4
Netodà den se eg-inangen
1 Timayod si Cristo te kelimahan te pegdini din te lanto te tanà. Yan aw detengan kaw te kelimahan, keilangan meg-aneng-aneng kaw tepad te pegtayod din te kelimahan. Aw meketayod se otaw te kelimahan, yan se pengilala te kimulu den sikandin meg-inang te salà,
2 so dalem te peg-ogpà niyo dini lanto te tanà, eked kaw taking te medaet ibeg te pedowan niyo, meneng ibeg te Timanem se tekingan niyo.
3 Keilangan eked kaw todà peg-inang te medaet ininang niyo kedengan, iling te eg-inangen te doma otaw kenà egtaking te Timanem. Kedengan kenà kaw egkeyàyà eg-inang te medaet ibeg te pedowan niyo, aw eglasing kaw, aw egsamok kaw, aw mebolot kaw, aw egpengako kaw te Timanem pineokit te pegsimba niyo te inotaw.
4 Nepela den se menge medaet otaw tinekingan niyo kedengan, so kenà kaw den egtaking kandan te peg-inang dan te pengkey eden se medaet ibeg dan, aw yan egtompuyus dan kenyo.
5 Meneng aw den iyan, so domateng se aldaw te ipelumun dan te Timanem, so neketagad den sikandin meg-okom te kedita te otaw pengkey nematay aw wedà pa kematay.
6 Yan se doun te tinoledaan heman se menge otaw gebii nematay den te Mèpiya Indan tepad ki Cristo, amon begayan dan te Timanem te kaling pedowan wedad temanan, pengkey dinetengan se lawa dan te kemetayun, so yan se pelumun te Timanem te kedita te otaw.
Keilangan megpetebangay
7 Agpet den se temanan te keneyonan, aw yan se doun te keilangan metinuud kaw aw tikbel kaw, amon wedad mekebelabag te pegtawal-tawal niyo diyà te Timanem.
8 Ontò keilangan te gayed kaw megpedekelay te pedowan, so aw dakel se pedowan niyo te doma otaw, mebatog niyo pegwedaden se ontò medita salà dan diyà kenyo.
9 Aw doen otaw egpemenal te Timanem lomaoy doton kenyo, pegsagman kaw kandan. Ikà niyo egbelisì tepad kenyan.
10 Medita se kinemoloan te kebiyasa imbegay te Timanem diyà te teg sebad-sebad kenitadon. Keilangan gemiten niyo te mèpiya se imbegay te Timanem kenyo amon megpetebangay kaw.
11 Aw insogò kaw te Timanem megtoladà, keilangan kagi te Timanem se itoladà niyo. Aw insogò kaw te Timanem megtabang te doma otaw, keilangan measeb kaw megtabang, so begayan kaw te Timanem te eneg. Aw iling kenyan se kedita te eg-inangen niyo, iduyun se Timanem pineokit te pegtabang i Jesu Cristo kenyo. Timanem se iduyun aw lomowan te wedad temanan. Metoman iyan.
Pemilangen kaw tandà te pegpesakop niyo ki Cristo
12 Nayan, kedita niyo egkedekelan ko te pedowan, ikà niyo egkepela tandà te kelimahan dimateng den kenyo amon tendaen se pegsalig niyo diyà te Timanem. Ikà niyo eg-aneng-aneng te olò sikiyo se nekeokit kenyan.
13 Keilangan meluba se pedowan niyo, so iling te migdoma kaw den ki Cristo te pegtayod din te kelimahan dimateng kandin. Aw tomayod kaw te kelimahan, labi kaw pa meluba te aldaw aw komità kaw kandin te peglikò din.
14 Aw tompuyusen kaw tandà te pegtaking niyo ki Cristo, keilangan meluba kaw, so egbeyà-beyaan kaw te Espiritu Santo melangkaw.
15 Wedad peden otaw doton kenyo ipelumun so egbonò, aw egpenakaw, aw eglàpang te punù te gobirno, aw eg-inabut te doma.
16 Meneng aw pemilangen kaw tandà te pegpesakop niyo diyà ki Cristo, ikà niyo egkeyàyà. Pegpesiontong kaw diyà te Timanem, so egtewalen kaw menge sakop i Cristo.
17 Megtebò den se Timanem meg-okom, aw sakop din se onà din okomen. Yan aw sikitadon egsalig diyà kandin se onà okomen, labi pa medaet se kegemakan te menge otaw kenà egpenenalan te Mèpiya Indan impetaga-taga te Timanem tepad ki Cristo.
18 Doen kagi te Timanem insolat,
“Pengkey melima se pegkelowà te otaw egtolò te Timanem lekat te pelumun, meneng eked palos pekelowà se otaw egkulu te Timanem aw eg-inang te salà.”
19 Yan aw ibeg te Timanem detengan kaw te kelimahan, keilangan eked kaw lengà te peg-inang niyo te metòlid. Salig kaw diyà te Timanem mig-inang te kedita, so egkeseligan sikandin.