7
Kagi i Esteban
1 Mig-insà se ontò pengolo te simbahan ki Esteban, kagi din, “Benal lay se kagi dan?”
2 Timaba si Esteban, kagi din, “Menge kedowa aw emayen ko, penenalan kaw kanak. Gebii pa te peg-ogpà i Abraham doton te Mesopotamya, te wedà pa alin doton te Haran, migpekità se Timanem diyà kandin lekat te langit.
3 Minikagi se Timanem, ‘Tanan ka te kedomaan no aw ogpeanan no seini. Doton ka te ogpeanan tedoan ko kamno.’
4 Timolò si Abraham, aw nesayo lekat te Kaldiya, aw mig-ogpà doton te Haran. Pegkematay te amay din, impealin te Timanem si Abraham dini te ogpeanan tadon.
5 Wedad tanà imbegay te Timanem kandin pengkey deitek. Pengkey wedad palos batà i Abraham, meneng migpakang se Timanem te doen tanà ibegay kandin aw menge bowad-bowad din.
6 Minikagi se Timanem te meg-ogpà se menge bowad-bowad din doton te ogpeanan tinig-apò te menge doma otaw. Kelimahan dan aw ellangen dan te doma otaw taman te epat gatos se omay.
7 Minikagi se Timanem, ‘Ipelumun ko se otaw meg-allang te bowad-bowad no, aw ipelowà ko dan lekat kidoen. Penga niyan, meg-ogpà dan dini aw megsimba dan kanak.’ Yan se pakang te Timanem ki Abraham.
8 Penga niyan, migpunù se Timanem te keilangan tolien si Abraham aw kedita te bowad-bowad din meama amon eked dan kelibeli se impakang te Timanem kandan. Yan pegkepenga te sebad simana lekat te pegtebaw te batà din si Isaac, tinolì din. Iling kenyan, tinolì i Isaac se batà din si Jacob. Nenolì heman si Jacob te sempolò teg dowa batà din meama. Sikandan se kemonaan tadon.
9 “Doen sebad batà i Jacob si Jose. Miningà se menge kedowa din, aw imbeligyà dan sikandin, aw yan pig-allang doton te Ehipto. Meneng tinebangan te Timanem sikandin
10 aw yan neketayod te kelimahan. Ontò sikandin biyasa, aw yan neluba se selotan te Ehipto si Paraon. Ininang din si Jose gobirnador doton te Ehipto aw amo te kedita doton te balay din.
11 Doen bayil doton te Ehipto aw Canaan. Ontò nelimahan se kedita te otaw. Wedad heman kànen te kemonaan tadon.
12 Pegketaga-taga i Jacob te doen kànen doton te Ehipto, insogò din se menge batà din doton te Ehipto. Yan se tagnà pegdoton dan amon mayad dan te kànen.
13 Ikedowa te pegdoton dan te Ehipto, migpekilala si Jose te menge kedowa din, aw mig-indan ki Paraon te sikandan se menge kedowa din.
14 Nayan, impeangay i Jose se amay din aw menge nayi aw anak din. Kepitowan teg lima se kedita dan.
15 Minalin si Jacob aw mig-ogpà doton te Ehipto. Pegkepenga niyan, migkemematay se teg sebad-sebad kandan doton te Ehipto, si Jacob aw batà din menge kemonaan tadon.
16 Inibing se lawa te nematay doton te Sikem, aw inlebeng dan kidoen te ilib doton te tanà tapay bineyadan i Abraham diyà te menge batà i Hamor.
17 “Sagwa agpet den metoman se pakang te Timanem ki Abraham, migkedita se kemonaan tadon doton te Ehipto.
18 Limowan se sebad selotan wedà ketaga-taga ki Jose.
19 Nemilang se selotan sìyan te menge kemonaan tadon, aw migleges kandan igsà kedita te kaling batà timebaw impeibing din dan te amay doton te mediyò aw tinenanan dan amon matay.
20 Dalem niyan, timebaw si Moises pinemallì te Timanem. In-eles sikandin te amay aw inay din kidoen te balay dan taman te telo se bolan.
21 Pegtanan dan kandin doton te kilid te wayeg, netelaan te batà i Paraon bayi. Yan pigbatà-batà din si Moises.
22 Pigtoledaan sikandin te kedakel te kebiyasa te tege Ehipto. Pegketesan din, ontò biyasa se peg-ikagi aw peg-inang din.
23 Mondà kepatan se omay din, limaoy si Moises te kedomaan din menge bowad-bowad i Israel.
24 Netelaan din se sebad tege Ehipto nemilang te sebad kedomaan din Judiyo. Penga niyan, dimapit si Moises te kedomaan din, aw dinaeg din se tege Ehipto, aw inimetayan din,
25 so eden din aw meg-aneng-aneng se menge Judiyo te sikandin se insogò te Timanem amon mengibing kandan lomowà lekat te Ehipto. Meneng wedà dan peg-aneng-aneng kenyan.
26 Keeldawan niyan, netelaan din se didowa Judiyo migbolaw. Migtelaman si Moises mig-osay kandan. Minikagi sikandin, ‘Elew, telekedowa kaw. Ikà niyo egbolaw.’
27 Meneng neopal heman ki Moises se otaw neopal te doma din. Inseging din si Moises aw minikagi, ‘Wedad migsogò kamno amon lomowan ka aw megtoladà kenami.
28 Imetayan a no lay heman iling te ininang no te tege Ehipto gebenini?’
29 Pegdineg i Moises kenyan, nelemitan aw kimadas doton te Midian, sebad lonsod mediyò. Mig-ogpà sikandin kidoen, aw nengognan, aw migbatà te dowa meama.
30 “Penga te kepatan se omay, kidoen si Moises te kebigtilan doton te ongan te bontod iningedanan Sinay. Migpekità se anghil diyà kandin doton te sagbet limegdeg.
31 Pegkità i Moises kenyan, ontò nepela. Migpedapag sikandin amon tomengteng. Meneng dinineg din se kagi te Pengolo lekat te apoy,
32 ‘Siaken se Timanem egseligan te kemonaan no gebii si Abraham, si Isaac, aw si Jacob.’ Pegdineg din kenyan, wedà ebey tengteng, so ontò sikandin nelemitan aw tinegangtang.
33 Minikagi se Pengolo, ‘Lowasi se sepatos no amon memasa ka kanak, so egpenimeneman se tanà seini.
34 Netegahan ko te ontò nelimahan se menge kedomaan no pinemallì ko doton te Ehipto. Dinineg ko se pegtawal-tawal dan diyà kanak. Megpelowà a den kandan. Na, sikona den se isogò ko doton te Ehipto.’
35 “Si Moises se tapay kinuluwan te kedomaan din bowad-bowad i Israel, so tapay dan minikagi, ‘Wedad migsogò kamno amon lomowan ka aw megtoladà kenami.’ Meneng sikandin se insogò te Timanem amon lomowan aw mengibing kandan. Migtabang kandin se anghil migpekità diyà kandin doton te sagbet limegdeg.
36 Si Moises se mig-inang te kepelahan doton te Ehipto. Sikandin se nengibing kandan te pegkesayo dan lekat te Ehipto. Sikandin se nengibing kandan te peg-okit dan te dagat iningedanan Dagat Melalag, aw doton heman te kebigtilan te kepatan se omay.
37 Si Moises se mig-indan diyà te menge bowad-bowad i Israel te doen kwani sebad kedomaan dan inangen te Timanem telekeliwat te kagi din iling te pegsogò din ki Moises.
38 Si Moises se inindanan te anghil te kagi te Timanem kidoen te bontod iningedanan Sinay. Sikandin heman se migkeliwat te kagi te Timanem diyà te menge kemonaan tadon netipon kidoen te kebigtilan, aw ingkeliwat den heman iyan diyà kenitadon.
39 Meneng wedà tolò se kemonaan tadon kandin. Wedà dan penenalan kandin, so ibeg dan lomikò doton te Ehipto.
40 Pegtikedeg i Moises te bontod, nemoyò dan diyà ki Aaron, ‘Inangi kay te inotaw amon doen mengibing kenami, so wedà day ketegahi aw nemeno si Moises, sìyan nengibing kenitadon lekat te Ehipto.’
41 Penga niyan, ininang dan se inotaw iling te bawa te nati te baka. Migdogsò dan aw migtawal-tawal dan kenyan. Induyun dan se ininang dan sìyan.
42 Yan timinàyog se Timanem kandan. Pinebeyaan din se pegsimba dan te bolan, aw bitoen, aw aldaw. Gebii, simolat se sebad telekeliwat te kagi te Timanem, kagi din,
‘Menge bowad-bowad i Israel, peglikò-likò niyo doton te kebigtilan taman te kepatan se omay, kenà ko se binegayan niyo te ayam-ayam indogsò niyo.
43 Meneng doen menge inotaw ininang niyo amon simbahen niyo dan. Inibing niyo se dogsoanan te sebad diwatà si Molok. Inibing niyo heman se egdogsoan niyo iling te bitoen iningedanan Refan. Yan ipelumun ko den sikiyo, so meibing kaw digsel doton te mediyò ogpeanan Babilonya.’
Yan se kagi te Timanem.
44 “Gebii te peglikò-likò te menge kemonaan tadon doton te kebigtilan, eg-ibingen dan se balay sinolan te bato sinolatan te menge punù te Timanem, so insogò dan te Timanem meg-inang dan te balay sìyan inetepan te penenaktun, iling te impekità te Timanem ki Moises.
45 Pegkematay i Moises, si Josue se nengibing te menge Judiyo te pegpesalo dan doton te ogpeanan impakang te Timanem kandan. Pengkey kenan dan pesalo, gayed dan eg-ibingen se balay sìyan inetepan te penenaktun. Migtabang se Timanem kandan, aw impekadas din se menge doma otaw kidoen amon doen ogpaan dan. Nenamay dan migtawal-tawal kidoen te balay sìyan eg-ibingen dan lamig te peglowan i David.
46 “Neluba se Timanem te peglowan i David. Ibeg i David meg-inang peden te dakel simbahan te pegtawal-tawal dan diyà te Timanem.
47 Meneng batà i David si Solomon se nekeinang kenyan.
48 Meneng eked peg-ogpà se Timanem Melangkaw diyà te lowang te simbahan inangen te otaw, so simolat se telekeliwat te kagi te Timanem gebii, kagi din,
49-50 ‘Langit se onsedanan ko, aw keneyonan se gìtanan ko. Siaken se mig-inang te kedita. Eked kaw pekebatog te peg-inang te balay ogpaan ko. Wedad etodanan inangen niyo kanak, so ininang ko se kedita.’
Yan se kagi te Pengolo.
51 “Ontò kaw metugul, so kenà kaw egtolò te Timanem. Eked kaw penenalan te kebenalan. Iling kaw te kemonaan tadon, so gayed kaw eg-eked te Espiritu Santo.
52 Pinemilang te kemonaan tadon se kedita te telekeliwat te kagi te Timanem, so inimetayan dan se otaw mig-indan kandan te domateng se isogò te Timanem wedad salà din. Pegdateng din, migtolok aw nemonò kaw kandin.
53 Pengkey sikiyo se otaw kineliwatan te menge anghil te kagi te Timanem, meneng wedà kaw tolò kenyan.”
Pegpengimatay ki Esteban
54 Pegdineg te menge obanen te simbahan te kagi i Esteban, ontò dan neopal, aw nengiteb-kiteb dan tandà te keopal dan.
55 Meneng gayed egbeyà-beyaan te Espiritu Santo si Esteban. Peglengag din doton te langit, kinità din se kelangkaw te Timanem aw si Jesus timangkil kandin.
56 Minikagi si Esteban, “Tay. Kinità ko se langit neowang, aw kidoen se Timanem Migpekeotaw eglowan den tangkil te Timanem.”
57 Meneng sinempengan te kedita te otaw se telinga dan amon eked dan dineg te kagi din. Migpuypuy dan tandà te keopal dan. Penga niyan, linimpongan dan si Esteban,
58 aw inseging doton te lowà te Jerusalem. Binontogan dan sikandin te bato amon matay. Doen sebad telaki si Saulo migtonggò te saol linowas te menge otaw nemontog ki Esteban.
59 Pegbontog dan kandin, migtawal-tawal sikandin, kagi din, “E Jesus Pengolo ko, kinewai se pedowan ko, so matay a den.”
60 Penga niyan, limongken si Esteban aw timawal te dakel se kagi din, “E Pengolo, ikà egpelumun kandan te salà ininang dan kanak.”
Penga niyan, nematay.