engkey ne etew ne ebperetiyaya wey ebpebunyag dan ne ebpeketelimà te umur ne kenà edtaman, ugaid ne ke etew ne kenà ebperetiyaya ne ebetetayan te salà te kepatey.
17 Ne ke menge etew ne ebperetiyaya kediey ne egkevehayan ku te gehem su apey ran ebpekevaal te mekegeyip. Su kayi te gehem ne ibehey ku kandan ne ebpekegaga ran ne ebpenegseg te menge vusew, ne ebpekelalag dan te menge lalag ne kenà kandan ne kinehiyen;
18 ne embiya ebpekehawed dan te uled etawa ebpekeinum dan te ed-ilu, ne kenà dan egkekeiran; ne edsamsam dan te ebpenderaru ne ebpengeulian.”
19 Guna su nekeipus si Hisus ke Kerenan se edlalag kayi te menge edumdumaan din ne nevatun en diyà te langit, ne mibpinuu en diyà te egkekewanan te Eleteala.
20 Ne mid-ipanew en dema ini se menge edumdumaan din se ebpesabut dut te Meupiya ne Tudtul mekeatag kandin diyà te langun ne menge inged. Ne Eleteala se midtavang kandan su nekevaal dan te menge mekegeyip apey mekeperetiyaya ke menge etew te benar ini se ibpesabut dan.]
RUMA PÀ NE RAAN NE KETEPUSAN
[ (9) Mibpendiyà ke menge meritan te enki Pedro ne intarem dan ke langun ne nerineg dan. (10) Neipus ini ne pineipanew ni Hisus ke menge edumdumaan din egenat te edsilaan ne ebpependiyà te edsenlepan su ebpesabut dan te berekat ne lalag mekeatag te umur ne warà edtaman din.]