12
Ini ne Mekeatag dut te Meritan wey Tendayag
1 Ketà ne ruen dekelà ne tuus ne mekegeyip ne nekita ku riyà te langit. Su ruen meritan ne nekita ku ne iring te mibevelegkas te andew ne ed-itindeg diyà te bulan, ne ruen seluluy rin ne sepulù wey deruwa ne bituen.
2 Mehingey sikandin ne nekeerang su ebeliliten en.
3 Ne ruen seveka maa ne dekelà ne tuus ne mekegeyip ne nekita ku riyà te langit. Ruen dekdekelà ne merihà ne tendayag ne pitu se ulu rin wey sepulù se sidung din ne diyà te uman seveka ne ulu rin ne ruen seluluy rin.
4 Ne midrapey kayi te ikug din ke iketelu ne baad ne menge bituen diyà te langit, ne in-antug din diyà te ampew te dunya. Ne ed-it-itindeg diyà te sineruwan te meritan ne mehaan en ed-anak su egkaan dut te batà embiya egemew en.
5 Ne mid-anak ke meritan te meama, ugaid ne warà mekaan dut te tendayag ke vatà su migègeenan geweri dut te Eleteala ne mibatun din diyà te ebpinuuwan din te edatù diyà te langit. Su sikandin se ebperetuen dut te langun ne menge etew te ampew te dunya, ne warà ebpekegaga ne ed-atu kandin su mevaher se kedatù din.
6 Ne mibpelahuy ke meritan diyà te tanà ne kenà egkeubpaan te etew su ketà ne ruen ed-ubpaan din ne mibpenehana te Eleteala kandin. Ketà ne sikandin ne edtugenuren te Eleteala lusud te sengivu wey deruwa nehatus wey enem nepulù ne hewii.
7 Dutun ne ruen gira diyà te langit. Si Miguel, ke seveka ne egkeunutan dut te menge suluhuen te Eleteala, wey ke menge ruma rin ne menge suluhuen se mibpevunuey dut te tendayag. Ne mibpekibunù dema ini se tendayag wey ke menge sakup din.
8 Ugaid ne netevanan dan ne impeawà dan en diyà te langit.
9 Su in-antug dan diyà te ampew te dunya ini se rekelà ne tendayag wey langun ne sakup din. Su ini se tendayag ne arà se engkungkun ne uled te rengdengani rà nevenar ne ed-ingaranan ki Setanas ke datù te pekaid, ne metau ne edlimbung te langun ne menge etew kayi te ampew te dunya.
10 Dutun ne ruen nerineg ku ne midlalag te merahing diyà te langit ne migkahi te,
“Ini en ke hewii te kebpeliyu rut te Eleteala te langun ne menge etew,
ne impekita en te Eleteala ke gehem din te edatù.
Ne iring ded dema ke Impasad din ne Ebperetuen te langun,
ne impekita ke baher din te edatù.
Su impeawà din si Setanas diyà te langit,
arà se egkunterà te menge ruma ne mibperetiyaya diyà te dunya,
su merukilem meandew ne edsumbung kandan
diyà te etuvangan te Eleteala.
11 Ugaid ne ke menge mibperetiyaya te Eleteala
ne midtevanan dan arà se edsumbung kandan
impepevayà dut te lengesa ni Hisus
ke ed-ingaranan te Nati te Bilibili
ne mid-imetayan diyà te pinebelavag ne kayu.
Uya, midtevanan dan si Setanas
impepevayà dut te benar ne penurù
ne ibpemenudtul dan.
Ne warà dan menuhuni ke umur dan
misan ibpatey ran su atag dut te kebperetiyaya ran.
12 Tembù be sikiyu ke langun ne ed-ubpà diyà te langit,
ne egkehalew kew su impeawà si Setanas!
Ugaid ne egkeyruwan kew ne ed-ubpà diyà te tanà wey rahat
su in-antug en si Setanas diyà te keniyu!
Ne neepes nevenar sikandin su netuenan din
te mehaan en egkepupus ke hewii rin
te ebaal te meraat.”
13 Ketà te netuenan dut te tendayag te impeawà en sikandin diyà te langit ne in-antug kayi te tanà ne midlayas din ke meritan ne mid-anak te batà ne meama.
14 Ugaid ne ini se meritan ne ruen imbehey te Eleteala kandin ne deruwa ne pakpak te dekelà ne banug su apey ebpekelayang sikandin diyà te ed-ubpaan ne impenehana kandin diyà te tanà ne kenà egkeubpaan te etew. Su riyà ne kenà egkesaut sikandin dut te tendayag su edtugenuren te Eleteala lusud te tetelu wey tengà ne rahun.
15 Ne ini se tendayag, ne mibpehemew te rekelà ne wayig diyà te bèbà din su apey egkeanud arà se meritan.
16 Ugaid ne ke tanà se midtavang dut te meritan su migintaang ini se tanà ne ketà midsenep ke wayig ne riyà ebpuun te bèbà te tendayag.
17 Tembù be dekdekelà se kegkeepes dut te tendayag kayi te meritan, ne mibayaan din ke ruma ne inenakan dut te meritan su ebpekibunù kandan. Ne ini se menge inenakan dut te meritan ne ini ke menge etew ne eduma dut te insuhù te Eleteala wey meilut se kegawed dan dut te benar ne impenurù ni Hisus.
18 Neipus arà ne mibpendiyà ke tendayag te beyvey te rahat ne mid-it-itindeg ketà.