12
Pegpekelowà i Pedro lekat te keleboso
1 Nayan, dalem niyan, nemilang se selotan si Herod te menge otaw egpemenal.
2 Impesipal din se lieg i Santiago kakay i Juan.
3 Yan neluba se menge Judiyo kenà egpemenal. Pegketaga-taga i Herod te neluba dan kenyan, impedakep din heman si Pedro. Neinang iyan dalem te pista te pegpengaen te menge Judiyo te pan kenà eglebag.
4 Pegdakep dan kandin, kineleboso aw tinonggoan te sempolò teg enem sondalo. Sebad pongan, teg epat se egtonggò, so ibeg i Herod okomen din si Pedro te pegkepenga te Pista te Pegpelowà amon kitaen te kedita te otaw.
5 Dalem te pegkeleboso ki Pedro, ontò migtawal-tawal se menge otaw egpemenal diyà te Timanem tepad kandin.
6 Tengà te delem te wedà pa dateng se aldaw te peg-okom kandin, timedogi si Pedro doton didalem te keleboso. Dowa se sengkalì in-iket kandin. Impetengà-tengà sikandin diyà te dowa sondalo, aw doen heman menge sondalo egtonggò doton te lowà te tetakep.
7 Pegketà minanyag se didalem te keleboso, so kimidoen se sebad anghil te Timanem. Pinemàdan din si Pedro aw linoka. Minikagi sikandin, “Ayas ka enaw.”
Penga niyan, nelebad se sengkalì lekat te bebenayun din,
8 aw minikagi se anghil, “Pengelen ka aw penepatos ka.”
Pegtolò i Pedro kandin, minikagi se anghil, “Penaol ka aw taking ka kanak.”
9 Penga niyan, timaking si Pedro te anghil. Meneng wedà din ketegahi aw benal se neinang diyà kandin, so eden din aw olò tegeinep.
10 Minokit dan diyà te didowa sondalo egtonggò. Pegdateng dan doton te dakel tetakep te keleboso pesalo doton te lowà, neowang iyan te wedad otaw mig-owang. Yan nekelowà dan. Pegdateng dan doton te sowayan te dalan, ketà migkewedad se anghil.
11 Peg-imanman i Pedro, netegahan din te insogò te Pengolo se anghil din amon megpelowà kandin lekat te belad i Herod, amon eked ketoman se pinelimanan te menge Judiyo kenà egpemenal.
12 Pegkeaneng-aneng i Pedro kenyan, dimoton sikandin te balay i Maria, sìyan inay i Juan, se doma ngadan din si Marcos. Tapay netipon se medita otaw kidoen amon megtawal-tawal dan diyà te Timanem tepad kandin.
13 Pegdateng din doton, tinoktok din se dakel tetakep doton te lowà te balay. Doen sebad allang bayi ngadan din si Roda nenilib kandin.
14 Pegdineg din te kagi i Pedro, kimilala si Roda te sikandin aw ontò neluba, meneng wedà din owangi se tetakep so mig-ayas limikò amon meg-indan diyà te menge doma otaw te dimateng den si Pedro doton te lowà te balay.
15 Meneng minikagi dan, “Migkebook ka.”
Meneng gayed minikagi si Roda te ontò iyan benal. Meneng minikagi dan, “Yan besi se anghil egtonggò kandin.”
16 Dalem niyan, gayed nenoktok si Pedro lamig inowang dan. Pegkità dan kandin, ontò dan nepela.
17 Intakyaw i Pedro se belad din amon mepenek dan, aw in-indan din diyà kandan se pegpelowà te Pengolo kandin lekat te keleboso. Minikagi heman sikandin, “Indani niyo si Santiago aw menge doma otaw egpemenal.”
Penga niyan, nesayo si Pedro aw dimoton te doma ogpeanan.
18 Pegkeiselem, ontò migkebulung se kedita te sondalo, so wedà dan ketegahi aw kenan si Pedro.
19 Migsogò si Herod amon pemehaen si Pedro, meneng wedà dan kitai. Yan ontò ininsà i Herod se menge sondalo migtonggò, meneng wedà dan ketegahi aw kenan. Yan impeimatay din se kedita dan. Penga niyan, nesayo si Herod lekat te Judiya, aw dimoton te Sesarya, aw mig-ogpà doton te nenamay-namay.
Pegkematay i Herod
20 Doen aldaw ontò neopal se selotan si Herod te menge tege Tiro aw tege Sidon. Nayan, dimoton dan kandin amon megkità, so eg-ebaten dan se kànen dan lekat te lonsod nesakop kandin. Impetaking dan se sebad otaw egtelaban ki Herod si Blasto.
21 Aldaw te peg-osay, nenaol si Herod te mèpiya saol te selotan, aw nenenoo doton te onsedanan te selotan, aw minikagi diyà te otaw netipon.
22 Ontò dan neluba aw dimuyun dan kandin, kagi dan, “Kenà otaw. Sikandin se Timanem.”
23 Pegketà impelumun sikandin te anghil te Timanem, so wedà din segdahi se pegduyun dan kandin. Penga niyan, kinaen sikandin te sapat aw yan nematay.
24 Medita se otaw inindanan te kagi te Timanem, aw migkedita se otaw egpemenal.
25 Pegkepenga dan i Bernabe aw si Saulo minated te bowang doton te Jerusalem, minolì dan doton te Antyokya. Impetaking dan si Juan, se doma ngadan din si Marcos.