15
Ke Pitu ne Suluhuen te Eleteala ne Ed-ewit te Pitu ne Susun ne Keresayan dut te Menge Etew
1 Ketà ne ruen duma pà maa ne tuus ne mekegeyip nevenar ne nekita ku riyà te langit. Ruen pitu ne suluhuen te Eleteala ne ed-ewit te pitu ne susun ne idrasey ran te menge etew. Ne embiya egked-ulaula ini ne ini en ke ketepusan te kedusa te Eleteala te menge etew dut te ampew te dunya.
2 Dutun ne ruen nekita ku ne iring te ranew ne metingew nevenar su iring en te pehelungan, ugaid ne nekedsawug te apuy. Ne nekita ku rema ketà ke langun ne menge etew ne neketavan dut te mekeandek ne binatang, su warà dan mebpengarap kandin ne warà dan mebpengarap te ledawan ne iring dut te paras din, ne warà dan dema mebpetiyap te tuus ne rumiru te ngaran din. Ne ebpengitindeg dan diyà te beyvey te ranew ne metingew, ne ruen egkeviten dan ne ke ed-ingaranan te harpa ne imbehey kandan te Eleteala.
3 Ne egkanta ran te bayuk ni Moises ini se miduma te Eleteala rengan, wey ke bayuk dut te Nati te Bilibili, ke sikandan te,
“Is Eleteala ne Kerenan dey
ne rekelà se kebayàbayà nu.
Langun ne ed-ul-ulaan nu ne rekdekelà wey mekegeyip.
Sikuna se edatù dut te langun ne menge inged,
ne metidtu wey nekesuhat ke langun ne ed-ul-ulaan nu.
4 Is Kerenan, sikuna ke ed-edatan
wey edeyuen dut te langun ne menge etew
su sikuna rà ke ed-ulaula te metidtu nevenar.
Tembù be ke menge etew diyà te langun ne menge inged
ne ed-uvey keykew ne ebpengarap,
su impekita nu en kandan
ke langun ne mid-ulaula nu ne metidtu nevenar.”
5 Neipus arà ne nekita ku ne nepuwasan ini se Nekebpuru ne Valey te Eleteala diyà te langit, ne nekita ku diyà te lusud te ruhu ne tuus te ke Eleteala ne dutun.
6 Ketà ne nekita ku ne midlihawang ini se pitu ne suluhuen te Eleteala ne ed-ewit te pitu ne susun ne idrasey ran te menge etew. Mibevelegkas dan te mèmeputì ne velegkas ne ebpeneringsing, ne inselauy ran te kumeng dan ke vulawan.
7 Guna su nekelihawang dan en ne ruen seveka rut te arà se epat ne nelimbag ne mibehey te pitu ne bulawan ne lediyà diyà te pitu ne suluhuen te Eleteala. Ne ini se pitu ne lediyà ne nepenù te kegkeepes te Eleteala ne kenà ebpatey taman te taman.
8 Neipus arà ne nepenùpenù te evel ini se Nekebpuru ne Valey te Eleteala su atag dut te raman te Eleteala wey ke gehem din. Ne warà ebpekelusud diyà te Nekebpuru ne Valey te Eleteala taman te kenà egkeipus ke pitu ne kedresaya te menge etew ne mid-ewit dut te pitu ne suluhuen te Eleteala.