7
Ke Mehatus wey Epat nepulù wey Epat Nengivu ne Menge Etew ne Hudiyanen ne Midtiyapan su tuus te Miduma ran te Eleteala
1 Neipus arà ne ruen nekita ku ne epat ne suluhuen te Eleteala ne ed-itindeg dut te epat ne pediyulu kayi te ampew te dunya, ne mibangen dan ke epat ne keramag su apey kenà edsamber kayi te tanà, rahat wey menge kayu.
2 Ne ruen ruma pà ne suluhuen te Eleteala ne nekita ku ne migemew riyà te edsilaan ne mid-ewit te tumbuk te Eleteala ne warà kemetayen din. Ne mibmerahing se kegkahi rin dut te epat ne suluhuen ne mibehayan te Eleteala te gehem te edereetan ke tanà wey rahat.
3 Migkahi rin kandan te, “Kenà niyu pà dereeti ini se tanà, rahat wey menge kayu taman te kenà dey pà egketiyapan ke menge buked dut te langun ne menge etew ne eduma te Eleteala tew.
4 Dutun ne nerineg ku ke kerakel te menge etew ne netiyapan te buked dan ne mehatus wey epat nepulù wey epat nengivu ran, ne riyà dan ebpuun te sepulù wey deruwa ne bansa rut te menge inenakan ni Israyil.
5 Sepulù wey deruwa nengivu ne menge etew se netiyapan dut te inenakan ni Huda. Ne iring ded dema ne sepulù wey deruwa nengivu ne menge etew riyà te inenakan ni Rubin wey sepulù wey deruwa nengivu ne menge etew riyà te inenakan ni Gad.
6 Ne sepulù wey deruwa nengivu ne menge etew riyà te inenakan ni Asur, ne sepulù wey deruwa nengivu ne menge etew riyà te inenakan ni Neptali, ne sepulù wey deruwa nengivu ne menge etew riyà te menge inenakan ni Manasis,
7 ne sepulù wey deruwa nengivu ne menge etew riyà te inenakan ni Simeon, ne sepulù wey deruwa nengivu ne menge etew riyà te inenakan ni Levi, ne sepulù wey deruwa nengivu ne menge etew riyà te inenakan ni Isakar,
8 ne sepulù wey deruwa nengivu ne menge etew riyà te inenakan ni Sabulun, ne sepulù wey deruwa nengivu ne menge etew riyà te inenakan ni Jose, wey sepulù wey deruwa nengivu ne menge etew riyà te inenakan ni Benjamin.
Ke Denda ne Menge Etew ne Mibevelegkas te Meputì ne Kumbalà
9 “Neipus arà ne ruen nekita ku ne denda ne menge etew ne kenà egkevirang. Riyà dan ebpuun te langun ne edsusunan te menge etew, diyà te langun ne bansa, diyà te langun ne inged wey langun ne kinehiyan te menge etew. Mid-itindeg dan diyà te etuvangan te ebpinuuwan dut te edatù wey riyà te etuvangan dut te Nati te Bilibili. Ne mibevelegkas dan te melayat ne meputì ne kumbalà ne mid-ewit dan te dawun te niyug.
10 Ne mibmerahing se lalag dan se egkahi te,
Edeyuen ta ke Eleteala ini se ebpinuu ne edatù,
ne edeyuen ta rema ini se Nati te Bilibili,
su sikandan ke mibpeliyu keyta
rut te kedusa te menge salà ta.”
11 Ne ruen ketà langun ne menge suluhuen te Eleteala ne midlingut med-itindeg dut te ebpinuuwan te edatù wey ke deruwa nepulù wey epat ne pekilukesen wey ke epat ne nelimbag. Ne midlumpeng dan diyà te etuvangan te ebpinuuwan te edatù ne mibpengarap dan te Eleteala
12 se egkahi te,
“Egketuman ini.
Edeyuen tew ke Eleteala tew.
Ebentuhen tew sikandin.
Ne ed-edatan tew sikandin
su ke itungan din ne metampas,
ne ke kebayàbayà din te edatù ne dekelà
wey ke gehem din ne mevaher.
Ebpeselematan tew sikandin taman te taman.”
13 Ne migkehiyan a rut te seveka te menge pekilukesen, ke sikandin te, “Engkey ini se menge etew ne mibevelegkas te meputì ne kumbalà ne endei ran ebpuun?”
14 Ne midtavak a te, “Kenà ku egketuenan, Datù. Ugaid ne kehiya nu su sikuna se netau.”
Ne migkahi rin te, “Ini se menge etew ne nekepevayà dan te mepasang ne kemeresayan diyà te ampew te dunya. Ne mibpemìpian dan en ini se menge kumbalà dan dut te lengesa te Nati te Bilibili su apey ran ebmepmeputì, ne iyan din meana ne neawà en ke menge salà dan.
15 Tembù be
diyà dan ebpekeitindeg te etuvangan
dut te ebpinuuwan te edatù,
su apey egelevek dan kandin
diyà te Nekebpuru ne Valey rin
te merukilem meandew.
Ne ke Eleteala ne ebpinuu ne edatù se edtuganur kandan.
16 Ne kenà dan en egkevitil,
ne kenà dan en ebpekeinum.
Kenà dan en egkepesangan dut te meinit me andew
etawa piya engkey ne meinit.
17 Su ini se Nati te Bilibili ne kayi te etuvangan
te ebpinuuwan dut te edatù,
ne sikandin se edtuganur kandan,
wey ebpeneheewit kandan diyà te ebpuunan te menge wayig
ne ebpekevehey te umur ne warà edtemanan din.
Ne ke Eleteala ne id-awà din ke kemutuwan dan
ne kenà dan en ebpekesinehew.”