38
Si Juda aw si Tamar
1 Nayan, dalem niyan, timanan si Juda te menge kedowa din, aw minalin sikandin doton te balay i Hiras tege Adulam.
2 Kinità i Juda se bayi kidoen tege Canaan batà i Suas, aw yan se pinengognan din.
3 Miglaman se esawa din, aw doen batà meama timebaw diyà kandin iningedanan i Juda ki Er.
4 Todà miglaman se esawa din, aw doen batà meama timebaw diyà kandin iningedanan te inay din ki Onan.
5 Todà doen batà meama timebaw diyà kandin, aw iningedanan iyan te inay din ki Selas. Doton dan te Sesib te pegtebaw i Selas.
6 Nayan, pegkenamay, impeipid i Juda se penganay batà din si Er diyà ki Tamar.
7 Medaet se eg-inangen i Er, aw wedà keluba se Timanem kandin. Yan inimetayan sikandin te Timanem.
8 Penga niyan, minikagi si Juda diyà ki Onan, “Keilangan lomayok ka diyà te nayi no nebalo, so keilangan tomanen no se ketanem tadon tepad te inangen te kedowa te meama nematay te wedad pa batà te esawa din, amon doen peden batà te kedowa nikaw nematay.”
9 Meneng netegahan i Onan te eked kepakay aw kandin se batà tomebaw diyà te nayi din, so meinang iyan batà te kakay din nematay. Doun niyan, peglayok din diyà te nayi din nebalo, gayed din impedelowak se benì din diyà te lowà, amon wedad meinang batà te kakay din nematay.
10 Meneng wedà keluba se Timanem tepad te ininang din sìyan, aw yan inimetayan heman sikandin te Timanem.
11 Penga niyan, minikagi si Juda diyà te ogangan din si Tamar, “Olì ka den aw peg-ogpà ka doton te balay te amay no dalem te wedad pa esawa no lamig megketelaki se doma batà ko si Selas.”
Yan se inikagi i Juda so nelemitan sikandin aw matay heman si Selas iling te menge kedowa din. Yan minolì si Tamar doton te balay te amay din.
12 Nayan, pegkenamay-namay, nematay se esawa i Juda batà bayi i Suas. Pegketagkas te menge aldaw te pegkelano i Juda, dimoton sikandin te ogpeanan te Timna sipat te sigalak din si Hiras tege Adulam, so gontingan din se menge karniro din kidoen.
13 Inindanan si Tamar te dimoton se ogangan din te Timna amon meglegonting sikandin te menge karniro din.
14 Pegdineg din kenyan, linowas din se dagom eggemiten te balo aw migdagom sikandin te sebad kemolò, aw sinempengan din heman se bawa din amon eked sikandin kilelai. Dimoton sikandin te dalan medapag te lonsod te Enaim aw nenenoo sikandin kidoen, so yan se dalan okitanan te otaw pesalo doton te Timna. Netegahan din te pengkey migketelaki den si Selas, meneng wedà dan pa peipidi.
15 Na, pegkità i Juda ki Tamar, eden din aw kepoyun, so sinempengan din se bawa din.
16 Yan migpedapag si Juda diyà kandin doton te kilid te dalan, aw minikagi sikandin, “Aw mepakay, lomayok a den diyà kamno.” Wedà din kilelai se ogangan din.
Mig-insà si Tamar, “Eden lay se ibayad no aw lomayok ka kanak?”
17 Timaba si Juda, “Ipeibing ko diyà kamno se nati te kambing lekat te menge ayam-ayam ko.”
Minikagi si Tamar, “Doen lay ipondo no seini lamig ipeibing no se kambing?”
18 Mig-insà si Juda, “Eden lay se ipondo ko diyà kamno?”
Timaba si Tamar, “Se peningsing impeninga nikaw, aw sìyan bangkà diyà te belad nikaw.”
Imbegay din iyan diyà kandin, aw limayok diyà kandin, aw miglaman si Tamar.
19 Penga niyan, minolì si Tamar, aw linowas din se insampeng din te bawa, aw todà sikandin migdagom te dagom te balo.
20 Dalem niyan, insogò i Juda se sigalak din si Hiras amon mengibing sikandin te kambing doton te bayi aw amon mengabat te impondo din diyà kandin. Meneng wedà din kitai.
21 Mig-insà si Hiras diyà te menge otaw mig-ogpà kidoen te Enaim, “Kenan lay den se kepoyun nenenoo gina dini medapag te dalan?”
Timaba dan, “Wedad palos kepoyun dini.”
22 Penga niyan, limikò si Hiras doton ki Juda, aw minikagi, “Wedà ko kitai. Inikegiyan a te menge otaw eg-ogpà kidoen te wedad palos kepoyun kidoen.”
23 Minikagi si Juda, “Wedad beloyan. Kandin den se impondo ko amon eked ki den keyàyà. So pengkey begayan ko peden sikandin te kambing, meneng wedà no sikandin kitai.”
24 Nayan, penga te menge telo se bolan, inindanan si Juda, “Iling te kepoyun se ogangan no si Tamar, so mebedes den sikandin.”
Minikagi si Juda, “Engayi niyo sikandin aw sonogi niyo amon matay.”
25 Dalem te peg-angay dan ki Tamar, doen insogò din amon mikagi diyà te ogangan din, “Mebedes a den pineokit te tig-apò te peningsing seini ipegpeninga aw bangkà. Ketegahan no besi aw sinu se tig-apò kenyan.”
26 Kinilala iyan i Juda, aw minikagi sikandin, “Labi pa medaet se ininang ko diyà te ininang din, so wedà ko sikandin peipidi diyà te batà ko si Selas.”
Penga niyan, wedà todà layok si Juda diyà kandin.
27 Pegdateng te aldaw aw agpet tebawan si Tamar, netegahan te pingin se tomebaw.
28 Dalem te pegtebaw, limowà se bebenayen te sebad batà. Binagkes te menegemunay se lelengoan te sinolib ontò melalag, aw minikagi sikandin, “Seini se tagnà limowà.”
29 Meneng linenek te batà se belad din. Kedowa din beling se tagnà timebaw, aw yan minikagi se menegemunay, “Magsen ka limowà.” Yan iningedanan sikandin ki Pares (kelebadan niyan, magsen limowà).
30 Penga niyan, timebaw se kedowa din binagkes se lelengoan te sinolib melalag. Iningedanan sikandin ki Seras (kelebadan niyan, ontò melalag).