22
Pegpakang i Judas te pegtolok din ki Jesus
Luc. 22:1-6; Mat. 26:1-5,14-16; Mar. 14:1-2,10-11; Juan 11:45-53
1 Nayan, agpet den se pista te menge Judiyo iningedanan dan Pista te Pegpelowà. Yan se pegpengaen dan te pan kenà eglebag.
2 Gayed mig-aneng-aneng se menge pengolo te simbahan aw menenoladà te punù aw eden se inangen dan amon imetayan dan si Jesus te eked dan keopali te kedita te otaw gayed egpenenalan kandin.
3 Penga niyan, dimateng si Satanas diyà ki Judas Iscariote. Sikandin se sebad diyà te sempolò teg dowa tinoledaan i Jesus.
4 Dimoton si Judas te menge pengolo te simbahan aw menge kapitan te otaw egtonggò te dakel simbahan te Jerusalem. Migpebelaw-belaway dan tepad te pegtolok din ki Jesus amon dekepen dan.
5 Neluba dan, aw minikagi dan te doen kwarta ibegay dan kandin.
6 Migsebad dan, aw yan migtagad si Judas te mèpiya aldaw amon itolok din si Jesus te wedad otaw metipon, amon wedad samok.
Pista te Pegpelowà
Luc. 22:7-13; Mat. 26:17-25; Mar. 14:12-21; Juan 13:21-30
7 Nayan, dimateng se aldaw te pegpengaen te menge Judiyo te pan kenà eglebag. Yan heman se aldaw te pegpengiyaw dan te nati te karniro kànen dan te Pista te Pegpelowà.
8 Simogò si Jesus ki Pedro aw si Juan, kagi din, “Peg-inang kaw den te kànen tadon te Pista te Pegpelowà.”
9 Mig-insà dan, “Kenan kay lay peg-inang?”
10 Minikagi sikandin, “Eneng-enengi niyo ini. Aw domateng kaw doton te Jerusalem, kitaen niyo se otaw neniang te sibolan nepenò te wayeg. Taking kaw kandin. Aw domateng sikandin doton te balay,
11 ikagi kaw diyà te tig-apò, ‘Insogò kay te Pengolo amon meg-insà kay kamno aw kenan se kànan te kedita day te Pista te Pegpelowà.’
12 Penga niyan, ipekità din diyà kenyo se dakel gibelayan kidoen diatas te balay tapay doen telepagan niyan. Peg-inang kaw te kànen tadon kidoen.”
13 Penga niyan, dimoton dan aw kinità dan se kedita iling te tapay inikagi i Jesus diyà kandan. Penga niyan, mig-inang dan te kànen.
Pegkaen te pengilala te pegkematay te Pengolo
Luc. 22:14-23; Mat. 26:26-30; Mar. 14:22-26; 1Ko. 11:23-25
14 Pegdateng te oras te pegkaen, dimoton si Jesus aw menge sogounun din, aw kimaen dan.
15 Minikagi si Jesus, “Ontò a neibeg komaen te pista seini doma niyo, so agpet a den imetayan.
16 Penenalan kaw te kagi ko. Eked a todà kaen te Pista te Pegpelowà singed aw metoman se kedegdagan niyan kidoen te peglowan te Timanem.”
17 Penga niyan, inabat din heman se tabò, aw migpesiontong sikandin diyà te Timanem, aw minikagi, “Tepedi niyo ini amon mekeinem se kedita niyo.
18 Penenalan kaw kanak. Eked a todà inem te ininem tadon seini singed aw metoman lomowan se Timanem.”
19 Nengabat heman sikandin te pan. Penga te pegpesiontong din, binelà-belà din iyan, aw inteped din diyà kandan, aw minikagi, “Se pan seini, yan se lawa ko [imetayan amon mekelowà kaw. Inangi niyo iling kani amon gayed a niyo keeneng-enengan.”
20 Penga te pegkaen dan, inabat din heman se tabò aw minikagi sikandin, “Se meinem seini, yan se pengilala te doen kaling peokit ininang te Timanem pineokit te dipanog ko amon tebangan kaw.]
21 “Meneng eneng-enengi niyo ini. Migdoma kanak dini se otaw megtolok kanak.
22 Imetayan a Timanem Migpekeotaw, so yan se ibeg te Amay ko. Meneng mekelelayò se otaw megtolok kanak.”
23 Penga niyan, migpeinsaay se menge tinoledaan din aw sinu se megtolok kandin.
Pegdindil aw sinu se ontò melangkaw
24 Nayan, migpedindilay heman se menge tinoledaan din aw sinu se ontò melangkaw diyà te kedita dan.
25 Yan minikagi si Jesus, “Gayed egleges se menge selotan te menge sakop dan, aw ibeg dan iduyun dan tandà te keido dan.
26 Meneng eked kepakay aw meg-iling kaw kandan, so se melangkaw otaw diyà kenyo, yan se keilangan meinang iling te adi niyo. Se pengolo niyo, yan se keilangan meinang iling te sogounun niyo.
27 Aw doen otaw komaen kidoen te lemisa, aw doen heman otaw egtelaban kandin meglamak te kànen, netegahan niyo te labi pa melangkaw se otaw egpenenoo. Meneng pengkey siak se Pengolo niyo, meneng iling a te otaw egsogoen niyo.
28 “Pengkey medita se kelimahan ko, meneng sikiyo se gayed timaking kanak.
29 Migpunù se Amay ko te siak se lomowan, aw megpunù a den heman te sikiyo
30 se megdoma kanak te pegkaen ko kidoen te peglowan ko. Sikiyo heman se isawol ko lomowan diyà te sempolò teg dowa pongan te menge bowad-bowad i Israel.”
Inikagi i Jesus se pegbolon i Pedro kandin
Luc. 22:31-34; Mat. 26:31-35; Mar. 14:27-31; Juan 13:36-38
31 Penga niyan, minikagi si Jesus diyà ki Pedro, “Simon, penenalan ka kanak. Pinemoyò i Satanas diyà te Timanem amon megtandà kenyo, iling te inangen te otaw meg-etap te omay trigo.
32 Meneng migtawal-tawal a diyà te Amay ko tepad kamno amon gayed ka somalig diyà kanak. Pengkey tominàyog ka kanak te eked kenamay, meneng aw todà ka tomaking kanak, meketabang ka te menge doma no tinoledaan ko.”
33 Minikagi si Pedro, “Pengolo, neketagad a den tomaking kamno pengkey kelebosowen a aw imetayan a.”
34 Minikagi si Jesus, “Pedro, penenalan ka kanak. Te eked pegkolaak se manok kealdaw iselem, ibolon no se pegtaking no kanak te meketelo.”
Doen kelimahan agpet domateng
35 Nayan, minikagi si Jesus diyà te menge tinoledaan din, kagi din, “Kedengan, insogò ko sikiyo megtoladà, meneng doen impunù ko te wedad kedònan ibingen niyo, pengkey kwarta aw kelepì, aw sepatos ekasan niyo. Indani a niyo. Nelimahan kaw lay so wedad kedònan niyo?”
Timaba dan, “Wedà kay palos kelimahi.”
36 Minikagi si Jesus, “Meneng lekat seini, aw doen kwarta niyo aw kelepì, ibingi niyo. Aw wedad ibayad niyo te podok, keilangan ibeligyà niyo se saol amon mekebayad kaw.
37 Metoman den se kagi te Timanem insolat tepad kanak,
‘Ipelumun sikandin iling te otaw dakel se salà.’
Agpet a den imetayan, so yan se insolat tepad kanak.”
38 Minikagi dan, “Meneng Pengolo, doen dowa podok tadon seini.”
Meneng so wedà dan pekelabet, minikagi si Jesus, “Pebeyai niyo.”
Migtawal-tawal si Jesus doton te bontod te Olibo
Luc. 22:39-46; Mat. 26:36-46; Mar. 14:32-42
39 Nayan, nesayo si Jesus aw dimoton te bontod te Olibo, so melikit sikandin egdoton. Timaking heman se menge tinoledaan din.
40 Pegdateng din doton, minikagi sikandin, “Pegtawal-tawal kaw amon eked kaw keboyo.”
41 Penga niyan, dimeleg si Jesus te kenà mediyò. Limongken sikandin aw migtawal-tawal, kagi din,
42 “Amà, aw mepakay diyà kamno, eked a no peokiti te kelimahan seini. Meneng ibeg ko, kamno ibeg se metoman, kenà kanak.”
[
43 Penga niyan, doen anghil insogò lekat te langit amon megpekagsen te pedowan din.
44 Ontò mebegat se pedowan din, aw yan se doun te ontò sikandin migtawal-tawal. Ontò sikandin pig-etingan iling te pegtedak te dipanog.]
45 Penga te pegtawal-tawal din, dimoton sikandin te menge tinoledaan din, aw timedogi den dan, so migkelomay dan tandà te lidò dan.
46 Linoka din dan aw minikagi sikandin, “Tay law. Nepela a so timedogi kaw. Enaw kaw den. Pegtawal-tawal kaw amon eked kaw keboyo.”
Pegdakep ki Jesus
Luc. 22:47-53; Mat. 26:47-56; Mar. 14:43-50; Juan 18:3-11
47 Telobo pa minikagi si Jesus, dimateng se medita otaw kidoen. Inibing dan i Judas, sìyan tinoledaan i Jesus. Migpedapag sikandin diyà ki Jesus amon mengadek kandin.
48 Meneng minikagi si Jesus diyà kandin, “Tay law, elew. Mengadek ka kedì kanak amon itolok a no Timanem Migpekeotaw.”
49 Pegketaga-taga te menge tinoledaan i Jesus te dekepen sikandin, minikagi dan, “Pengolo, tigbasen day sikandan aw isogò kay nikaw.”
50 Pegketà nenigbas se sebad tinoledaan diyà te sineligan te ontò pengolo te simbahan, aw nepalot se telinga din lenged te kowanan.
51 Meneng minikagi si Jesus, “Ikà niyo.”
Penga niyan, nemaed sikandin te telinga te sineligan, aw negolì iyan.
52 Se menge otaw dimoton amon megdakep dan ki Jesus, yan se menge pengolo te simbahan, aw menge kapitan te otaw egtonggò te dakel simbahan, aw menge obanen te Judiyo. Minikagi si Jesus diyà kandan, “Kolang se pegkekamang niyo te podok aw batota amon megdakep kaw kanak, so eden niyo aw megdedempasay a.
53 Gayed a migtoladà kidoen te dakel simbahan, meneng wedà a niyo dekepi doton. Meneng mekedakep kaw den kanak, so seini se aldaw pinemallì te Timanem aw meg-inang si Satanas te medaet.”
Imbolon i Pedro si Jesus
Luc. 22:54-62; Mat. 26:57-58,69-75; Mar. 14:53-54,66-72; Juan 18:12-18,25-27
54 Penga niyan, dinakep dan si Jesus aw inibing dan sikandin doton te balay te ontò pengolo te simbahan. Timelokon heman si Pedro meneng migpekediyò.
55 Doen apoy kidoen te dowangen inantay te menge otaw migtonggò, aw migdoma heman si Pedro te menge otaw mig-ingadang kidoen.
56 Peg-anyag te apoy diyà te bawa din, doen bayi kimità kandin aw minikagi, “Egdoma se otaw seini te otaw sida dinakep.”
57 Meneng migbolon si Pedro, aw minikagi sikandin, “Tay law, atà. Wedà ko sikandin kilelai.”
58 Penga niyan te wedà kenamay, doen heman doma otaw kimità kandin, aw minikagi, “Sikona heman se tinoledaan din.”
Meneng minikagi si Pedro, “Kenà ko, elew.”
59 Penga te sebad oras minokit, doen heman doma otaw migtedò kandin, aw minikagi, “Benal sikandin se egdoma te otaw sida, so sikandin heman se tege probinsya te Galiliya.”
60 Meneng minikagi si Pedro, “Tay law, elew. Wedà ko ketegahi se inikagi nikaw.”
Nayan, dalem pa te peg-ikagi i Pedro, migkolaak se manok.
61 Miniling si Jesus aw timengteng diyà ki Pedro. Yan neeneng-enengan din se tapay inikagi te Pengolo te ibolon din sikandin te meketelo te eked pa pegkolaak se manok te iselem.
62 Penga niyan, nesayo si Pedro aw ontò migkelag.
Tinompuyus aw binadas si Jesus
Luc. 22:63-65; Mat. 26:67-68; Mar. 14:65
63 Nayan, se otaw migtonggò ki Jesus, gayed dan nebebayat kandin aw nemadas dan kandin.
64 Sinempengan dan heman se mata din, aw minikagi dan, “Etoki aw sinu se nenombag kamno.”
65 Gayed dan migtompuyus kandin aw minikagi dan te medaet.
Inibing si Jesus doton te menge pengolo te simbahan
Luc. 22:66-71; Mat. 26:59-66; Mar. 14:55-64; Juan 18:19-24
66 Nayan, peglibtak te aldaw sìyan, netipon se kedita te obanen te Judiyo, aw menge pengolo te simbahan, aw menenoladà te punù ingkeliwat i Moises. Impeangay dan si Jesus, aw minikagi dan,
67 “Sikona ekon se Misiyas egpelimanan day. Indani kay den aw benal iyan.”
Meneng minikagi si Jesus, “Pengkey indanan ko sikiyo te kebenalan, meneng eked kaw pemenal kanak.
68 Pengkey doen peden insà ko kenyo, meneng eked kaw heman taba kenyan.
69 Meneng te eked kenamay, menenoo a Timanem Migpekeotaw kidoen te tangkil te Timanem metolos amon lomowan a doma din.”
70 Mig-insà se kedita dan, “Aw iling kenyan, Batà ka kedì te Timanem?”
Timaba sikandin, “Benal se inikagi niyo te Batà a te Timanem.”
71 Yan migpebelaw-belaway dan, “Wedad den kekemowan te peg-indan te doma otaw diyà kenitadon tepad kandin, so kandin den kagi se dinineg tadon.”