5
Pinegolì i Jesus se otaw kidoen te lanaw
1 Penga niyan, doen pista ininang te menge Judiyo, aw yan dimoton si Jesus te Jerusalem amon tomanod.
2 Doen lanaw kidoen te Jerusalem doton dapag te lelebangan te kotà nekelibed te lonsod, sìyan iningedanan Lelebangan te Karniro. Iningedanan se lanaw Bitsata te menge otaw eg-ikagi te Hebreo, aw doen lima elonganan kidoen te kilid niyan.
3 Medita se otaw doen mesakit eg-ogpà diyà te lima elonganan niyan, aw migtagad dan te pegpegolì kandan. Doen menge bota. Doen menge kapig. Doen heman menge otaw kenà egpekeiwal. [Gayed dan migtagad te pegketigaw te wayeg kidoen,
4 so seletà doen anghil te Timanem mebo kidoen te lanaw, aw megtigaw te wayeg kidoen. Penga niyan, aw ayas mebo se otaw diyà te wayeg, kegolian dan.]
5 Doen sebad otaw kidoen nesekitan te ketlowan pa teg walo se omay.
6 Kimità si Jesus kandin minibat, aw netegahan din te ontò sikandin nenamay nesekitan. Mig-insà si Jesus, “Meibeg ka lay kegolian?”
7 Timaba se otaw, “Meneng Sir, aw metigaw se wayeg, wedad otaw megsawol kanak kidoen te wayeg. Pengkey megtelaman a, meneng gayed mekeonà se doma te eked a pa dateng kidoen.”
8 Minikagi si Jesus, “Enaw ka. Loloni se inibatan no, aw ipanaw ka.”
9 Ketà negolian sikandin. Linolon din se inibatan din aw minipanaw.
Neinang iyan te Sebado, aldaw te peg-etod.
10 Yan neopalan te menge obanen te Judiyo se otaw negolian. Minikagi dan, “Seini se aldaw te peg-etod. Nekelàpang ka te punù so nengibing ka te ikam.”
11 Meneng timaba sikandin, “Se otaw migpegolì kanak, yan se migpunù kanak te peglolon ko te ikam aw peg-ipanaw ko.”
12 Mig-insà dan, “Sinu lay se otaw migpunù te peglolon no te ikam aw peg-ipanaw nikaw?”
13 Meneng wedà ketegahi te otaw negolian aw sinu se ngadan te migpegolì kandin, so dimeleg den si Jesus, aw medita se otaw netipon kidoen.
14 Penga niyan te wedà kenamay, nengemahà si Jesus kandin kidoen te dakel simbahan te Judiyo. Pegkità din kandin, minikagi si Jesus, “Na, negolian ka den. Lengà ka den te peg-inang no te salà amon eked ka detengi te labi pa medaet.”
15 Penga niyan, nesayo se otaw negolian, aw mig-indan diyà te menge obanen te Judiyo te si Jesus se migpegolì kandin.
16 Yan se doun te pinemilang dan si Jesus, so neopal dan te pegpegolì din te otaw aldaw te Sebado.
17 Meneng doen intaba i Jesus kandan, so minikagi sikandin, “Gayed egterbaho se Amay ko pengkey aldaw seini, aw yan se doun te gayed a heman egterbaho.”
18 Pegdineg dan kenyan, labi dan pa meibeg mengimatay kandin. Neopal dan kandin so wedà sikandin taking te ketanem dan tepad te aldaw te peg-etod. Neopal dan heman so minikagi sikandin te Timanem se Amay din, aw pineokit kenyan onawa se kelangkaw din diyà te Timanem.
Doen kaling pedowan pineokit ki Jesus
19 Minikagi si Jesus diyà te menge obanen te Judiyo, “Eneng-enengi niyo se kagi ko kenyo. So Batà a te Timanem, wedad palos inangen ko lowà te ibeg te Amay ko. Olò ko inangen se tapay kinità ko eg-inangen te Amay ko. Se inangen din, yan heman se inangen ko,
20 so dakel se pedowan te Amay ko kanak, aw pinekitaan a din te kedita te eg-inangen din. Doen pa inangen din ipekità din pineokit kanak labi pa metolos te ininang ko den amon ontò kaw mepela.
21 Eg-antay se Amay ko te otaw nematay, aw egpemegay kandan te kaling pedowan. Iling heman kenyan se inangen ko, so memegay a heman te kaling pedowan diyà te kedita te otaw pemellien ko.
22 Kenà Amay ko se meg-okom te otaw, meneng binegayan a din te peg-okom,
23 so ibeg din segmanen a heman te kedita te otaw, onawa te pegsagman dan kandin. Aw eked pegsagman se otaw kanak, yan se pengilala te kenà heman sikandin egsagman te Amay ko simogò kanak.
24 “Eneng-enengi niyo se kagi ko kenyo seini. Se otaw menenalan te kagi ko, aw memenal heman diyà te Amay ko simogò kanak, yan se otaw begayan te kaling pedowan wedad temanan. Eked sikandin pelumuni, so nekelowà den sikandin lekat te kemetayun, aw doen den kaling pedowan din wedad temanan.
25 Eneng-enengi niyo se kagi ko kenyo. Doen aldaw domateng, igsà dimateng den iyan, aw domineg te kagi ko se menge otaw wedad pedowan. Aw memenal dan kanak, begayan dan te kaling pedowan wedad temanan.
26 So Amay ko Timanem se eglekatan te kaling pedowan wedad temanan, ininang a din heman eglekatan te kaling pedowan wedad temanan.
27 So siak se Timanem Migpekeotaw, binegayan a din heman te peg-okom te otaw.
28 Ikà niyo egkepela te kagi ko seini, so doen aldaw domateng aw domineg se kedita te otaw nematay te tawal ko kandan.
29 Penga niyan, meantay dan lekat te nematay. Se otaw tapay mig-inang te mèpiya, yan se entayen amon eked dan palos todà kematay. Meneng se otaw tapay mig-inang te medaet, yan se otaw entayen amon ipelumun dan.”
Benal si Jesus se insogò te Timanem
30 “Wedà ko teboki se inang ko. Iling te intoladà din kanak se peg-okom ko, aw metòlid se peg-okom ko, so kenà kenaken ibeg se egtekingan ko, meneng egtekingan ko se ibeg te Amay ko migsogò kanak.
31 “Simpana olò sebad ko se meg-indan kenyo tepad kanak, eked niyo besi pemenali se kagi ko.
32 Meneng doen doma mekeindan te benal tepad kanak, aw netegahan ko te keseligan se kagi din tepad kanak.
33 Doen otaw insogò niyo amon meg-insà diyà ki Juan Memonyagay tepad kanak, aw mig-indan heman sikandin te benal tepad kanak.
34 Wedad keilangan ko te doen otaw meg-indan te benal tepad kanak. Meneng pineeneng-enengan ko sikiyo tepad te inikagi i Juan Memonyagay amon memenal kaw kanak, aw mekelowà kaw lekat te salà.
35 Si Juan Memonyagay, iling sikandin te solò ontò meanyag, aw neluba kaw tandà te intoladà din kenyo te wedà kenamay.
36 Meneng doen pa meg-indan te benal labi pa keseligan diyà ki Juan, so lekat te Amay ko se kedita te kepelahan eg-inangen ko, aw yan se egpetaga-taga te ontò a insogò te Amay ko.
37 Sikandin se mig-indan te benal tepad kanak, meneng wedà kaw keibeg menenalan te kagi din kenyo. Wedà kaw heman keibeg komità kandin.
38 Eked niyo heman soli se kagi din kidoen te pedowan niyo, so pengkey insogò a din, eked a niyo pemenali.
39 Gayed kaw egbasa te kagi te Timanem tapay insolat, so aneng-aneng niyo, kebegayan kaw te kaling pedowan wedad temanan pineokit te pegbasa niyo kenyan. Eg-indan se kagi te Timanem te benal tepad kanak,
40 meneng eked kaw pa pemenal kanak, aw yan eked kaw begayi te kaling pedowan wedad temanan.
41 Kenà aw egkeibegan ko se duyun te otaw,
42 meneng netegahan ko te wedad kedakel te pedowan niyo diyà te Timanem.
43 Pengkey insogò a te Amay ko amon megtoladà a kenyo tepad kandin, meneng wedà a niyo pemenali. Meneng aw doen doma otaw megtoladà wedà sogoi te Timanem, yan se pemenalen niyo.
44 Ibeg niyo iduyun kaw te menge doma otaw, meneng eked kaw keibeg iduyun te sebad olò Timanem. Yan se doun te eked kaw pemenal.
45 Kenà ko se megdimanda diyà te Timanem tepad kenyo te modi aldaw, so se kemonaan niyo si Moises egseligan niyo, yan se megdimanda te aldaw sìyan amon ipelumun kaw.
46 Simpana ontò kaw nemenal te kagi i Moises, nemenal kaw heman kanak, so simolat si Moises tepad kanak.
47 Meneng aw eked kaw pemenal te insolat din, eked kaw heman pemenal te ikegiyen ko.”