18
Ini se Meraat ne Egketemanan dut te Inged ne Bebilunya
1 Dutun ne ruen nekita ku ne ruma pà maa ne suluhuen te Eleteala ne mibpenaug ne ebpuun te langit. Ne ini se kebayàbayà din ne rekelà ne ke keluag dut te ampew te dunya ne egkerayahan te raman din.
2 Ne midlalag te merahing se egkahi te,
“Na nereetan en!
Nereetan en ini se mevantug ne inged ne Bebilunya!
Guntaani ne neubpaan te langun ne mekeandek ne menge busew,
ne neubpaan dema te meraat wey meredsik ne pepenuk.
3 Uya, arà se egketemanan din
su neewit din ke langun ne menge etew
te ebpetevereg dut te binu rin;
ne mibpearig kandan
te ed-amung te ulaula rin ne meraat.
Ne mibpengingniyug kandin ke langun ne menge datù
dut te ampew te dunya;
ne migkewasa ke menge ebpemendehang
kayi te kiyug dut te meritan
ne mepurù ke kebpemasa rin.”
4 Na ruen pà ruma ne suwara diyà te langit ne nerineg ku ne migkahi te,
“Sikiyu ne menge sakup ku,
ne awà kew en keniyan te inged!
Pelahuy kew su apey kew kenà ebpekeruma
te meraat ne ed-ul-ulaan ketà te meritan,
su apey kew kenà ebpekeragkes te kedusa ku kandin.
5 Upama ke idtambù ta arà se menge salà din,
ne egkesugkur din en ke langit su medmerakel en.
Ne warà melipati te Eleteala
arà se meraat ne mid-ulaula rin.
6 Arà se meraat ne mid-ulaula rin keniyu
ne iyan ded dema ed-ul-ulaan diyà te kandin,
ugaid ne edtekepen arà se kedsulii kandin.
Ne ke basù din ne nepenù te mepait ne binu
ne impeinum din te menge etew,
ne edtekepen arà se kepait din te ibpeinum kandin
ne idledawan te kedusa te Eleteala kandin.
7 Su mibpereyùdeyù sikandin ne midtuman
dut te meraat ne kiyug din,
ne arà rema se kevehat dut te keresayan wey kemutuwan
ne ebpekeuma kandin.
Su migkahi arà se meraat ne meritan
ne in-upama te arà ne inged, ke sikandin te,
‘Iring a te bai su warè en egkepemengà ku.
Kenà a balu, tembù be warè en keresayan
ne ebpekeuma kayi te kedì!’
8 Ne geina te arà se pegitungan din,
tembù be egketekew ne ruen ebpekeuma diyà te kandin
ne merakel ne keresayan.
Su lusud te senge andew rà
ne ruen menge daru, kemutuwan wey bitil ne ebpekeuma.
Ne edtutungen dema sikandin su dekelà se gehem
dut te Kerenan ne Eleteala ne edusa kandin.”
9 Na ini se menge datù dut te ampew te dunya ne mibpengingniyug kandin wey miduma rut te meraat ne kiyug din ne ebpeninehew wey ebpemenderawit te egkekita ran ke evel dut te arà se inged ne edtutungen ne in-upama te tengerihen ne meritan.
10 Ne ebpekeriyù dan se edsandeng su egkeandek ke ebpekeragkes dan dut te kedusa kandin ne egkahi ran te,
“Ey mekeyruwiru ini se egketemanan nu,
sikew se mevantug wey mevaher ne inged ne Bebilunya,
su lusud dà te senge uras
ne nekeuma en ke kedusa te Eleteala keykew!”
11 Ne ini se menge ebpemendahang kayi te ampew te dunya ne ebpeninehew wey ebpemenderawit dema su atag dut te kedereeti te arà ne inged su warè en ebpemasa te menge dehangan dan.
12 Uya, warà en ebpemasa te dehangan dan ne bulawan, pirak, menge mepurù ne batu, menge pirlas, menge saput ne meputì wey mehuridtem, menge sida, menge meemut ne kayu, wey menge pekearen ne neveelan dut te ungal te elipanti, pekearen dut te mepurù ne kayu, pekearen dut te galang wey putew, wey pekearen dut te senge susun ne batu ne ed-ingaranan te marbil.
13 Warè en dema ebpemasa te ibpemendahang dan ne menge edsusunan te peninù, menge periyemut ne ed-ingaranan te insinsu wey mira wey frankinsin, menge binu, menge lana, menge tapung wey menge trigu, menge sapì, menge bilibili, menge kudà wey menge kerumata, wey menge uripen ne ibpemendahang dan.
14 Ne egkahi rema ini se menge ebpemendahang ketà te inged ne in-upama te meritan ne tengerihen, ke sikandan te, “Langun ne kearen ne migkiyuhan niyu ne midereetan en. Ini se kekewesai niyu wey ke impereyùdeyù niyu ne nereetan en dema, ne kenà en egkekita maa.”
15 Ne ini se ebpemendahang ne migkewasa rut te kebpemendahang dan ketà te inged ne ebpekeriyù dan se edsandeng su egkeandek ke ebpekeragkes dan dut te kedusa kandin. Ne ebpeninehew ran wey ebpemenderawit
16 se egkahi te,
“Ey mekeyruwiru arà se egketemanan din
dut te arà se mevantug wey mevaher ne inged ne nereetan en!
Rengan ne mibevelegkas ke menge etew ketà
te kumbalà ne sida ne mehuridtem wey merihà.
Ne ruen indayandayan te lawa ran ne mibeelan te bulawan,
mepurù ne menge batu wey menge pirlas.
17 Ugaid ne lusud dà te senge uras
ne neamin nereeti ke langun ne kekewesai rin!”
Dutun ne langun ne menge kepitan te menge kapal wey ke menge etew ne ed-untud ketà, ne ke menge etew ne ebpenggelevek diyà te kapal abpeg dut te menge etew ne ebpenginsedà diyà te rahat ne ebpekeriyù dan
18 se edsandeng dut te evel te arà ne inged ne netutung ne ebensag dan se egkahi te, “Warè en inged ne ebpekerepeng te kevaher te ini ne inged!”
19 Ne ebpemeluhu ran te lipupuk te kegkemutu ran ne ebpeninehew wey ebpemenderawit dan se egkahi te,
“Ey mekeyruwiru ini se egketemanan din
su ini se mevantug wey mevaher ne inged ne nereetan en!
Su ini se kekewesai rin se igkewasa
rut te langun ne kemuney te menge kapal.
Ugaid ne lusud dà te senge uras
ne neamin nereeti ke langun ne kekewesai rin.
20 Ugaid ne sikiyu ne ed-ubpà diyà te langit,
ne egkehalew kew su nereetan en ini se inged.
Ne egkehalew rema ke sikiyu ne mibperetiyaya te Eleteala
wey sikiyu ne menge kedserihan ni Hisu Kristu
wey sikiyu ne mibpelambas te Lalag te Eleteala,
su midusa en te Eleteala ini se inged
atag dut te mid-ulaula rin ne meraat keniyu.”
21 Dutun ne ruen ruma pà ne mevaher ne suluhuen te Eleteala ne migkuwa rin ke batu ne iring dut te kerekelà te gelingan ne in-antug ini diyà te rahat. Ne migkahi te,
“Iring ketà se kegkereeti dut te mevantug ne inged ne Bebilunya
su egketekew egkereeti ne kenè en egkekita.
22 Kenè en egkerineg ini ne inged
ke egkevit te menge harpa wey ke kegkanta te menge etew,
wey ke ebpemulendag wey ebpembudyung.
Kenè en egkekita ne ruen etew ne metau
ne ebpandey te misan engkey en.
23 Ne iring ded dema ne kenè en egkerineg ke gelingan.
Ne warè en rayag dut te sulù ne egkekita ketà,
ne warè en egkerineg ne mehalew ne menge lalag
diyà te kevurunan te kewingan.
Ini se kedusa te inged ne Bebilunya
su ke menge etew ne ebpemendahang diyà te inged din
ne mevantug wey sikandan se migkewasa
dut te langun ne menge etew te ampew te dunya.
Ne ruma pà maa ne midlimbung dan te kedwelweliyan dan
dut te langun ne menge etew te ampew te dunya.
24 Edusaan ke menge etew dut te inged ne Bebilunya
su sikandin se mibpeimatey
dut te menge ebpelambas te Lalag te Eleteala
wey ke menge sakup din.
Uya su rutun ne egkekita ke lengesa
rut te langun ne mibperetiyaya te Eleteala
ne mibpeimatayan atag dut te kebperetiyaya ran
te Eleteala diyà te ampew te dunya.”