5
Ke Midlulun ne Kelatas wey ke Nati te Bilibili ne ruen Gaga rin te Eberat
1 Ketà ne nekita ku te ruen migeweran dut te ebpinuu riyà te ebpinuuwan din te edatù. Ne riyà te kewanan ne belad din ne ingawed din te midlulun ne kelatas ne ruen insurat ketà te idsengeriveluyà, ne ruen pitu ne tuus ne impereket dutun su apey kenà egkeverat.
2 Ne nekita ku ne ruen mevaher ne suluhuen te Eleteala ketà ne mibpekerahing te suwara rin se egkahi te, “Engkey se egkepakey ne id-awà din ini se tuus su eberaten din?”
3 Mibpemengà dan diyà te langit, kayi te ampew te dunya, wey diyà te insekednar, ne warà netuen dan ne egpekegaga te id-awà din arà se pitu ne tuus su apey egkeverat wey ebpekevasa ketà.
4 Tembù be nekesinehew a su warà netuen dan ne ebpekegaga ne ebekar dut te kelatas su apey ebpekevasa ketà.
5 Ketà ne ruen seveka rut te deruwa nepulù wey epat ne pekilukesen ne midlalag kayi te kediey se egkahi te, “Kenà ka edsinehew, su ini se ed-ingaranan te Erimaung ne si Hisu Kristu su ke baher din ne dekelà, ne sikandin ke inenakan dut te bansa ne Huda wey ke inenakan ni David dengan. Ne sikandin ke neketalew en ki Setanas ke datù te pekaid, tembù be sikandin se ebpekegaga ne ed-awà dut te pitu ne tuus wey ebekar kayi te kelatas ne midlulun.”
6 Ketà ne ruen nekita ku ne iring te Nati te Bilibili ne ed-itindeg diyà te luuk dut te ebpinuuwan te edatù wey ke epat ne nelimbag wey ke deruwa nepulù wey epat ne pekilukesen. Arà se Nati te Bilibili ne iring te nekepevaya en te minatey su ruen menge tulak dut te palì din te kineimetayi kandin. Ruen pitu ne sidung wey pitu ne mata rin ne tuus dut te pitu ne ralan ne ibpekita rut te Kedesenan ne Ebpetuntul te Menusiyà ke gehem ne idsuhù din diyà te lusud te ampew te dunya.
7 Ne ketà ne mid-uvey ke Nati te Bilibili diyà te ebpinuuwan dut te edatù, ne migkuwa rin ke kelatas ne midlulun ne migeweran te kewanan ne belad dut te ebpinuu te ebpinuuwan te edatù.
8 Guna su egkuan din en, ne midlumpeng en ini se epat ne nelimbag wey ke deruwa nepulù wey epat ne pekilukesen diyà te etuvangan din su ebpengarap te sikandin ke Nati te Bilibili. Ne uman seveka rut te pekilukesen ne ruen kandin ne egkeviten ne ed-ingaranan te harpa, ne ruen dema migeweran dan ne lediyà ne bulawan ne nepenù te rukut ne edtutungen su ke evel ne ed-itindeg ketà ne arà ke iring te kebpengeningeni rut te menge sakup te Eleteala.
9 Ne migkanta ran te behu pà ne kanta, ke se bayuk dan te,
“Sikuna rà ke ebpekegaga ne ebpekekuwa te midlulun ne kelatas
ne ebpekeawà dut te menge tuus ne impereket ketà.
Su mid-imetayan ka rengan
ne sabap dut te kedtudà te lengesa nu
ketà te kineimetayi keykew,
ne mid-awun nu ke menge etew
ne meraat se ed-ul-ulaan din
dut te langun ne menge inged, bansa wey kinehiyan
su apey sikandan ne egkevaluy ne sakup te Eleteala.
10 Ne in-amung nu sikandan dut te menge etew ne edetuan nu
ne in-amung nu rema sikandan ne menge terebpelengesa
ne egelevek dut te egkiyuhan te Eleteala,
ne ebperetuen nu sikandan kayi te ampew te dunya.”
11 Ketà ne midtengteng a ne ruen menge suluhuen te Eleteala ne nekita ku wey nerineg ku ne egkanta. Egngivuwan dan ne nekelingut se ed-itindeg ketà te ebpinuu te ebpinuuwan te edatù, ke epat ne nelimbag wey ke deruwa nepulù wey epat ne pekilukesen.
12 Ne mibmerahing ke suwara ran se egkanta te,
“Ini se ed-ingaranan te Nati te Bilibili ne mid-imetayan dan,
sikandin ke dait ne ebpengerapan,
ne sikandin ke ed-edatan tew wey edeyuen.
Su ke gehem din ne mevaher,
ne warà tedtab dut te kekewesai rin,
ke itungan din ne metampas,
ne edatù sikandin te langun.”
13 Ketà ne nerineg ku ke kegkanta rut te langun ne ed-ubpà diyà te langit, langun ne ed-ubpà kayi te ampew te dunya, langun ne riyà te insekednar wey langun ne ed-ubpà diyà te rahat. Langun ne nelimbag te Eleteala kayi te linengkevan ne migkanta te,
“Edeyuen tew ini se ebpinuu kayi te ebpinuuwan te edatù,
wey edeyuen rema ini se Nati te Bilibili.
Ed-edatan tew sikandan
ne ibpepurù tew sikandan taman te taman,
su sikandan dà ke warà ebpekerepeng te gehem din.”
14 Ne dutun migkahi ke epat ne nelimbag te, “Egketuman ini.” Ne midlumpeng ke deruwa nepulù wey epat ne pekilukesen ne mibpengarap kandan.