9
1 Minikagi heman si Jesus, “Eneng-enengi niyo se kagi ko kenyo seini. Doen otaw dini kenyo eked kematay singed aw onà dan komità te pegtebò te peglowan te Timanem metolos.”
Pegketodà te bawa i Jesus
Mar. 9:2-13; Mat. 17:1-13; Luc. 9:28-36
2 Nayan, pegkeokit te enem se aldaw, impetaking i Jesus si Pedro, si Santiago, aw si Juan, aw timikedeg dan doton te melangkaw bontod te wedad doma dan. Pegketà, dalem te pegtengteng dan diyà ki Jesus, netodà se bawa din.
3 Ontò migkepotì se kedakel te penenaktun din so ontò minanyag. Eked keinang iling kenyan se penenaktun bugsakan dini te tanà, so ontò mepotì.
4 Penga niyan, kinità dan heman si Elias aw si Moises migbalaw-balaw doma ki Jesus.
5 Minikagi si Pedro diyà ki Jesus, “Pengolo, mèpiya so dini kay. Ibeg day meg-inang kay den te telo balay amon doen ogpaan te teg sebad-sebad kenyo si Moises aw si Elias.”
6 Pengkey yan se inikagi i Pedro, meneng wedà din kelebeti aw eden se inikagi din, so ontò dan nelemitan.
7 Penga niyan, doen labon dimateng diyà kandan, aw wedà dan ebey kità kandan. Penga niyan, dinineg dan se kagi te Timanem lekat te labon, “Seini se Batà ko aw ontò dakel se pedowan ko kandin. Keilangan sikandin se penenelanen niyo.”
8 Wedà kenamay, timengteng dan aw kinità dan olò si Jesus wedad den doma din.
9 Pegtopang dan lekat te bontod, ontò migpunù si Jesus diyà kandan te eked kepakay aw indanan dan se doma otaw tepad te kinità dan singed aw meantay sikandin Timanem Migpekeotaw lekat te nematay.
10 Timolò dan te punù din sìyan. Meneng gayed dan migpeinsaay aw eden se kedegdagan te inikagi din tepad te pegkeantay din lekat te nematay.
11 Penga niyan, mig-insà dan diyà kandin, “Aw agpet ka den lomowan, nengà lay egtoladà se menge menenoladà te punù ingkeliwat i Moises te keilangan domateng si Elias te eked pa lowan se Misiyas?”
12 Timaba si Jesus, “Benal domateng onà si Elias amon megpeketagad te kedita. Meneng eneng-enengi niyo heman te doen kagi te Timanem insolat tepad kanak Timanem Migpekeotaw te ontò a elegen aw kebebeyatan a.
13 Meneng mikagi a den diyà kenyo te dimateng den si Elias, aw medaet se ininang te doma otaw diyà kandin, aw yan se pegketoman te pakang insolat tepad kandin.”
Pinegolì i Jesus se batà meama dinetengan te bosaw
Mar. 9:14-29; Mat. 17:14-21; Luc. 9:37-43
14 Pegdateng dan doton te menge doma tinoledaan i Jesus, kinità dan te ontò medita se otaw netipon diyà kandan, aw doen menge menenoladà te punù ingkeliwat i Moises migbalaw-balaw kandan.
15 Pegkità te kedita te otaw ki Jesus, ontò dan nepela, aw kimagnan dan aw simongon dan kandin.
16 Mig-insà si Jesus, kagi din, “Eden lay se imbalaw-balaw niyo kandan?”
17 Timaba se sebad otaw, “Sir, inibing ko se batà ko amon megtabang ka kandin, so egdetengan sikandin te bosaw migpeomo kandin.
18 Aw egdateng iyan kandin, egpekelias, aw egbohak se bahà din, aw egyangget-yangget se ngipen, aw egkeseg se lawa din. Nemoyò a diyà te menge tinoledaan no te ipelowà dan se bosaw lekat kandin, meneng wedà dan iyan kebatog.”
19 Minikagi si Jesus, “Tay law, sikiyo menge otaw. Wedà kaw pa salig kanak. Eked den kenamay se pegdoma ko kenyo, meneng keilangan tomayod a pa pengkey eked kaw pemenal. Na, pedinihi se batà nikaw.”
20 Penga niyan, inibing dan se batà. Meneng pegkità te bosaw ki Jesus, impekeseg te bosaw se batà, aw impelias aw impebolaling sikandin, aw migbohak se bahà din.
21 Mig-insà si Jesus diyà te amay din, “Kano lay ini pegtebò?”
Timaba se amay din, “Lekat pa te deitek sikandin.
22 Melikit sikandin eg-elosen te bosaw diyà te apoy, aw eglemesen heman diyà te wayeg amon imetayan sikandin. Meneng aw mebatog nikaw, keidowi kay bag aw tebangi kay.”
23 Minikagi si Jesus, “Nepela a so egdowa-dowa ka te mebatog ko. Wedad palos eked kebatog te Timanem megtabang te otaw somalig diyà kandin.”
24 Minikagi se otaw te dakel se kagi din, “Simalig a den diyà te Timanem. Lobosi se pegsalig ko diyà kandin amon eked a pegdowa-dowa.”
25 Pegkità i Jesus te labi pa medita se otaw netipon, sinagda din se bosaw, kagi din, “Sikona bosaw migpeomo aw migpebingel kandin, lowà ka den lekat kandin, aw ikà palos eglikò diyà kandin.”
26 Penga niyan, migpuypuy se bosaw, aw ontò din impekeseg se batà, aw penga niyan limowà. Iling te wedad pedowan te batà, aw minikagi se keditaan te otaw, “Nematay den sikandin.”
27 Meneng inewidan i Jesus se belad din aw impeenaw din, aw yan neketindeg.
28 Peg-olì i Jesus aw menge tinoledaan din, dimoton dan kandin te wedad doma dan, aw mig-insà dan, “Nengà lay wedà day kebatog se pegpelowà te bosaw lekat kandin?”
29 Minikagi si Jesus, “Wedà niyo iyan kebatog so eked pelowai se kemolò te bosaw seini singed aw megtawal-tawal kaw.”
Todà minikagi si Jesus tepad te kemetayun din
Mar. 9:30-32; Mat. 17:22-23; Luc. 9:43-45
30 Nayan, nesayo si Jesus aw menge tinoledaan din lekat kidoen, aw minokit dan te probinsya te Galiliya. Meneng ibeg i Jesus, wedad metaga-taga aw kenan sikandin,
31 amon eked keanggà se pegtoladà din te menge tinoledaan din. Minikagi sikandin, “Seini se metoman domateng diyà kanak Timanem Migpekeotaw. Metoman a itolok aw ibegay a diyà te belad te doma otaw. Penga niyan, imetayan a dan, meneng penga te telo se aldaw, meantay a lekat te nematay.”
32 Meneng wedà dan ketegahi aw eden se kedegdagan te inikagi din sìyan, meneng wedad mig-insà kandin tepad kenyan, so neyàyà dan.
Sinu lay se ontò melangkaw?
Mar. 9:33-37; Mat. 18:1-5; Luc. 9:46-48
33 Nayan, pegdateng i Jesus aw menge tinoledaan din doton te Kapirnaom, mig-ogpà dan diyà te balay. Mig-insà si Jesus, “Eden lay se pigdindilan niyo gina kidoen te dalan te wedà kidon pa dateng dini?”
34 Meneng wedad timaba, so migpedindilay dan aw sinu se ontò melangkaw diyà kandan.
35 Penga niyan, nenenoo si Jesus aw tinawal din se kedita te sempolò teg dowa dan, aw minikagi sikandin, “Aw meibeg se otaw megkelangkaw, keilangan megpedanà sikandin te pegkeotawun din iling te kedanà te allang.”
36 Penga niyan, tinawal i Jesus se sebad batà, aw impetindeg din iyan kidoen te tengà-tengà dan. Penga niyan, inolid din, aw minikagi sikandin,
37 “Aw megsagman se otaw te sakop ko iling te kedanà te sebad batà seini tandà te pegpesakop din kanak, pineokit kenyan segmanen a din heman. Aw megsagman se otaw kanak, kenà olò siaken se segmanen din, so segmanen din heman se Amay ko simogò kanak.”
Meinang doma tadon se otaw kenà poon tadon
Mar. 9:38-41; Luc. 9:49-50
38 Nayan, minikagi si Juan diyà ki Jesus, “Sir, doen otaw kinità day migpelowà te bosaw lekat te menge otaw pineokit te ngadan nikaw. Meneng sinagda day sikandin so wedà pekeakop diyà kenitadon.”
39 Meneng minikagi si Jesus, “Ikà niyo egsagda kandin, so aw meg-inang se otaw te kepelahan pineokit te ngadan ko, eked tagmon ikagi te medaet tepad kanak.
40 Se otaw kenà poon tadon, meinang sikandin doma tadon.
41 Eneng-enengi niyo se kagi ko kenyo seini. Aw melao kaw, aw doen otaw memegay kenyo te wayeg tandà te pegpesakop niyo diyà kanak, begayan sikandin te Timanem te ontong.”
Pegboyo amon mekesalà
Mar. 9:42-50; Mat. 18:6-9; Luc. 17:1-2
42 Minikagi heman si Jesus, “Aw doen otaw mekebaet te pegpemenal te mengisù egkeidowan ko, ontò medaet se pelumun domateng diyà kandin. Labi pa mèpiya aw iketan se lieg din te dakel bato aw idagdag doton te lawod.
43-44 Aw meboyo kaw meg-inang te salà pineokit te belad niyo, mèpiya aw tokongen niyo se belad niyo amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te belad niyo, aw iagbel se kedakel te lawa niyo doton te kilot.
45-46 Aw meboyo kaw heman meg-inang te salà pineokit te benis niyo, mèpiya aw tokongen niyo se benis sìyan amon eked kaw peg-inang te salà, aw amon kominawà kaw te kaling pedowan wedad temanan. Labi pa medaet aw meboyo kaw pineokit te benis niyo, aw iagbel se kedakel te lawa niyo doton te kilot.
47 Aw meboyo kaw heman meg-inang te salà pineokit te mata niyo, mèpiya aw logiten niyo se mata niyo amon eked kaw peg-inang te salà aw amon sekopen kaw te Timanem diyà te peglowan din. Labi pa medaet aw meboyo kaw pineokit te mata niyo, aw iagbel se kedakel te lawa niyo doton te kilot,
48 so eked palos kematay se sapat kidoen, aw eked palos heman kepadeng se apoy,
49 so doen apoy medagdag diyà te kedita dan kidoen.
50 “Nayan, isanged se asin diyà te kànen amon megkèpiya se nanam. Meneng aw megkewedad se kepait te asin, eked iyan ketodà. Keilangan ontò mèpiya se eg-inangen niyo amon meinang kaw iling te mèpiya kemolò te asin eked pegkewedad se kepait niyan. Keilangan eked kaw heman pegpedindilay.”