Ke Neuna ne Surat Ni Pablo Riyà te Ki
Timoteo
1
1 Siaken ini se edsurat ne si Pablo. Senge etew a ne kedserihan ni Hisu Kristu igenat dut te suhù te Eleteala ne ebpeliyu keytew wey si Hisu Kristu ke ebpenerengen tew.
2 Ne edsuratan ku sikew, Timoteo, ne iring en te tuney ne anak ku egenat dut te kebperetiyaya nu ki Hisu Kristu.
Iyan ku kiyug ne egkeheram nu ke tavang wey kegkeyru te Eleteala ne Amey tew wey si Hisu Kristu ke Kerenan tew, ne egenat kandan ne ebmerinew ke itungan nu.
Ke Menge Etew Ne Ebpenurù Te Kenà Benar Ne Med-engked
3 Kenà nu lipati, Timoteo, ke migkahi ku keykew te ked-awà ku en te ebpependiyà te Mesidunya. Migkahi a te med-ubpà ka pà diyà te inged ne Ipisu su ruen menge etew ne ebpemenurù te kenà benar, ne peengkera nu sikandan.
4 Ikahi nu kandan se med-engked dan se ebpenurù dut te menge guhud ne mibèbeelan dà te menge apù dan wey ke layab ne guhud te kepuunpuun te apù dan. Su ini se kebpenareng dan dut te warà tapek din ne ebpekevaal dà te kebpelewlewaney, ne kenà dan egketuen ke tidtu ne ibayà ne kayi ran dà egketuen te kedsarig dan te Eleteala.
5 Iyan ku idsuhù ini su apey ran ebpelimlimuey. Ini se kebpelimlimuey ne egenat te hinawa ran ne midtilak te Eleteala su apey warà ebpekesawug ne meraat te itungan dan wey kenà alang-alang se kedsarig dan ki Hisu Kristu.
6 Ugaid ne arà se ebpememandù te kenà benar ne nekesuwey en ketà te tidtu ne ibayà, ne iyan dan en ebpulungan ne ebpelewlewaney te warà rantek din.
7 Egkesuat dan ne ebpememandù te penduan ne impesurat ki Moises dengan, ugaid ne warà dan ma mesebuti ke engkey se meana rin ini se penduan ne idtehel dan ibpenurù te menge etew.
8 Netuenan ta ne meupiya ini se penduan ke embiya iyan ta kedumai ne ke enget dà ne atag din.
9 Ne netuenan ta rema se kenà iyan din egkesuhat te penduan ne ke menge etew ne metidtu, ugaid ne iyan din egkesuhat ke menge etew ne edsumbaker te penduan wey ke menge etew ne ed-engkenà te lalag te Eleteala, ke menge etew ne warà te itungan dan se Eleteala wey ke mekesesalà, ke menge etew ne meraat se itungan dan wey ke menge etew ne edsumpalit te Eleteala, ke menge etew ne ebunù te amey ran wey iney ran wey ruma ne menge etew ne teremunù.
10-11 Benar ne iyan din imbe egkesuhat ini se penduan ne menge etew ne mesalàsalà, menge meama ne ebpeunturey ke elin meama wey ke ebpeunturey ke elin meritan, menge etew ne ebpenggebpà su ebpesaan, menge etew ne teruen wey ke menge etew ne ebpetitihus te tarù, wey misan engkey en ne meraat ne ulaula ne ebpekesuwey rut te tidtu ne penduan te Eleteala. Iring be imbe kayi ne menge etew se egkesuhat kayi te penduan su kenà dan eduma kayi te tidtu ne penurù. Ini se tidtu ne penurù ne kayi te Meupiya ne Tudtul ne ebpesabut keyta mekeatag te Eleteala ne dait ne edeyuen, ne insarig din kedì te ibpemenudtul ini riyà te menge etew.
Ke Kebpeselamat Ni Pablo Rut Te Eleteala
12 Ebpeselemetan ku si Hisu Kristu ke Kerenan tew ne layun ebehey kedì te keeg kayi te gelevek ku. Uya, ebpeselemetan ku kandin su edserihan a rin, ne midtendù a rin ne egelevek kandin.
13 Misan engketà te rengan ne meraat se lalag ku mekeatag kandin, ne mibpemekeiran ku ke menge etew ne mibperetiyaya kandin, ne midtekudì ku sikandin, ugaid ne neyruwan a te Eleteala su warà e pà mekesabut te meraat ke ulaula ku su warà e pà mebperetiyaya ki Hisu Kristu.
14 Melimù nevenar si Hisu Kristu ke Kerenan tew su mid-uluhan a rin te raat te nanam, ne pinesarig a rin kandin, ne midtehuan a rin te kegkelimù ku kayi te menge ruma ku egenat dut te kinepekidseveka ku kandin.
15 Benar iya ini ne egkehiyen mekeatag te iyan impengkayi ni Hisu Kristu te ampew te dunya, ne dait ini ne ebperetiyayaan te langun. Su iyan din impengkayi apey ibpeliyu rin ke menge etew dut te kedusa te salà dan. Ne siaken en iyan se nekeunauna ne belisalà.
16 Misan engketà te siaken en iya se nekeunauna ne belisalà, ne ingkeyru a te Eleteala su apey siaken se igkepekita ni Hisu Kristu te metmetigker sikandin dut te menge etew ne belisalà. Apey ruen ebpekeledawan dut te merakel ne etew te warà etew ne belisalà ne kenà egkepesahad ni Hisu Kristu, ne ketà ne sikandan ke upama ebperetiyaya ran ne ebpekehaked te umur ne warà edtemanan din.
17 Ne edeyrey kiyu ve te Eleteala taman te taman su sikandin dà se Eleteala. Ne sikandin se ebayàbayà te langun taman te warà ketepusan din. Kenà sikandin egkekita su rengan ne daan en sikandin su warà rudsuan din ne warà kemetayen din.
18 Na sikew, Timoteo ne iring te anak ku, ini se igkahi ku kenikew. Tentenuri nu ke ingkahi rut te ebpelambas te lalag te Eleteala rengan mekeatag dut te helevek nu. Tentenuri nu ve apey ebmetihel ke hinawa nu te edtuman dut te insuhù keykew su apey ka ebpenehana te ed-atu rut te meraat.
19 Kemali nu te mevaher ke sarig nu ki Hisus, ne kenà ka ulaula te meraat su apey kenà ka egkeyeyaan diyà te etuvangan te Eleteala wey diyà te etuvangan te menge etew. Su ruen menge etew ne misan netuenan dan ded se meraat ke ulaula ran ne ed-iseg den pà lavew, ne ini ve se sarig dan ne warà en misan daan en ne mibperetiyaya ran.
20 Iyan iring kayi ne en si Himinyu wey si Alejandro. Midlekaan ku sikandan su apey egkeveyveyai en ni Setanas ke datù te pekaid apey ran metueni te kenà iya egkepakey ne edsumpeliten se Eleteala.