9
Insogò se sempolò teg dowa tinoledaan i Jesus
Luc. 9:1-6; Mat. 10:5-15; Mar. 6:7-13
1 Nayan, doen sebad aldaw migtipon si Jesus te sempolò teg dowa tinoledaan din, aw imbegay din diyà kandan se tolos amon megpelowà dan te bosaw lekat te otaw aw amon megpegolì dan te otaw doen mesakit.
2 Penga niyan, insogò din dan tomeped te menge doma ogpeanan amon megtoladà dan tepad te peglowan te Timanem aw amon megpegolì dan te otaw doen mesakit.
3 Doen impunù din kandan, kagi din, “Ikà niyo egpengibing te kedònan, pengkey bangkà, kelepì, kànen aw kwarta, so togpoan kaw te otaw toledaan niyo. Ikà niyo heman egpengibing te ekasan.
4 Aw domateng kaw doton te lonsod, ketingen kaw diyà te sebad balay. Ikà niyo eg-alin-alin lamig domeleg kaw doton te doma lonsod.
5 Aw doen otaw eked pegsagman kenyo, tektaki niyo se napò te tanà lekat te sepatos niyo te pegkesayo niyo lekat te lonsod dan. Yan metaga-taga se otaw kidoen te doen salà dan, so wedà dan penenalan te intoladà niyo.”
6 Penga niyan, nesayo dan aw timeped dan te menge lonsod. Pengkey kenan dan pesalo, gayed dan migtoladà te Mèpiya Indan, aw migpegolì dan heman te menge otaw doen mesakit.
Pegkebulung i Herod tepad ki Jesus
Luc. 9:7-9; Mat. 14:1-12; Mar. 6:14-29
7 Nayan, si Herod se otaw limowan kidoen te Galiliya. Pegdineg din tepad te ininang i Jesus aw intoladà din, migkebulung sikandin, so doen menge otaw eg-ikagi te yan si Juan Memonyagay neantay den lekat te nematay.
8 Meneng doen heman menge doma otaw eg-ikagi te sikandin se telekeliwat te kagi te Timanem gebii si Elias. Eg-ikagi heman se menge doma otaw te sikandin se sebad telekeliwat te kagi te Timanem gebii neantay den lekat te nematay.
9 Meneng minikagi si Herod, “Kenà niyan si Juan, so impesipal ko se lieg din. Sinu lay sikandin? So dinineg ko den te doen kepelahan eg-inangen din.”
Penga niyan, ibeg i Herod megkità ki Jesus.
Impekaen i Jesus se lima melalan otaw
Luc. 9:10-17; Mat. 14:13-21; Mar. 6:30-44; Juan 6:1-14
10 Nayan, peg-olì te menge sogounun i Cristo doton kandin, mig-indan dan diyà kandin tepad te kedita te ininang dan. Penga niyan, tinenanan dan se doma otaw aw inibing dan i Jesus doton te sebad lonsod iningedanan Bitsayda.
11 Meneng pegketaga-taga te kedita te otaw te dinotonan i Jesus, timelokon dan heman. Neluba si Jesus so nengemahà dan kandin. Penga niyan, mig-indan si Jesus diyà kandan tepad te peglowan te Timanem. Migpegolì heman sikandin te kedita te otaw doen mesakit.
12 Pegkeapon, dimoton se sempolò teg dowa tinoledaan i Jesus kandin, aw minikagi dan, “Pekeseyowi se kedita te otaw doton te lonsod aw kedepagan niyan amon midegà dan aw mengabat dan te kànen dan kidoen, so ontò ini kebigtilan.”
13 Meneng minikagi si Jesus, “Pemekàni niyo dan.”
Minikagi dan, “Meneng doen olò lima se pan, aw didowa se ikan. Kenà iyan botong kànen singed aw isogò kay nikaw mayad te doma kànen, so ontò medita se otaw.”
14 Menge lima melalan se meama netipon kidoen, aw doen heman menge bayi aw mengisù. Minikagi si Jesus diyà te menge tinoledaan din, “Peonsadi niyo se menge otaw teg keliman se sebad ebong.”
15 Timolò dan, aw impeonsad dan se kedita te otaw.
16 Penga niyan, inabat i Jesus se lima pan aw didowa ikan. Limengag sikandin doton te langit aw migpesiontong diyà te Timanem kenyan. Penga niyan, binelà-belà din iyan aw imbegay din diyà te menge tinoledaan din amon iteped dan diyà te menge otaw netipon.
17 Kimaen se kedita dan aw nebesog dan. Penga niyan, inimon dan se samà te pan kinaen dan, aw sempolò teg dowa se buun nepenò.
Minikagi si Pedro te si Jesus se Misiyas
Luc. 9:18-22; Mat. 16:13-21; Mar. 8:27-29
18 Nayan, doen sebad aldaw migtawal-tawal si Jesus sebad din, aw medapag heman kidoen se menge tinoledaan din. Penga niyan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”
19 Timaba dan, “Medita se otaw eg-ikagi te sikona si Juan Memonyagay. Meneng doen heman eg-ikagi te sikona si Elias. Doen heman eg-ikagi te sikona se sebad telekeliwat te kagi te Timanem gebii neantay den lekat te nematay.”
20 Mig-insà si Jesus, “Meneng eden lay se kenyo aneng-aneng tepad kanak? Sinu a lay?”
Timaba si Pedro, “Sikona se Misiyas insogò te Timanem dini kenami.”
21 Penga niyan, ontò migpunù si Jesus te keilangan eked dan indani diyà te doma otaw te sikandin se Misiyas.
22 Minikagi heman si Jesus, “Pengkey Timanem a Migpekeotaw, meneng metoman a ontò elegen, aw kuluwan a te menge obanen te Judiyo aw menge pengolo te simbahan aw menge menenoladà te punù. Imetayan a, meneng penga niyan te iketelo te aldaw, meantay a lekat te nematay.”
Tepad te otaw tomaking ki Jesus
Luc. 9:23-27; Mat. 16:22-28; Mar. 8:30–9:1
23 Nayan, minikagi si Jesus diyà te kedita dan nenenalan kandin, kagi din, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.
24 Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak, begayan sikandin te kaling pedowan wedad temanan.
25 Simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din.
26 Aw eked ikagi se otaw te sikandin se sakop ko, aw eked heman tolò te kagi ko, yan se otaw eked ko heman ikegihi te sikandin se sakop ko te peglikò ko dini. Siak se Timanem Migpekeotaw, aw lomikò a pa dini tekingan te keanyag ko, aw keanyag te Amay ko, aw keanyag te menge anghil te Timanem.
27 Eneng-enengi niyo se kagi ko seini. Doen otaw dini kenyo eked kematay singed aw onà dan komità te peglowan te Timanem.”
Pegketodà te bawa i Jesus
Luc. 9:28-36; Mat. 17:1-8; Mar. 9:2-8
28 Nayan, penga te sebad simana lekat te peg-ikagi i Jesus kenyan, impetaking din si Pedro, si Juan, aw si Santiago, aw timikedeg dan doton te bontod amon megtawal-tawal dan.
29 Dalem te pegtawal-tawal i Jesus, netodà se bawa din, aw ontò migkepotì se kedakel te penenaktun din.
30 Pegketà doen dowa otaw migbalaw-balaw kandin, si Moises aw si Elias.
31 Pegpekità dan, minanyag dan heman. Migpebelaw-belaway se telo dan tepad te pegkematay i Jesus, so yan se tomanen din te eked kenamay doton te Jerusalem.
32 Ontò neketedogi si Pedro aw doma din. Meneng pegkeloka dan, kinità dan se anyag i Jesus aw sìyan dowa otaw doma din.
33 Dalem te pegkesayo i Moises aw si Elias lekat ki Jesus, minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.”
Pengkey yan se inikagi i Pedro, meneng wedà din kelebeti aw eden se inikagi din.
34 Telobo pa minikagi si Pedro, doen labon dimateng diyà kandan aw wedà dan ebey kità kandan. Pegkeselibeng te labon kandan, ontò nelemitan si Pedro aw doma din.
35 Penga niyan, dinineg dan se kagi te Timanem lekat te labon, “Seini se Batà ko, aw pinemallì ko sikandin amon tomanen din se ibeg ko. Keilangan sikandin se penenelanen niyo.”
36 Penga te pegdineg dan kenyan, kinità dan si Jesus olò sebad din. Wedà dan peg-indan diyà te doma otaw tepad te kinità dan kidoen lamig ontò nenamay.
Pinegolì i Jesus se batà meama dinetengan te bosaw
Luc. 9:37-43; Mat. 17:14-18; Mar. 9:14-27
37 Keeldawan niyan, timopang dan lekat te bontod aw nesongonan dan te ontò medita otaw.
38 Nayan, doen sebad otaw timawal ki Jesus, kagi din, “Sir, keidowi bag se batà ko, so sikandin se temisa batà ko.
39 Melikit sikandin egdetengan te bosaw, aw egpuypuy. Egpemekeseg iyan kandin, aw egbohak se bahà din. Ontò melima se pegpelowà te bosaw lekat kandin, so eked kesayo singed aw onà din peelegen se batà.
40 Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”
41 Minikagi si Jesus, “Tay law, sikiyo menge otaw. Ontò kolang se aneng-aneng niyo, so wedà kaw pa salig diyà kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”
42 Pegpesalo te batà doton ki Jesus, binadas sikandin te bosaw aw impekeseg din. Meneng sinagda i Jesus se bosaw aw impelowà din iyan lekat te batà. In-olì din se batà sìyan negolian diyà te amay din.
43 Ontò nepela se kedita te otaw kidoen, so netegahan dan te ontò melangkaw se Timanem.
Todà minikagi si Jesus tepad te kemetayun din
Luc. 9:43-45; Mat. 17:22-23; Mar. 9:30-32
Dalem te nepela pa se kedita te otaw tandà te ininang i Jesus, minikagi sikandin diyà te menge tinoledaan din,
44 “Keilangan ontò kaw menenalan te kagi ko kenyo seini. Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw.”
45 Meneng wedà dan ketegahi aw eden se kedegdagan te inikagi din sìyan, so wedà iyan keinang mebangal amon eked dan iyan kelebeti. Meneng wedad otaw mig-insà kandin tepad kenyan, so neyàyà dan.
Sinu lay se ontò melangkaw?
Luc. 9:46-48; Mat. 18:1-5; Mar. 9:33-37
46 Nayan, migpedindilay se menge tinoledaan i Jesus aw sinu se ontò melangkaw diyà kandan.
47 Meneng pegketaga-taga i Jesus aw eden se pigdindilan dan, tinawal din se sebad batà, aw impetindeg din iyan kidoen te tangkil din.
48 Penga niyan, minikagi si Jesus, “Aw megsagman se otaw te batà seini tandà te pegpesakop din kanak, pineokit kenyan segmanen a din heman. Aw megsagman se otaw kanak, segmanen din heman se Amay ko simogò kanak. Se otaw ontò megpedanà kidoen kenyo, yan se ontò melangkaw.”
Meinang doma niyo se otaw kenà poon niyo
Luc. 9:49-50; Mar. 9:38-40
49 Nayan, minikagi si Juan, “Pengolo, doen otaw kinità day migpelowà te bosaw lekat te menge otaw pineokit te ngadan nikaw. Meneng sinagda day sikandin so wedà pekeakop diyà kenitadon.”
50 Meneng minikagi si Jesus, “Ikà niyo egsagda kandin, so se otaw kenà poon niyo, meinang sikandin doma niyo.”
Nesayo si Jesus lekat te probinsya te Galiliya
51 Sagwa agpet den domateng se aldaw te pegkeengat i Jesus doton te langit, miglalang sikandin domoton te Jerusalem.
52 Doen menge otaw insogò din minonà diyà kandin. Nesayo dan aw dimoton dan te sebad lonsod sakop te Samarya amon megpetagad dan te ogpaan din aw mapit kidoen.
53 Kenà Judiyo se menge otaw eg-ogpà kidoen, aw yan se doun te wedà dan peepiti si Jesus, so netegahan dan te domeleg sikandin doton te Jerusalem.
54 Pegketaga-taga i Santiago aw si Juan te eked dan segmani te tege Samarya, minikagi dan, “Pengolo, meibeg ka lay aw ipedagdag day se apoy lekat te langit amon megelà dan?”
55 Meneng miniling si Jesus diyà kandan aw sinagda din dan.
56 Penga niyan, dimeleg dan doton te doma lonsod.
Menge otaw meibeg peden tomaking ki Jesus
Luc. 9:57-62; Mat. 8:19-22
57 Dalem te peg-ipanaw dan, doen otaw minikagi diyà ki Jesus, “Pengkey kenan ka pesalo, gayed a tomaking kamno.”
58 Meneng minikagi si Jesus, “Mèpiya pa se menge menenanap te kebenesan, so doen ogpeanan dan. Mèpiya pa heman se menge manok, so doen heman embonganan dan. Meneng melima aw tomaking ka kanak Timanem Migpekeotaw, so wedad palos ibatan ko te delem.”
59 Minikagi si Jesus diyà te doma otaw kidoen, “Taking ka kanak.”
Meneng timaba sikandin, “Pengolo, eked a taking kamno singed aw onà matay se amay ko aw ilebeng ko.”
60 Meneng minikagi si Jesus, “Mèpiya aw otaw wedad kaling pedowan se meglebeng te menge doma dan nematay. Meneng aw doen kaling pedowan no, keilangan megtoladà ka den te doma otaw tepad te peglowan te Timanem.”
61 Doen heman doma otaw minikagi diyà ki Jesus, “Pengolo, tomaking a diyà kamno. Meneng molì a onà amon megpetaga-taga a te menge kedomaan ko.”
62 Minikagi si Jesus, “Ikà eg-iling te otaw megdaro gayed eglingì, so kolang se inangen din. Iling heman kenyan se otaw kenà melobos se pedowan din tomaking kanak, so eked kepakay aw megpesakop sikandin diyà te peglowan te Timanem.”