18
Tegdeyanan tepad te bayi balo egpengenganay
1 Mig-indan si Jesus te tegdeyanan amon ketoledaan dan te keilangan gayed dan megtawal-tawal amon eked dan lengà.
2 Minikagi sikandin, “Kidoen te sebad lonsod, doen howis kenà egpenimanem aw kenà heman egkeido te doma otaw.
3 Doen heman bayi balo eg-ogpà kidoen gayed egdoton te howis aw egpemoyò, kagi din, ‘Tebangi a amon dàgen ko se otaw egpemilang kanak.’
4 Meneng wedà pegtabang se howis kandin. Nayan, pegkenamay, mig-aneng-aneng se howis, ‘Pengkey kenà a egpenimanem aw kenà a heman egkeido te doma otaw,
5 meneng keilangan tebangan ko se bayi balo seini, so gayed a din egbuyungen. Megkelomay a kwani aw gayed sikandin meglikò-likò.’ ”
6 Minikagi heman se Pengolo, “Na, eneng-enengi niyo se inikagi te howis, so pengkey kenà egpenimanem, meneng tebangan din se otaw gayed egpemoyò.
7 Labi pa metoman se Timanem egpenabang te otaw pinemallì din aw egpengenganay dan diyà kandin te kelikit te aldaw aw delem. Eked sikandin peg-alà-alà,
8 meneng metoman menabang kandan te eked kenamay. Yan, ikà niyo eglengà te pegtawal-tawal niyo diyà kandin. Metoman a lomikò Timanem Migpekeotaw, aw ibeg ko kitaen se medita otaw egsalig diyà kanak.”
Tegdeyanan tepad te otaw migpelangkaw-langkaw aw migpedanà
9 Nayan, mig-indan si Jesus te tegdeyanan seini diyà te menge otaw eden dan aw metòlid se eg-inangen dan, aw gayed dan eglindò te doma.
10 Minikagi si Jesus, “Doen dowa otaw dimoton te dakel simbahan te Jerusalem amon megtawal-tawal dan. Parisiyo se sebad, aw iskribinti se sebad.
11 Timindeg kidoen se Parisiyo aw migtawal-tawal, kagi din, ‘E Timanem, egpesiontong a diyà kamno, so labi a pa mèpiya diyà te menge doma otaw, so kenà a iling te otaw eg-akal, aw eglàpang te punù, aw eglakad. Egpesiontong a so kenà a medaet otaw iling te iskribinti sida.
12 Kelikit te simana, mekedowa a egpowasa. Gayed ko ipegbowang se ikesempolò ketengà te kwarta eg-ebaten ko.’
13 Meneng pegtawal-tawal te iskribinti, migpekediyò sikandin diyà te menge doma otaw so neyàyà. Wedà heman lengag doton te langit, meneng timikelong sikandin aw dinapì din se kagpa din tandà te pegselsel din, aw minikagi, ‘Timanem, keidowi a bag, so nelegeb a te salà.’
14 Na, penenalan kaw te kagi ko. Peg-olì te iskribinti sìyan, pigwedad den te Timanem se salà din. Meneng se Parisiyo, wedà pegwedadi te Timanem se salà din. Inangen te Timanem medanà se kedita te otaw egpelangkaw-langkaw, meneng inangen din melangkaw se kedita te otaw egpedanà te kandan pegkeotawun.”
Si Jesus aw menge mengisù
Luc. 18:15-17; Mat. 19:13-15; Mar. 10:13-16
15 Nayan, doen menge otaw nengibing te dedeitek mengisù doton ki Jesus amon pemàdan din dan, aw megtawal-tawal te begayan dan te Timanem te mèpiya. Meneng pegkità te menge tinoledaan din kenyan, migsagda dan kandan.
16 Meneng tinawal i Jesus se kedita dan diyà kandin, aw minikagi sikandin, “Ikà niyo egsagda kandan, so lomowan se Timanem diyà te otaw ontò somalig diyà kandin iling te pegsalig te mengisù diyà te amay aw inay dan.
17 Eneng-enengi niyo se kagi ko seini. Aw eked salig se otaw diyà te Timanem iling te pegsalig te mengisù diyà te amay dan, eked sikandin sekopi te Timanem diyà te peglowan din.”
Kelimahan te otaw meyaman
Luc. 18:18-30; Mat. 19:16-30; Mar. 10:17-31
18 Doen sebad obanen te Judiyo mig-insà diyà ki Jesus, kagi din, “Sir, ontò ka mèpiya otaw. Eden lay se keilangan inangen ko amon mekinawà ko se kaling pedowan wedad temanan?”
19 Minikagi si Jesus, “Nepela a so minikagi ka te mèpiya a otaw. Meneng wedad otaw ontò mèpiya, so olò Timanem se ontò mèpiya.
20 Netegahan no besi se menge punù ingkeliwat i Moises. Ikà eglakad. Ikà egbonò. Ikà egpenakaw. Ikà egkebolalaw tepad te doma otaw. Keilangan memasa ka te amay aw inay nikaw.”
21 Timaba se obanen, “Gayed ko egtoloen se kedita niyan lekat te pegkebatà ko lamig seini.”
22 Pegdineg i Jesus kenyan, minikagi sikandin, “Sebad mendad se keilangan inangen nikaw. Beligyai se kedakel te kedònan no, aw iteped se kwarta no diyà te menge otaw nelimahan. Aw yan se inangen no, doen ontong kinewaen no doton te langit. Penga te pegteped no te kedakel niyan, likò ka dini aw taking ka kanak.”
23 Meneng pegdineg te obanen kenyan, nepuluk se pedowan din, so ontò sikandin meyaman.
24 Pegkità i Jesus te nepuluk se obanen, minikagi sikandin, “Ontò melima se pegpesakop te otaw meyaman diyà te peglowan te Timanem.
25 Pengkey ontò melima se peg-okit te ayam-ayam kamilo diyà te awang te dagem, meneng labi pa melima se pegpesakop te otaw meyaman diyà te peglowan te Timanem.”
26 Minikagi se menge doma otaw dimineg kenyan, “Aw iling kenyan, wedad palos otaw mekelowà lekat te pelumun te Timanem.”
27 Timaba si Jesus, “Betogen te Timanem se eked kebatog te otaw.”
28 Minikagi si Pedro, “Meneng sikami, tinenanan day den se kedakel te kedònan day amon tomaking kay kamno.”
29 Minikagi si Jesus, “Eneng-enengi niyo se kagi ko seini. Se otaw timanan den te kedònan din, aw esawa din, aw kedowa din, aw amay din, aw inay din, aw batà din, amon megtoladà te doma otaw tepad te peglowan te Timanem,
30 yan se metoman kominawà te ontong labi pa dakel diyà te tinenanan din dalem te eked pa kematay, aw penga niyan, begayan heman sikandin te kaling pedowan wedad temanan te modi aldaw.”
Iketelo peg-ikagi i Jesus tepad te kemetayun din
Luc. 18:31-34; Mat. 20:17-19; Mar. 10:32-34
31 Nayan, migtipon si Jesus te sìyan sempolò teg dowa tinoledaan din, aw minikagi sikandin, “Na, domoton kidon den te Jerusalem amon metoman se kedita te pakang insolat te menge telekeliwat te kagi te Timanem tepad kanak Timanem Migpekeotaw.
32 Metoman a ibegay diyà te belad te menge otaw kenà Judiyo. Kebebeyatan a, aw pemilangen a, aw teptepan a.
33 Bedasen a dan, aw penga niyan imetayan a dan. Meneng meantay a lekat te nematay te iketelo te aldaw.”
34 Meneng wedà pekelabet se tinoledaan din te sìyan inikagi i Jesus. Wedà petega-tegahi se kedegdagan niyan diyà kandan, aw yan se doun te wedà dan pekelabet.
Pinegolì i Jesus se otaw bota
Luc. 18:35-43; Mat. 20:29-34; Mar. 10:46-52
35 Pegkedapag i Jesus doton te lonsod te Jeriko, doen otaw bota nenenoo kidoen te kilid te dalan aw egpemoyò.
36 Pegdineg din te medita otaw limaklak, mig-insà sikandin aw eden se neinang.
37 Minikagi se menge doma, “Minokit dini si Jesus tege Nasarit.”
38 Penga niyan, timawal sikandin, “Jesus, bowad-bowad i David, keidowi a bag.”
39 Migsagda kandin se menge otaw nekeonà ki Jesus, aw migpunù dan te keilangan mepenek sikandin. Meneng labi beling sikandin timawal, “Bowad-bowad i David, keidowi a bag.”
40 Pegdineg i Jesus te pegtawal din, simagked sikandin aw impeangay din se otaw bota. Pegdateng din doton, mig-insà si Jesus,
41 “Eden lay se ibeg no inangen ko kamno?”
Timaba se bota, “Pengolo, ibeg ko, todà a komità.”
42 Minikagi si Jesus, “Kimità ka den. Negolian ka den so simalig ka diyà kanak.”
43 Pegketà, kimità sikandin, aw timaking ki Jesus. Gayed din pinesiontongan se Timanem. Dimuyun heman te Timanem se kedita te otaw kimità te pegpegolì kandin.