1 Pegkepenga te lima se aldaw, dimoton se ontò pengolo te dakel simbahan si Ananias te Sesarya sipat menge obanen te dakel simbahan aw sebad abogado si Tertulo. Dimoton dan amon meg-indan dan diyà te gobirnador te ingkeopal dan ki Pablo. 2 Impeangay si Pablo aw penga niyan, timindeg si Tertulo aw minikagi diyà te gobirnador, “Ontò ka day induyun. Mèpiya se keogpà day, so sikona se eglowan kenami. Egtodaen no se medaet dini kenami, so mèpiya se inenengen nikaw. 3 Nedengeg iyan doton te kedita te lonsod te kelikit te aldaw. Egpesiontongan day se kèpiya nikaw. 4 Eked a den ikagi diyà kamno te menamay. Yan keidowi a aw penenalan ka te kagi ko kamno. 5 Netegahan day te ontò medaet se otaw seini, so egsemoken din se kedita te Judiyo dini te kebelad te keneyonan, aw sikandin se egpengibing te menge otaw egpemenal te sebad otaw tege Nasarit. 6 Linindoan din heman se dakel simbahan egpenimeneman doton te Jerusalem. Yan dinakep day sikandin. [Ibeg day peden meg-okom kay kandin. 7 Meneng dimateng se ontò kapitan te sondalo si Lisias aw migleges kenami amon ibegay day si Pablo diyà te belad din. 8 Migpunù heman sikandin te keilangan domini se menge otaw neopal diyà ki Pablo.] Aw meg-insà ka kandin, yan ketegahan no te ontò benal se inikagi day kamno.”

9 Dimogyon heman se menge doma din Judiyo, aw minikagi dan te benal se inikagi din.

10 Penga niyan, migtangù-tangù se gobirnador diyà ki Pablo amon mikagi. Yan minikagi sikandin, “Netegahan ko te ontò den nenamay limowan ka dini te probinsya seini. Yan neluba a so sikona se menenalan te taba ko te kagi dan. 11 Olò sempolò pa teg dowa se aldaw, dimoton a te Jerusalem amon megsimba a kidoen. Aw meg-insà ka te menge doma otaw, mekeindan dan te benal iyan. 12 Wedà a pegdindil te menge doma otaw. Wedà a pegsamok te doma otaw pengkey doton te dakel simbahan, aw doton te menge doma simbahan te Judiyo, aw doton te menge balay. 13 Wedad palos ipekità dan kamno te benal doen salà ko. 14 Eg-ikagi a te benal diyà kamno. Egsimbahen ko se Timanem egseligan te kemonaan day. Se kebenalan egtekingan ko, yan son dan se kebolalaw. Egtolò a te kedita te punù ingkeliwat i Moises aw menge doma telekeliwat te kagi te Timanem. 15 Onawa heman se egpelimanan ko aw menge otaw neopal kanak, so egpelimanan ko heman se peg-antay te Timanem te kedita te otaw lekat te nematay, pengkey otaw egpenimanem aw otaw kenà egpenimanem. 16 Ontò a measeb eg-inang te mèpiya, so ibeg ko wedad palos ikeyàyà ko diyà te Timanem aw otaw. 17 Pengkey nenamay wedà a likò doton te Jerusalem, meneng dimoton a seini, so mig-ated a te kwarta itabang diyà te menge doma ko Judiyo nelimahan aw ibowang diyà te Timanem. 18 Dalem niyan, kidoen a te dakel simbahan so tinoman ko se pakang ko diyà te Timanem. Wedad palos otaw pigtipon ko. Wedà a pegsamok te doma otaw. Meneng doen menge Judiyo lekat te Asya kimità kanak. 19 Neopal dan kanak. Mèpiya peden aw dini sikandan amon megdimanda dan tepad kanak aw simpana doen salà ko. 20 Insai se menge otaw dini aw eden se salà ko kinità te menge obanen te simbahan te peg-insà dan kanak kedengan. 21 Benal minikagi a, ‘Impedini a amon insaen a niyo te aldaw seini, so siak se egpemenal te entayen te Timanem se otaw lekat te nematay.’ ”

22 Yan simagked si Felis te peg-osay, so netegahan din den se ipegtoladà te otaw timaking ki Jesus. Minikagi sikandin, “Eposen ko se osay aw domateng se kapitan si Lisias.”

23 Penga niyan, minikagi si Felis diyà te serhinto te ebey pa tonggoan si Pablo, meneng eked begayi te kelimahan. Mepakay aw leoyen sikandin te menge doma din amon megtabang dan te kandin kepulukan.

24 Pegkenamay-namay, dimoton si Felis aw esawa din si Drusila sebad Judiyo. Impeangay din si Pablo amon menenalan dan te itoladà din tepad te pegpemenal diyà ki Jesu Cristo. 25 Migtoladà heman si Pablo te keilangan metòlid se eg-inangen te otaw, aw megtameng te ibeg te pedowan, aw doen kwani aldaw meg-okom se Timanem te kedita te otaw. Pegtoladà i Pablo kenyan, ontò nelemitan si Felis aw minikagi, “Botongi den se pegtoladà nikaw. Aw doen aldaw, todà ta engayen.”

26 Melikit impeangay i Felis si Pablo amon megpebelaw-belaway dan, so eden din aw doen kwarta ibegay i Pablo kandin amon mekelowà. 27 Penga te dowa se omay, ininang gobirnador si Porcio Festo simelilin ki Felis. Wedà pelowai i Felis si Pablo, so ibeg din meluba kandin se menge Judiyo kenà egpemenal.